Markus 16

₁Wii te samstach rom waar, hon Maria Matalena, Salomë un Maria, Tiaako sayn mama, parfums khaaf fer Yeesus sayne khërwer parfumeere. ₂Am sontach, kans frii, wii ti sun am uf keen waar, sin sii pis ans kraap kang. ₃Iwer weech hot een fer ti aner kefroot:

— Weyer tuut te xteen woo te inkang fom kraap tsuu macht fer uns wech hoole?

₄Tii hon tas kesaat wayl te xteen aarich kroos waar. Awer, wii se kekukt hon, hon se kesiin tas te xteen xon wech kehool kep waar. ₅Tan sin se in tas kraap rin kang un hon en junge puup kesiin mit ways tsaych uf te rechts sayt am sitse. Tii sin ferxrok, ₆awer tee saat:

— Praycht aych net ferxreke! Ich wees tas teyer Yeesus fon Nasarëë am suuche sayt, woo pekraytst kep waar; awer tee is net hier, wayl te is xon peleept kep. Kukt tas plats woo tee hiin ketuun kep waar. ₇Yets keet un kept tii orte fer Pheeter un fer ti anere tisiple: “Tee keet foer aych noo Kalilëya. Tort siit teyer iim, soo wii eyer selepst kesaat hat.”

₈Tan sin sii raus kang un sin auskeris fom kraap, mit en xrekliche pang un am tsitre. Un hon niks fer nimant kesaat wayl se fiil pang hate.

₉[Yeesus is peleept am sontach kans frii un is te eyerxt tsum foerxayn khom fer Maria Matalena, fon weem eyer siwe temoone aus kextoost hat. ₁₀Sii is tas fertseele kang fer Yeesus sayn khameraate, wayl tii traurich waare, am prile. ₁₁Wii se ti keheyert hon saan tas Yeesus leewent weyer un weyer fer sii tsum foerxayn khom, hon se net keklaapt.

₁₂Tëm noo hot Yeesus sich presenteyert als en frëmte fer tswaay tisiple woo uf em weech waare fer uf te khamp keen. ₁₃Tii sin tsurik kang un sin tas fertseele kang fer ti anere tisiple, un tii hon aach net keklaapt an was ti tswaay kesaat hon.

₁₄Tsum xlus is Yeesus tsum foerxayn khom fer ti elef tisiple wii se am tix kesetst hon, am ese. Eyer hot se kexteyert wayl se khee klaawe hate un net keheyert hon was tii woo iim peleept kesiin hate kesaat hon. ₁₅Tan saat eyer:

— Keet torich ti kans welt un saat te ewankeelium aan fer aler mënxe. ₁₆Weyer klaawe tuut un ketaaft kept, wërt keret, awer weyer net klaawe tuut kept konteneyert. ₁₇Fer tii woo klaawe tuun wërt ti macht kep fer wunere se mache: temoone fort yaae torich ti kraft fon mayne naame un naye xprooche xpreche; ₁₈wën se an xlange krayfe ore en kift trinke, tuut niks xlechtes paseere; un, wën se ti hënt iwer kranke layt hale, kewe ti kureyert.

₁₉Wii eyer xon mit tëne kexproch hat, is te Hër Yeesus noo em himel kenom kep un hot sich uf Hërkot sayn rechts sayht kesetst. ₂₀Ti tisiple sin te ewankeelium iweraal aan saan kang. Un te Hër hot se keholef, un torich wunere, hot eyer imer pewayst tas tëne iire mensaaj ti woerheet waar.]