Markus 15

₁Soo wii es taach kep is, hon ti xëfe fon te priister sich fersamelt mit te yute fiirer un mit te Kesets mayster un mit em kanse Hooche Konseel un hon sayn pleen kemach. Tii hon Yeesus aan kepun, un hon em kenom un hon em ap kep fer Pilatus. ₂Pilatus hot kefroot:

— Pist tuu te yute sayne kheenich?

Yeesus hot keantwort:

— Weyer tas am saan is sayt teyer!

₃Un ti xëfe fon te priister hon fiil akusatsioone keeche iim uf kextelt. ₄Too hot Pilatus noch was kefroot:

— Tuust tuu net antworte? Kuk mool wii fiil akusatsioone tii keeche tich am mache sin!

₅Awer, Yeesus hot sonst niks kesaat un Pilatus hot sich aarich ferwunert mit tas.

₆An yeete Oostre Fest, waar ti kewoonheet tas te kowerneyer eene fon te kefangne loos lose teet, woo tas folek ferlange teet. ₇In tee keleechenheet waar en man woo Barabaas kenënt waar in te katee mit phaar mëner woo layt umkeprung hate in en rewolte. ₈Tas folek is khom un hot aankefang se ferlange, wii ti kewoonheet waar, tas Pilatus en kefangne loos lose solt. ₉Tan hot eyer kefroot:

— Wolt teyer tas ich te kheenich fon te yute loos lose fer aych?

₁₀Tee wust kans kuut tas ti xëfe fon te priister nayt hate fon Yeesus un waar tesweche woo tii tee iim ap kep hate. ₁₁Awer ti xëfe fon te priister hon tas folek uf kehetst tas se fer Pilatus ferlange teere solt Barabaas loos lose, anxtat Yeesus. ₁₂Pilatus hot noch mool mit em folek kexproch. Eyer hot kefroot:

— Was wolt teyer hon tas ich mache mit tëm man woo teyer kheenich fon te yute nënt?

₁₃Un tii hon kexraayt:

— Pekrayts em!

₁₄Pilatus hot kefroot:

— Was fer telikt hot tee ketuun?

Awer, tii hon noch hëter kexraayt:

— Pekrayts em! Pekrayts em!

₁₅Too wolt Pilatus tas folek tsufriite mache. Tesweeche hot eyer Barabaas loos kelos, wii tii ferlangt hate. Tëm noo hot eyer Yeesus ferpaytxe kexikt un hot em ap kep fer pekraytst kewe.

₁₆Too hon ti soltaate Yeesus pis uf te inerliche hoof fom kowerneyer sayne palas kenom un hon ti kans soltaate kompanii samer keruuf. ₁₇Tëm noo hon se Yeesus en roote mantel aan ketsoo un hon en kroon mit tëner rangle kemach un tëm uf te khop ketuun. ₁₈Too hon se aankefang tëm se pekriise, am saan:

— Lank leewe fer te Kheenich fon te Yute!

₁₉Hon tëm uf te khop keklopt mit en xtok, hon em ferxpukt un hon sich kekniit, am mache wii wën se em am atoreere weere. ₂₀Noo tëm ferxpote, hon se te roote mantel ap ketuun un hon tëm sayn aychne tsaych noch mool aan ketsoo. Klaych tëm noo hon se em raus kenom fer iim se pekraytse.

₂₁Uf em weech, hon ti soltaate en man aan ketrof, Simeon kenënt, woo fom khamp noo te xtat am khome waar. Tee Simeon, fater fon Aleksanter un Rufus, waar aus Sireene. Tii soltaate hon Simeon ketswung Yeesus sayn krayts traan ₂₂Tun hon Yeesus pis uf tas plats Kolkota hiin kenom. (Kolkota petayt “Kalwaario”.) ₂₃Tii soltaate wolte tëm wayn kewe, fermixt mit mira, awer eyer wolt tas net trinke. ₂₄Too hon ti soltaate em ans krayts kenaachelt un hon tëm sayn tsaych unich sich ferteelt. Hon tas aus kexpiilt fer se wise was fer xtik yeete ëne pehale teet. ₂₅Tas waar noyn uer moynts wii se Yeesus pekraytst hon. ₂₆Hon se en xilt uwe ans krayts kemach, woo truf kexrip waar: “Te Kheenich fon te Yute”.

₂₇Mit Yeesus, hon se aach tswaay xpitspuuwe pekraytst: eene uf sayn rechts sayt, anere uf sayn links sayt. ₂₈[Soo hot sich inkehal was ti Hayliche Xrifte saan: “Eyer is pehantelt kep wii en pantit”.]

₂₉Tii woo too langst am keen waare, hon em ferxpot, hon te khop kexitelt un hon em soo pelayticht:

— Hey, tuu woo saast teest te Thëmpel niter rayse un noch mool uf paue in tray taache! ₃₀Tan khom runer fom krayts un ret tich selwer!

₃₁Ti xëfe fon te priister un ti Kesets mayster hon em aach ferxpot, am saan:

— Hot ti anere keret, awer khan sich selwer net rete! ₃₂Los uns siin te Kristus, te Kheenich fon Israël, yets fom krayts runer khome un tan tuun meyer an tëm klaawe!

Un ti xpitspuuwe woo mit Yeesus pekraytst kep waare hon en aach ferxënt.

₃₃Uf mitach is te taach tunkel kep, un ti tunkelheet hot ti kans eyert tray xtun ketekt. ₃₄Um tray uer mitachs, hot Yeesus in hat xtim kexraayt:

— “Eloy, Eloy, lemá sabactani?” Tii wërter petayte: “Mayn Kot, mayn Kot, warom host tuu mich inxtich kelos?”

₃₅Phaar layt woo too waare hon tas keheyert un saate:

— Heyert! Eyer ruuft Eliias!

₃₆Yemant is kelaaf un hot en xwam nas kemach in keweenliche wayn, hot tas an ti xpits fon en xteke ketuun, hot tas em Yeesus kep fer se trinke un saat:

— Waat! Meyer siin op Eliias khomt fer em runer hoole fom krayts!

₃₇Tan hot Yeesus en hate xraay kelos un is kextorep.

₃₈Too hot te foerhank fom Thëmpel sich feris in tswaay xtiker, fon uwe pis une. ₃₉Te ofitsier fom reemixe militeyer woo foer em krayts waar, am kuke wii Yeesus am xtërwe waar, saat:

— Te man waar wërklich Hërkot sayne Soon!

₄₀Phaar fraae waare aach too kewees, fon waytem am kuke. Unich tëne waare Maria Matalena, Salomë un Maria, woo moter waar fon Yoosef un Tiaako, te yingste. ₄₁Tii fraae waare mit Yeesus kang un hon tëm keholef wii eyer in Kalilëya waar. Auser tii, waare noch anere fiile fraae woo mit iim kang waare noo Yeruusalëm.

_42-43Waar xon neekst nacht wii Yoosef, fon te xtat Arimatëya, aan khom is. Tee waar en importante man un hot teel kehal im Hooche Konseel. Yoosef hot aach kewaart uf te Hërkots Raych. Es waar te Taach fon te prepareerung, was mënt, te taach foer em samstach. Tesweche is Yoosef, sich koraaj foer kehool, mit Pilatus xpreche kang un hot Yeesus sayne khërwer ferlangt. ₄₄Pilatus hot sich ferwunert wii eyer se wise kriit hot tas Yeesus xon toot waar. Hot te reemixe ofitsier keruuf un hot kefroot op Yeesus xon lang tsayt toot waar. ₄₅Wii eyer ti informatsioon kriit hot fom ofitsier, hot Pilatus Yeesus sayne khërwer ap kep fer Yoosef. ₄₆Yoosef hot en layn tuuch khaaf, hot Yeesus sayne khërwer fom krayts runer kehool un hot em inkewikelt in tas layn tuuch. Tëm noo hot eyer te khërwer in en kraap ketuun woo aus kehoolt kep waar in te fels un hot en kroose runte xteen foer kerolt fer te inkang fom kraap tsuu mache. ₄₇Maria Matalena un Maria, Yoosef sayn mama, waare am kuke un hon kesiin woo Yeesus sayne khërwer hiin ketuun kep waar.