Markus 14

₁Waare tswaay taache am feele fer tas Oostre Fest un fer tas Fest fom Proot oone Heep. Ti xëfe fon te priister un ti Kesets mayster waare en uersach am suuche fer Yeesus heelich se fange un umpringe. ₂Ti hon kesaat:

— Meyer mache tas net iwich tas fest, tas es khee rewolte unich em folek kept.

₃Yeesus waar in te wile Petanye, in Simon, te lepra kranke, sayn haus am tix am setse. Tan is en fraa aan khom mit en kleesye fon alapastro kemach, fol mit narto parfum, woo aartich tayer waar. Sii hot te hals fom kleesye ap keproch un hot te parfum uf Yeesus sayne khop kexut. ₄Phaar woo too waare sin pees kep un hon ëne fer te anere kesaat:

— Was en fertsotleray! ₅Tee parfum khënt ferkhaaf kewe fer mee wii tray hunert silwerne nikle, woo khënte fer ti aarme kep wëre.

Tii hon ti fraa xaref kritiseyert, ₆awer Yeesus saat:

— Lost ti fraa in ruu! Warom sayt teyer sii am xteere? ₇Also, ti aarme wëre imer pay aych playwe, un, imer woo teyer wolt, khënt teyer tëne mit helfe. Awer, ich playwe net imer pay aych. ₈Sii hot ales kemach was sii khont, wayl foer mayne toot is se khom fer mayne khërwer parfumeere fer mayn peërtichung. ₉Ich fersichere aych tas tas woer is: uf yeete plats fon te welt woo te ewankeelium aan kesaat kept, wërt fertseelt was sii kemach hot, un sii wërt erinert kewe.

₁₀Yuutas Iskariotes, woo ëne fon te tswelef tisiple waar, is mit te xëfe fon te priister xpreche kang fer ap mache wii eyer Yeesus tëne ap kewe teet. ₁₁Wii se keheyert hon was tee saat, sin se aarich froo kep un hon ferxproch tëm kelt kewe. Soo hot Yuutas aan kefang en keleechenheet suuche fer Yeesus ap kewe.

₁₂Am eyerxte taach fom Fest fom Proot Oone Heep, woo ti yute xeefyer kexlacht hon fer ti Oostre fayre, hon ti tisiple fer Yeesus kefroot:

— Woo wolt teyer hon tas meyer tas Oostre nachst ese fer aych prepareere?

₁₃Tan hot Yeesus tswaay tisiple kexikt mit tee ortnung:

— Keet pis an ti xtat. Tort wërt en man sich mit aych trefe woo en waser kruuch am traan is. Keet tëm man noo ₁₄un saat fer te hër fom haus woo tee rin keet tas te Mayster frooe xikt: “Woo playpt ti xtup woo ich un mayn tisiple tas Oostre nachts ese ese?” ₁₅Tan tsaych tee aych en kroos xtup uf em tswete xtok, kemeepelt un fërtich fer tas nachts ese. Tuut too ales fer uns prepareere.

₁₆Ti tswaay tisiple sin pis an ti xtat kang un hon ales ketrof wii Yeesus kesaat hat. Tan hon se tas Ooostre nachst ese prepareyert.

₁₇Wii es nacht kep is, is Yeesus aan khom mit te tswelef tisiple. ₁₈Wii se am tix kesetst hon, iwer em ese, saat eyer:

— Ich fersichere aych tas tas woer is: eene fon aych, woo mit mich am ese is, tuut mich hinerkeen.

₁₉Tii sin traurich kep un, eene noo em anere, hon aankefang se frooe:

— Teyer mënt net tas es ich sin, kël?

₂₀Yeesus hot keantwort:

— Is ëne fon aych. Is tee woo im selwiche teler tas proot am thunke is mit mich. ₂₁Wayl te Soon fom Man xtërwe mus soo wii ti Hayliche Xrifte es saan; awer ay fon tëm woo te Soon fom Man am hinerkeen is! Es weyer peser wën tee nii uf ti welt khom weyer!

₂₂Soo lang wii se am ese waare, hot Yeesus tas proot kehool un hot Hërkot ketankt. Tëm noo hot eyer tas proot keteelt un hot tas fer ti tisiple kep, am saan:

— Hoolt, tas is mayne khërwer.

₂₃Klaych tëm noo, hot eyer te wayn khelich kehool un hot Hërkot ketankt. Tëm noo hot eyer te khelich fer ti tisiple hiin kelangt, un al hon fom wayn ketrunk. ₂₄Tan saat Yeesus:

— Tas is mayn pluut, woo ferxut kept fer fiile, tas pluut woo Hërkot sayn alians mit sayn folek fersichert. ₂₅Ich fersichere aych tas tas woer is: nii mee trinke ich fon tëm wayn pis an te taach woo ich mit aych en naye wayn trinke im Hërkots Raych.

₂₆Tan hon se loop liiter kesung un sin uf te Oliiwe Përich kang.

₂₇Un Yeesus saat fer ti tisiple:

— Teyer tuut al ausrayse un tuut mich in xtich lose, wayl ti Hayliche Xrifte saan: “Ich tuun te Xeefer umpringe un ti xeef kewe ferxtraut.” ₂₈Awer, noo mayn peleepung, keen ich foer aych noo Kalilëya.

₂₉Tan saat Pheeter fer Yeesus:

— Ich tuun aych nii in xtich lose, wën ach ti anere al tich in xtich lose!

₃₀Awer Yeesus saat tëm:

— Ich fersichere tich tas tas woer is: in tee selwich nacht, eep te haan tswaay mool kreye tuut, saast tuu tray mool tas tuu mich net khëne tuust.

₃₁Awer Pheeter hot tringlich kesaat:

— Ich tuun nii saan tas ich aych net khëne, wën ich aach mit aych xtërwe mus.

Un ti anere al hon tas selwiche kesaat.

₃₂Yeesus un ti tisiple sin uf en plats kang Getseemany kenënt. Un Yeesus saat tëne:

— Setst aych too hiin, soo lang wii ich peete keen.

₃₃Tan is Yeesus kang, un hot Pheeter, Tiaako un Yohan mit kehool. Too hot eyer aankefang en kroos traurichkheet un petriipung se xpiire ₃₄un saat tëne:

— Ti traurichkheet woo ich am xpiire sin is soo kroos, tas es meechlich is tas tii mich umpringe khan. Playpt hier am wache.

₃₅Tee is en pisye foran kang, hot sich kekniit, hot es kesicht pis an te potem ketuun un hot fer Hërkot ferlangt tas, wën meechlich, solt eyer tii layte xtun fon tëm ap leye. ₃₆Eyer hot soo kepeet:

— Fater, mayne Fater, tuu khanst ales mache! Los fon mich wech tee khelich fon layte. Awer, tas net kemach kept was ich wil, awer was tuu wilst.

₃₇Tëm noo is eyer tsurik kang un hot ti tray tisiple am xloofe kefun. Tan saat eyer fer Pheeter:

— Simon, pist tuu am xloofe? Meechst tuu net mool een xtun wache khëne? ₃₈Wacht un peet tas teyer net fersuucht kept. Is laycht wole ti fersuuchung aus hale, wërklich xlim is tas mache khëne.

₃₉Yeesus is noch mool kang un hot kepeet, ti selwiche wërter am saan. ₄₀Klaych tëm noo, is eyer tsurik uf tas plats woo ti tisiple waare un hot se noch mool aan ketrof am xloofe. Ti hate fiil xloof un khonte net mit te aue uf plaype. Un wuste net was antworte fer Yeesus.

₄₁Wii eyer es trite mool tsurik khom is, hot Yeesus kefroot:

— Sayt teyer imer noch am xloofe un am ruue? Kenuuch! Ti tsayt is khom, te Soon fom Man is am ap kep sin in te hënt fon te sintiche layt. ₄₂Xtayt uf, un meyer keen fort. Kukt! Too khomt te man woo mich am hinerkeen is!

₄₃Yeesus waar noch am xpreche, wii Yuutas aan khom is, ëne fon te tswelef tisiple. Mit tëm waar en kroos folek mit am khome, mit xwaarte un kniple in te hënt, woo ti xëfe fon te priister, ti Kesets mayster un ti yute fiirer kexikt hate. ₄₄Tee woo Yeesus am hinerkeen waar hot en sinaal mit tëne ap kemach kehat. Eyer hat kesaat kehat: “Fangt te man woo ich khuse tuun, wayl tas is eyer.”

₄₅Klaych wii eyer ticht pay Yeesus khom is, saat Yuutas:

— Mayster!

Un hot em kekhust. ₄₆Tan hon se Yeesus kefang un hon em kefang. ₄₇Awer, ëne woo too waar hot ti xwaart raus ketsoo, hot en knecht fom Hooche Priister iwerfal un hot tëm en oer ap kehakt. ₄₈Tan hot Yeesus fer tas folek kesaat:

— Teyer khomt mit xwaarte un kniple fer mich se fange wii wën ich en pantit weyer? ₄₉Ich waar mit aych ti kanse taache, am unterichte uf em hoof fom Thëmpel, un teyer het mich net kefang. Awer tas is am paseere fer sich in se hale was ti Hayliche Xrifte saan.

₅₀Tan hon ti kanse tisiple Yeesus in xtich kelos un sin aus keris.

₅₁En yunge, in en layntuch inkewikelt, waar Yeesus noo am keen. Phaar hon fersuucht iim fange ₅₂awer, tee hot tas layntuch fale kelos un is nakich auskeris.

₅₃Tan hon se Yeesus pis ans haus fom Hooche Priister kenom, woo ti xëfe fon te priister, phaar yute fiirer un phaar Kesets mayster fersamelt waare.

₅₄Pheeter is Yeesus noo kang fon waytem un is uf te hoof fom haus fom Hooche Priister rin kang. ₅₅Ti xëfe fon te priister un te kanse Konseel waare en pexultichung am suuche keeche Yeesus fer em tsum toot konteneere. Awer hon niks kefun. ₅₆Fiil hon liye aus kesaat keeche iim, awer tëne sayn kexichte hon net kextimt een mit te aner.

₅₇Phaar hon sich uf kextelt un hon Yeesus mit liye aan kep. Tii saate:

₅₈— Meyer hon keheyert wii eyer kesaat hot: “Ich fernichte te Thëmpel woo fon te mënxe uf kepaut kep waar un, in tray taache, tuun ich en anere uf paue woo net fon te mënxe uf kepaut kept.”

₅₉Toch soo hon sayn kexichte net een mit te aner se tuun kehat.

₆₀Too hot te Hooche Priister sich uf kextelt in te mite fon te anere un hot fer Yeesus kefroot:

— Tuust tuu tich net tefenteere keeche tii akusatsioon?

₆₁Awer, Yeesus is ruich keplip un hot niks keantwort. Tan hot te Hooche Priister noch mool kefroot:

— Pist tuu te Kristus, em Keseechente Hërkot sayne Soon?

₆₂Yeesus hot keantwort:

— Ich sin. Un teyer wërt te Soon fom Man siin uf te rechts sayt fom Almechtiche Hërkot am sitse un runer am khome mit te wolke fom himel!

₆₃Too hot te Hooche Priister sayn aychne tsaych feris un saat:

— Meyer prayche khee tsayer mee! ₆₄Teyer het tii plasfeem keeche Hërkot keheyert! Tan, was tuut teyer resolweere?

Al waare keeche Yeesus un tan hon se iim tsum toot konteneyert.

₆₅Tan hon phaar aankefang Yeesus se ferxpuke. Hon tëm es kesicht tsuu ketekt, hon em ferpokst am frooe:

— Weyer waar es woo tich kepokst hot? Root mool!

Un aach ti wachter woo iim kefang hate hon em ferpokst.

₆₆Pheeter waar noch une uf em hoof, wii een fon te tiiner fom Hooche Priister aan khom is. ₆₇Sii hot Pheeter kesiin sich am wëerme ticht am fayer, hot em kuut aan kekukt un saat:

— Tuu waarst aach mit Yeesus fon Nasarëë.

₆₈Awer eyer hot tas ap kesaat:

— Ich khëne iim net. Ich wees net fon was tuu am xpreche pist.

Un is raus kang noo em kank. In tëm momënt hot te haan kekreet. ₆₉Wii ti tiiner Pheeter too kesiin hot, hot se aankefang se saan fer tii woo too ticht waare:

— Tee man is ëne fon tëne.

₇₀Awer eyer hot noch mool ap kesaat. Klaych tëm noo, hon ti layt woo too waare noch mool fer Pheeter kesaat:

— Sicher keheyerst tuu tsu tëne sayne krupe, tuu pist toch aach aus Kalilëya.

₇₁Tan saat Pheeter:

— Ich xwoore tas ich tee man net khëne fon weem teyer am xpreche sayt! Tas Hërkot mich xtroofe sol wën ich net ti woerheet am saan sin!

₇₂In tëm momënt hot te haan es tswete mool kekreet, un Pheeter hot traan ketënkt tas Yeesus iim kesaat hat: “Eep te haan tswaay mool kreye tuut, tuust tuu tray mool saan tas tuu mich net khëne tuust.” Tan is Pheeter in sich kefal un hot aankefang se prile.