Markus 6

₁Yeesus is tsurik kang mit sayn tisiple pis an ti xtat Nasarëë, woo eyer kroos kewakst waar. ₂Am samstach hot eyer aankefang se unterichte in te sinakook. Fiile woo em am aan heere waare hon sich ferwunert un hon kefroot:

— Fon woo khomt tëm tas ales in? Fon woo khomt tëm sayn wisheet? Wii soo macht tee soo wunere? ₃Is tas net, filaycht, te tixler, Maria sayne soon? Is tas net Tiaako, Yoosef, Yuutas un Simon sayne pruuter? Tuun tëm sayn kexwister net too hii unich uns woone?

Tesweche hon se te interese an tëm ferloer. ₄Awer, Yeesus saat tëne:

— En profët kept iweraal rexpekteyert, awer ploos net woo eyer kroos kewakst is, unich sayn ferwante un in sayn haus.

₅Eyer khont khee ëne wuner mache, hot ploos phaar kranke keheelt, tëne ti hënt triwer kehal. ₆Hot sich ferwunert fon tëne sayn unklaawichkheet. Is, awer toch, ti nachpaarx xtetcher torich kang, am unterichte.

₇Tan hot Yeesus ti tswelef keruuf un hot se tsu tswet kexikt, un kept tëne autoriteet iwich ti xlechte kayste. ₈Hot tëne pextimt solte niks mit hoole iwich te weech, ploos en xtok; khee rees thax, khee kelt. ₉Solte santaale an ti fiis tuun un solte net tswaay punxe mit nëme. ₁₀Saat noch:

— Wën teyer in en xtat rin keet, playpt im selwiche haus pis teyer fon tëm plats wayter keet. ₁₁Wën uf en plats tii aych net aan nëme ore heere wole, wën teyer fon too fort keet, xitelt te xtaap fon ayre fiis, als en tsaychnis keeche tii.

₁₂Too, sin ti aphostele aus kang, hon kepreeticht tas tas folek sich roye teet. ₁₃Hon fiil taywle aus kextoost un hon en kroose numer kranke keheelt, un hon se inkesalept mit eel.

₁₄Te Kheenich Herootes hot iwich tas ales xpreche keheyert, wayl Yeesus waar xon iweraal pekhant. Phaar saate:

— Tee man is Yohan Te Taafer, woo noch mool peleept kep is! Tesweche hot tee man ti macht fer wunere se mache.

₁₅Anere hon kesaat tas weyer Eliias. Awer, phaar hon pehaupt:

— Tee is en profët, wii ëne fon tëne friirixe profëte.

₁₆Wii Herootes tas keheyert hot, saat eyer:

— Eyer is Yohan Te Taafer! Ich hon kexikt tëm te khop ap hake, un yets is eyer peleept kep!

₁₇Wayl tas waar te aychne Herootes woo kexikt hat solte Yohan fange, tëm ti hënt aan pine un in ti katee xmayse. Tee hot tas kemach weche Herotiias, mit weem eyer sich ferhayrat hot, wën se ach sayne pruuter Filip sayn fraa waar. ₁₈Tesweche hot Yohan oft fer Herootes kesaat: “Torich unser Kesets pist tuu ferpot mit tayne pruuter sayn fraa hayrate!”

₁₉Herotiias waar wuutich iwer Yohan un wolt em toot mache. Awer, khont net, ₂₀wayl Herootes pang hat fon tëm, wayl eyer wust tas tee en kuute man waar un fer Hërkot sich uf keopfert hat. Soo, hot Herootes Yohan kexitst. Un, wën eyer tee keheyert xpreche hot, wust eyer net was mache, awer toch soo hot eyer tëm kërn aan keheyert.

₂₁Awer, uf Herootes keportstaach hot sich ti keleechenheet presenteyert woo Herotiias kewaart hat. An tëm taach hot Herootes en panket kep fer ti importante layt fon sayn Rechiirung: hooche aankextelte, militeyers un kalileyer autoriteete. ₂₂Iwich te panket, is Herotiias sayn meetche in te saal rin khom un hot ketanst. Herootes un sayn in kelaatne hon tas aarich xeen kefun. Tan, saat te kheenich fer es meetche:

— Ferlang was tuu wilst, un ich kewe es tich.

₂₃Un hot kexwoert:

— Ich ferxpreche tas ich tich kewe was tuu ferlangst, wën tas ach ti heleft fon mayne raych is!

₂₄Tii is fer sayn mama frooe kang was se ferlange solt. Un ti mama hot keantwort:

— Ferlang em Yohan Te Taafer sayne khop.

₂₅Im selwiche momënt is tas meetche tsurik pay te kheenich kang un hot ferlangt:

— Ich wil em Yohan Te Taafer sayne khop in en kroose teler, kraat yets!

₂₆Herootes is aarich traurich kep, awer, wayl eyer kexwoert hat foer te kanse layt, must eyer sayn wort in hale un kewe was tas meere ferlangt hat. ₂₇Hot klaych en soltaat kexikt solt em Yohan sayne khop pringe. Te soltaat is in ti katee kang, hot Yohan sayne khop ap kehakt, ₂₈in en kroose teler ketuun un hot es fer tas meere kep. Un tas hot es fer sayn mama ap kep. ₂₉Wii Yohan sayn tisiple tas se wise kriit hon, sin se khom, tëm sayne khërwer kehool un hon em pekraapt.

₃₀Ti aphostle sin tsurik pay Yeesus khom un hon tëm kesaat ales was se kemach hate, un was se te layt kelërnt hate. ₃₁Tort waare soo fiil layt hin am khome un fort am keen, tas te Yeesus un ti tisiple khee tsayt hate fer se ese. Too saat Yeesus:

— Khomt! Meyer keen leen pis an en unpewoont plats tas mer pisye ruue khëne.

₃₂Tan, sin se aleen mit en poot uf en tesërt plats kefaar. ₃₃Fiil hon, awer, kesiin wii se fort kefaar sin un, hon se erkhënt, sin hiin kelaaf, tsuu fuus, fon ale xtet, un sin foer tëne aan khom. ₃₄Wii se aus kextii sin, hot Yeesus en kroos folek kesiin un hot se ketauert, wayl se waare wii xeef woo khee xeefer hon.

Un hot aankefang tëne fiil tings se lërne. ₃₅Foer nacht, sin ti tisiple ticht pay Yeesus khom un saate:

— Es is xon xpeet, un tas plats is unpewoont. ₃₆Xik tas folek fort, tas se in ti wile woo too ticht rom sin aan keen fer etwas se khaafe fer se ese.

₃₇Awer, Yeesus hot keantwort:

— Kept teyer selepst tëne se ese.

Ti tisiple hon kesaat:

— Tas mer fer tas kanse folek proot khaafe khëne, miste meyer tswaay hunert silwerne nikle hon.

₃₈Yeesus hot kefroot:

— Wii fiil proot het teyer? Keet kuke.

Ti tisiple sin kuke kang un saate:

— Meyer hon finef proot un tswaay fix.

₃₉Tan hot Yeesus kexikt tas folek solt sich in krupe setse uf tas kriine kraas. ₄₀Al hon sich in en krupe fon hunert ore fuftsich kesetst. ₄₁Too hot Yeesus ti finef proot kehool un ti tswaay fix, hot noo em himel kekukt un hot Hërkot ketankt. Tëm noo hot eyer tas proot keteelt un fer ti tisiple ap kep fer aus teele fer tas folek. Un hot aach ti fix ferteelt mit se al. ₄₂Ti kanse layt hon kes un sin sat kep. ₄₃Un ti tisiple hon noch tswelef khërep samer kerof fol mit proot xtiker un fix. ₄₄Waare finef tausent mëner woo tas proot kes hon.

₄₅Klaych tëm noo, hot Yeesus sayn tisiple kexikt solte inxtaye in te poot fer uf ti aner sayt se faare pis Petsayta, ti tsayt wii Eyer apxiit kemach hot fer tas folek. ₄₆Un tan is Eyer uf te përich kang fer se peete. ₄₇Foer nacht, waar te poot im mite lakoo, un Yeesus waar aleen uf eyert. ₄₈Yeesus hot kesiin, tas ti tisiple mit xweerichkheet kerutert hon wayl te winte keeche tii am ploose waar. Naachts, tswixich tray un seks uer, is Yeesus tëne in keeche khom, tsu fuus iwich es waser am keen.

₄₉Tii, awer, wii se en kesiin hon iwich es meer am keen, hon ketënkt es weyer en kexpëns un hon kexraayt. ₅₀Ti sin al ferxrokt mit was se kesiin hon. Awer, klaych hot Yeesus mit tëne kexproch un saat:

— Khënt aych animeere! Sin ich! Praycht khee pang hon!

₅₁Un is uf te poot kang fer pay tëne se playwe, un te wint hot sich peruuycht. Ti tisiple waare komplët erxtaunt. ₅₂Wayl tëne sayn ketanke waare tsuu un tii hon te wuner fom proot net ferxtan.

₅₃Xon uf te aner sayt, sin se uf eyert khom in Jenesarëë. ₅₄Wii se aus em poot kextii sin, klaych hot tas folek Yeesus kekhënt, ₅₅un sin se ti kans rechioon torich kereest, un ti layt hon ti kranke in peter keprung uf ti plets woo se keheyert hon tas Yeesus weyer. ₅₆In yeete plats, xtat ore khamp, woo Yeesus rin kang is, hon se ti kranke uf tas market plats keprung, hon se kepiit Yeesus solt weenichstens lose tas se am saum fon sayn tsaych thupe khënte; un al woo too traan kethupt hon, waare kuriert kep.