Markus 1

₁Tas is te aanfank fon te kuut naychkheet woo iwich Yeesus Kristus xprecht. ₂Im puch fom profët Isaiias is kexrip kep iwich iim:

₄Un soo waar tas Yohan Te Taafer im tesërt tsum foerxayn khom is, tas folek am taafe un ti mensaaj am aan saan:

— Royert aych fon ayre sinte un lost aych taafe, tan tuut Hërkot aych fertsaye.

₅Fiile pewooner fon te rechioon fon Yutëya un fon te xtat Yeruusalëm waare Yohan aan heere kang. Ti hon sayn sinte kepaycht, un Yohan hot se ketaaft im Jortan flus. ₆Eyer hot sich keklayt mit en tsaych woo mit khameele haut kemach kep waar un en leter këtel un hot kraas hupser un wilte hoonich kes. ₇Eyer saat fer tas folek:

— Noo mich khomt yemant woo mee important is wii ich, un ich sin es net weyert mich se pike fer tëm sayn santaale uf pine. ₈Ich taafe aych mit waser, awer tee wërt aych taafe mit em Hayliche Kayst.

₉In tee keleechenheet is Yeesus fon Nasarëë in Kalilëya aan khom, un Yohan Te Taafer hot em ketaaft im Jortan flus. ₁₀Im momënt woo eyer raus fom waser am khome waar, hot Yeesus te himel sich uf mache kesiin un em Hërkot sayne Kayst runer khome wii en taup iwich iim. ₁₁Un fom himel is en xtim khom:

— Tuu pist mayne liipe soon un kepst mich fiil frayt.

₁₂Klaych tëm noo, hot te Kayst Yeesus noo em tesërft keen kemach. ₁₃Yeesus is fërtsich taache lang too keplip, woo Satanaas iim fersuuchunge foer kextelt hot. Uf tëm plats waar wilte tiire un ti ëngle hon em uf kepast.

₁₄Wii Yohan xon in ti katee khom waar, is Yeesus noo Kalilëya kang, Hërkot sayn kuute naychkheete am aan saan. ₁₅Eyer saat:

— Ti tsayt is khom. Te Hërkots Raych is ticht. Royert aych un klaapt an te ewankeelium!

₁₆Yeesus waar langst te rant fon te Kalilëye lakoo am keen wan eyer tswaay fixer kesiin hot. Tas waare Simon un sayne pruuter Antrëas, woo an ti lakoo waare, am fixe mit netse. ₁₇Yeesus hot tëne kesaat:

— Khomt mit mich, ich tuun aych lërne mënxe fixe.

₁₈Tan, hon se klaych ti netse laye kelos un sin mit Yeesus kang.

₁₉En pisye wayter, hot Yeesus anere tswaay priiter kesiin. Waare Tiaako un Yohan, Zebedeu sayn puuwe, woo uf sayne poot waare, ti netse am flike. ₂₀Yeesus hot ti tswaay keruuf, un tii hon Sepeteu, iire fater, un sayn knechte uf em poot kelos un sin mit tëm kang.

₂₁Yeesus un ti tisiple sin an ti xtat Kafarnaum aan khom un, am samstach, is eyer in ti sinakook unterichte kang. ₂₂Ti layt woo em aan keheyert hon, hon sich aarich ferwunert mit tëm sayne kexik fer se unterichte. Yeesus hot keuntericht mit sayn aychent autoriteet un net wii ti Kesets mayster. ₂₃Tan, is too en man aan khom woo fon en xlechte kayst tomineyert waar. Te man hot kexraayt:

₂₄— Was wilst tuu fon uns, Yeesus fon Nasarëë? Pist tuu khom fer uns fernichte? Ich wees kans kenau weyer tuu pist: pist te Hayliche woo Hërkot kexikt hot!

₂₅Tan hot Yeesus en ortnung kep fer te xlechte kayst:

— Hal tayn xnis un kee aus tëm man!

₂₆Too hot te kayst te man kexitelt mit kewalt un, en xraay am kewe, is eyer raus kang fon tëm. ₂₇Al hon sich ferwunert un saate eene fer te anere:

— Was sol tas petayte? Tas is en nay untericht mit autoriteet kep. Tee xikt sokaar an ti xlechte kayste, un tii tuun iim aan heere.

₂₈Un Yeesus sayne naame is klaych pekhant kep in te kans rechioon fon Kalilëya.

₂₉Klaych tëm noo, sin Yeesus, Simon, Antrëas, Tiaako un Yohan aus te sinakook kang un sin pis an Simon sayn haus kang. ₃₀Simon sayn xwiicher moter waar im pet, mit fiiwer. Soo wii Yeesus aan khom is, hon se tëm fertseelt tas sii krank weyer. ₃₁Eyer is ticht pay se kang, hot tëm sayn hant fest kehal un hot se keholef uf xtaye. Te fiiwer is wech kang fon te fraa un tii hot aan kefang se xafe fer ti mëner se petiine.

₃₂Foer nacht, wii ti sun xon uner kang waar, hon se ti kranke un layt woo tomineyert waare fon temoone pis pay Yeesus kenom. ₃₃Tas kanse folek fon te xtat hot sich kesamelt foer em haus. ₃₄Yeesus hot fiil layt kuriert fon aler sorte krankheete un hot fiil temoone aus kextoost. Eyer hot ti temoone net xpreche kelos, wayl tii wuste weyer Yeesus waar.

₃₅Moynts kans frii, wii es noch tunkel waar, is Yeesus uf kextii, is aus te xtat kang un is uf en tesërt plats kang un is too keplip am peete. ₃₆Simon un sayn khameraate hon Yeesus uf ale plets kesuucht. ₃₇Wii se em kefun hon, hon se kesaat:

— Al sin aych am suuche.

₃₈Yeesus hot keantwort:

— Meyer keen noo te wile woo ticht too rom sin, tas ich te ewankeelium aach too aan saan khan, wayl is fer tas woo ich khom sin.

₃₉Yeesus is iwer ti kans Kalilëya kang, te ewankeelium am aan saan in te sinakooke un temoone fort am yaae.

₄₀En lepra kranke is ticht pay Yeesus khom, hot sich kekniit un saat:

— Hër, ich wees tas tuu mich heele khanst wënst tuu wilst.

₄₁Yeesus hot em aarich ketauert, hot aan em kethupt un saat:

— Yoo! Ich wil. Tuu pist keheelt.

₄₂Im selwiche momënt is ti lepra ferxwun un tee is keheelt kep.

_43-44Un Yeesus hot xtram tii ortnung kep:

— Kuk! Saa tas fer nimant, awer kee ferlange fer te priister tas tee tich unersuuche sol. Tëm noo, fer se pewayse tas tuu kuriert pist, kee ti opfer mache woo Mooses kexikt hat.

Tan hot Yeesus iim fort kexikt. ₄₅Awer, te man hot aankefang fiil se xpreche un hot ti naychkheet ferprayt. Tesweche, khont Yeesus net mee fray in ti xtet rin keen, awer is yaus keplip, in tesërte plets. Un layt fon aler sayte sin em uf suuche khom.