Markus 12

₁Tëm noo hot Yeesus aankefang se xpreche torich paraaple. Eyer saat:

— Seliche man hot en trauwe plantaaj kemach un hot en tsaun runterom ketuun. Hon en thanke kepaut fer ti trauwe fertreete un wayn mache un hot en thorem kepaut fer te wachter. Klaych tëm noo, hot eyer ti plantaaj fermiit fer phaar paure un is uf rees kang. ₂Wii ti ërnt tsayt khom is, hot te hër en knecht kexikt fer sayn teel ap hoole. ₃Awer ti paure hon te knecht kefang, hon em ferxlaa un hon em tsurik kexikt oone niks. ₄Te hër hot noch en knecht kexikt, awer ti hon tëm uf te khop kexlaa un hon em ximplich pehantelt. ₅Un noch en anere is riwer kexikt kep, awer ti paure hon em umkeprung. Un tas selwiche is paseyert mit fiile anere: phaar sin ferhau kep un anere sin umkeprumg kep. ₆Un yets, te eensichste mënx woo te hër fon te plantaaj noch hat fer riwer se xike waar sayne liipe soon. Ëntlichmool hot eyer em kexikt, soo am tënke: “Mayne soon tuun se rexpekteere.” ₇Awer ti paure hon ëne fer te anere kesaat: “Tas is te Soon fom hër; tee tuut ti plantaaj ërpe. Meyer tuun em umpringe, un ti plantaaj playpt fer uns.”

₈— Tan hon se te soon kefang, un hon em toot kemach un hon te khërwer aus te plantaaj kexmis.

₉Tan hot Yeesus kefroot:

— Un yets, was macht te hër fon te plantaaj? Eyer khomt, tuut ti mëner toot mache un kept ti plantaaj fer anere paure. ₁₀Het teyer net keleest was ti Hayliche Xrifte saan?

“Te xteen woo ti maurer neewe kelos hon is te importanteste kep fon se al?

₁₂Ti yute fiirer wuste tas ti paraapel keeche iine waar un wolte Yeesus fange, awer hate pang fom folek. Tesweche, hon se Yeesus in ruu kelos un sin fort kang.

₁₃Tëm noo hon se phaar fariseyer kexikt un noch phaar mitkliiter fon Herootes sayne partay fer mit Yeesus xpreche fer en pewaysung keeche iim uf xtele. ₁₄Ti sin aan khom un saate:

— Mayster, meyer wise tas teyer eerlich sayt un khimert aych net mit was ti anere tënke. Teyer julkeyert net torich was yemant aus siit, awer unterichst ti woerheet iwer ti aart woo Hërkot ferlangt fer se leewe. Saa mool: is es ore is es net keeche unser Kesets xtayer petsaale fer te reemixe Kayser? Mise meyer tas petsaale ore net?

₁₅Awer Yeesus hot tëne sayn xlechtichkheet kemërekt un antwort:

— Warom suucht teyer en pewaysung keeche mich? Pringt en nikel fer mich se kuke.

₁₆Tii hon en keprung, un eyer froot:

— Weem is te naame un tas kesicht woo too uf tëm nikel ketrukt sin?

Tii hon keantwort:

— Sin em Kayser.

₁₇Tan saat Yeesus:

— Kept fer te Kayser was em Kayser is un kept fer Hërkot was em Hërkot is.

Un tii hon sich mit Yeesus ferwunert.

₁₈Phaar satuseyer, woo fersichere tas nimant peleepe tuut, sin ticht pay Yeesus khom un hon kesaat:

₁₉— Mayster, Mooses hot tii kesets fer uns kexrip: “Wën en man xtërept un sayn fraa oone khiner lost, tëm sayne pruuter mus mit te witfraa hayrate, tas se khiner kriin, woo kerechent kewe als khiner fon tëm pruuter woo kextorep is.” ₂₀Paseyert tas es siwe priiter waare: Te elste hot kehayrat un is kextorep oone khiner hinerlose. ₂₁Te tswete hot mit te fraa kehayrat un is kextorep oone khiner lose. Tas selwiche is paseyert mit em trite. ₂₂Tsum xlus, hon ti siwe priiter sich ferhayrat mit te selwich fraa un sin kextorep oone khiner lose. Noo tëne al, is ti fraa aach kextorep. ₂₃Also, am taach fon te peleepung, wan ti kanse toote noch mool leewe tuun, fer was fer man keheyert ti fraa? Wayl ti hate sich al mit tëm ferhayrat!

₂₄Yeesus hot keantwort:

— Teyer sayt kans ferkheyert, khënt net mool ti Hayliche Xrifte un net mool Hërkot sayn macht! ₂₅Also, wan ti toote peleepe, wëre tii wii ëngle fom himel sin, un nimant tuut hayrate. ₂₆Het teyer nii im Puch fon Mooses keleest was kexrip is iwer ti peleepung? Wën eyer fom phutx xprecht woo in fayer waar, is kexrip was Hërkot fer Mooses saat: “Ich sin te Hërkot fon Aapraham, te Hërkot fon Iisak un te Hërkot fon Yaakop.” ₂₇Un Hërkot is net te Hërkot fon te toote un toch fon te leewente. Teyer sayt komplët ferkheyert!

₂₈En Kesets mayster woo too waar hot ti tiskusioon keheyert. Hot kesiin tas Yeesus en kuut antwort kep hat un tesweche hot eyer kefroot:

— Was is te importanteste kepoote fon se al?

₂₉Yeesus antwort tëm:

— Te haupste is: “Heyer, oh, Israël! Te Hër, unser Hërkot, is te eensichste Hër! ₃₀Liip te Hër, tayne Kot, mit tayn kans hërts, mit tayn kans seel, mit tayne kanse ferxtant un mit tayn kans kraft.” ₃₁Un te tswete is tee: “Liip ti anere wii tuu tich selepst liipst.” Es kept khee anere kepoote kreeser wii tii tswaay.

₃₂Tan saat te Kesets mayster fer Yeesus:

— Kuut, Mayster! Tuu host ti woerheet kesaat. Tee is te eensichste Hërkot, un es kept khee anere sonst Tee. ₃₃Meyer mise Hërkot liipe mit unser kans hërts, mit unser kanse ferxtant un mit unser kans kraft un mise aach ti anere liipe wii uns selepst. Wayl is peser tii tswaay kepoote noo keen als fii pringe fer ferprënt kewe uf em altar ore anere opfere fer Hërkot mache.

₃₄Yeesus hot kesiin tas te Kesets mayster mit wisheet keantwort hot un saat:

— Tuu pist net wayt fom Hërkots Raych.

Too truf, hot nimant mee koraaj kehat fer noch etwas fer Yeesus se frooe.

₃₅Wan Yeesus am unterichte waar uf em hoof fom Thëmpel, hot eyer kefroot:

— Wii khëne ti Kesets mayster saan tas te Kristus nookhomer fon Dawii is? ₃₆Dawii, inspireyert fom Hayliche Kayst, hot kexrip:

Un en kroos folek hot em froo aan keheyert. ₃₈Un, am unterichte saat Eyer fer tas folek:

— Past uf mit te Kesets mayster! Ti keen kërn hiin un heyer mit lang tsaych, un kewe kërn mit rexpekt pekriist uf te prase. ₃₉Un sich kërn fone hiin setse in te sinakooke un uf ti eyerxte plets uf en panket. ₄₀Tuun ti witfraae eksploreere un xteele tëne iire raychtum; un, fer tas se justifikeere, mache se lange kepeete. Soo, te xtroof woo tii mit mache mise is noch xlimer!

₄₁Yeesus waar uf em hoof fom Thëmpel, ticht an te opfer khaste am sitse, mit acht ti layt aan am kuke woo kelt too rin am tuun waare. Fiil rayche waare fiil kelt am kewe. ₄₂Tan is en aarem witfraa aan khom un hot tswaay kleene nikelcher woo weenich weyert hate in te khaste ketuun. ₄₃Tan hot Yeesus ti tisiple keruuf un saat:

— Ich fersichere aych tas tas woer is: tii witfraa hot mee kep wii ti anere al. ₄₄Wayl ti anere hon kep fon was tëne iwerich waar. Tii, awer, woo soo aarem is, hot kep ales was se hat fer se leewe.