Markus 13

₁Wii Yeesus aus em Thëmpel am keen waar, hot en tisipel kesaat:

— Mayster, kuk was xteen, was en impresionant kepau!

₂Yeesus hot keantwort:

— Siist tuu ti kroose kepay? Playpt khee xteen uf em anere woo net niter khomt.

₃Yeesus hot uf em Oliiwe Përich kesetst, te Thëmpel aan am kuke, wan Pheeter, Tiaako, Yohan un Antrëas tëm in priwaat kefroot hon:

₄— Saa uns wan tas paseere tuut. Was fer sinaal kept tas fer se tsayche wan tas kanse tings aan fange tuut?

₅Tan, hot Yeesus aankefang se saan:

— Past uf tas nimant aych hinerkeet. ₆Wayl fiile wëre khome in mayne naame, am saan: “Ich sin te Kristus!” Un tuun fiil layt hinerkeen. ₇Praycht awer khee pang hon wan teyer xpreche heyert iwich te ratau fon patalye ore kriiche. Tas ales wërt paseere, awer is noch net te ën. ₈Een natsioon xtelt sich uf keeche ti aner, een lant iwerfalt tas anere. Uf fiile plets kept es eyert xutre un es ese khomt ans feele. Tas ales is wii ti eyerxte phayn fer en khint uf ti welt pringe.

₉Teyer mist aych uf pase wayl teyer ap kep wërt fer ti kerichte un ferhau kept in te sinakooke. Wayl teyer mayn aanhënger sayt, kept teyer fer ti kowerneyer un kheeniche ap kep fer julkeyert se kewe un teyer xprecht tëne iwer te ewankeelium. ₁₀Awer, eep te ën khomt, mus te ewankeelium fer ale foleke aan kesaat kewe. ₁₁Wan teyer kefang kept un ap kep wërt fer ti autoriteete, macht aych khee soriche, eep ti xtun khomt, mit was teyer saan tuut. Wën te momënt khomt, saat was Hërkot aych kept fer se saan. Wayl ti wërter woo teyer saan tuut sin net fon aych selwer, awer khome fom Hayliche Kayst. ₁₂Fiil kewe sayn aychne priiter ap fer toot kemach kewe, un eltre kewe sayn khiner ap. Un ti khiner playwe keeche sayn eltre un tuun se umpringe. ₁₃Al tuun aych hase wayl teyer mayn aanhënger sayt, awer weyer xtram playpt pis ans ën kept keret.

₁₄Un Yeesus saat wayter:

— Teyer wërt “te kroose terror” siin uf em plats woo tee net sin solt. (Tas te leeser ferxteet was tas petayte sol!) Tan, tii woo in te rechioon fon Yutëya sin sole klaych aus rayse noo te përiche. ₁₅Weyer uf sayn haus is, uf em terase, sol klaych aus rayse un sol net rin keen fer etwas se hoole. ₁₆Un weyer uf em khamp am xafe is, sol net tsurik hëm keen fer sayn tsaych hoole. ₁₇Ay fon te fraae woo en khint am waarte sin un fon te mama mit kleene khiner in tëne taache! ₁₈Peet Hërkot aan tas tas net im winter paseyert. ₁₉Wayl in tëne taache kept es soo en kroose layte wii noch nii kewees waar tsayt tas Hërkot ti welt ketsoo hot; un nii mee tuut soo en tings noch mool paseere. ₂₀Awer te Hër hot ti tsayt fon tee layte kleener kemach. Wën tas net soo weyer, teet nimant sich rete. Awer, weche em folek woo Hërkot aus kesuucht hot fer se rete, is tii tsayt khëtser kemach kep.

₂₁— Soo, wën yemant aych saat: “Kukt! Te Kristus is too” ore “Te Kristus is tort!”, klaapt tas net. ₂₂Wayl khome falxe profëte un falxe mesiias, woo wunere mache fer hinerkeen, wën meechlich, sokaar tas folek woo raus kesuucht kep waar fon Hërkot. ₂₃Kept acht! Ich sin aych tas ales am saan, eep tas paseyert.

₂₄Yeesus saat:

— Noo tëne aankesaate taache fon layte, kept ti sun tunkel, un te moont tuut net mee xayne. ₂₅Ti xtërne tuun fom himel runer fale, un ti macht fom himel kept aan kextërtst. ₂₆Tan khomt te Soon fom Man tsum foerxayn fon te wolke runer am khome, mit kroos macht un kloor. ₂₇Tee xikt ti ëngle uf ti fier eke fon te eyert un samelt ti auskeweelte fon Hërkot fon een sayt te welt pis an ti aner.

₂₈Yeesus saat noch:

— Lërnt ti lektsioon woo te fayche xtok kept. Wën sayn est kriin kewe, un ti pleter aanfange aus se xlaan, wist teyer tas te sumer am khome is. ₂₉Soo aach, wën teyer tas tings siit paseere, wist teyer tas ti tsayt ticht is, fërtich fer aan se fange. ₃₀Ich fersichere aych tas tas woer is: tas tings wërt paseere eep tii woo yets leewent sin al xtërwe. ₃₁Te himel un ti eyert tuun ferxwine, awer mayn wërter playwe fer imer.

₃₂Un Yeesus macht xlus am saan:

— Awer nimant wees net mool te taach net mool ti xtun woo tas ales paseyert, net mool ti ëngle im himel, net mool te Soon, awer ploos te Fater. ₃₃Playpt in achtung: wacht un peet, wayl teyer wist net wën ti xtun khomt. ₃₄Is wii en man woo, noo auslant reest; awer, eep eyer keet, kept ortnunge, ferteelt ti aarwat unich te knechte un xikt te porteyer tas eyer wache sol. ₃₅Tan, wacht wayl teyer wist net wan te hër fom haus tsurik khomt; wën iwer mitachs, ore um halep nacht, ore foer taach, ore moynts. ₃₆Wën eyer pletslich khomt, tas eyer aych net aan treft am xloofe! ₃₇Was ich aych saan, saan ich fer al: playpt am wache!