Markus 11

₁Wii Yeesus un ti tisiple in Yeruusalëm aan am khome waare, sin se pis an te Oliiwe përich kang, woo ticht an te wile fon Petfajë un Petanye playpt. Tan hot Yeesus tswaay tisiple foer kexikt, ₂mit tee ortnung:

— Keet pis an ti wile woo too foer traan playpt. Klaych wën teyer too aan khomt, tuut teyer en eeselche aan trëfe, woo noch nii kerit kep waar. Tuut tas ap pine un pringt em heyer. ₃Wën yemant frooe tuut warom teyer tas am mache sayt, saat tas te Mayster em prauch, awer wërt em klaych tsurik kewe.

₄Tii sin kang un hon tas eeselche uf te xtroos kefun, aan kepun ticht an te tier fon en haus. Wii se tas xtik fii am ap pine waare, ₅hon phaar layt woo too waare kefroot:

— Was sayt teyer am mache? Warom sayt teyer tas eeselche am ap pine?

₆Tii hon keantwort wii Yeesus kexikt hat, un tan hon ti layt kelos tas ti tisiple tas xtik fii mit kenom hon. ₇Tii hon tas eeselche fer Yeesus hiin kenom un hon sayn mantle iwer tas xtik fii ketuun. Klaych tëm noo, hot Yeesus sich truf kesetst. ₈Fiil layt hon sayn mantle ausnaner keleet uf te xtroos. ₉Tii woo foer traan am keen waare soo wii tii woo hine noo am khome waare hon aankefang se xraaye:

₁₁Yeesus is in Yeruusalëm rin kang, is pis an te Thëmpel kang un hot ales runterom kekukt. Awer, wii es xon xpeet waar, is eyer noo te wile fon Petanye kang mit te tswelef tisiple.

₁₂Am anere taach, wii se tsurik am khome waare fon Petanye, hot Yeesus hunger kriit. ₁₃Hot fon waytem en fayche xtok fol pleter kesiin un is pis tort hiin kang fer se kuke op fayche traan waare. Wii eyer ticht khom is, hot eyer ploos pleter aan ketrof wayl es khee tsayt waar fer fayche fruchte. ₁₄Tan saat eyer fer te fayche xtok:

— Tas nii mee yemant fon tayn fruchte ese tuut!

Un sayn tisiple hon tas keheyert.

₁₅Wii Yeesus un sayn tisiple in Yeruusalëm aan khom sin, is eyer am hoof fom Thëmpel rin kang un hot aankefeng raus se xtoose al tii woo tings am khaafe ore am ferkhaafe waare uf tëm plats. Hot ti tixe fon tëne woo tas kelt kewekselt hon rom kextilept un ti xtiil fon tëne woo taupe am ferkhaafe waare. ₁₆Un hot nimant woo etwas am traan waar kelos te hoof fom Thëmpel iwer keen. ₁₇Un eyer hot se al soo keuntericht:

— In te Hayliche Xrifte is kexrip tas Hërkot tas kesaat hot: “Mayn haus kept ‘Kepeets Haus’ kenënt fer aler foleke.” Awer teyer het tas in en pantite ferxtek transformeyert.

₁₈Ti xëfe fon te priister un ti Kesets mayster hon tas keheyert un hon aankefang en aart se suuche fer Yeesus um se pringe. Awer, hate pang fon iim, wayl tas folek hot tëm sayn unterichte pewunert.

₁₉Foer nacht, sin Yeesus un sayn tisiple aus te xtat kang.

₂₀Am anere taach, moynts kans frii, sin Yeesus un sayn tisiple ticht am fayche xtok langst kang un hon kesiin tas te xtok troke waar fon te wortsel aan ruf. ₂₁Tan, hot Pheeter traan ketënkt was paseyert waar un saat fer Yeesus:

— Kuk, Mayster! Te fayche xtok woos tuu ferfluucht hast is ketrokent.

₂₂Yeesus hot keantwort:

— Klaapt an Hërkot. ₂₃Ich fersichere aych tas tas woer is: teyer khënt fer tee përich saan: “Xtay uf un xmays tich ins meer.” Wën teyer net tswayfle tuut in ayer hërts, awer klaawe tuut tas paseere tuut was teyer kesaat het, tan wërt tas kemach. ₂₄Tesweche fersichere ich aych: wën teyer peete tuut un etwas ferlange tuut, klaapt tas teyer tas xon kriit het, un soo wërt ales aych kep. ₂₅Un, wën teyer am peete sayt, fertsayert tii woo aych pelayticht hon, tas ayre Fater, woo im himel is, ayre pelaytichunge fertsaye tuut. ₂₆[Wën teyer net ti anere fertsaye tuut, tuut ayre Fater, woo im himel is, aach net ayre pelaytichunge fertsaye.]

₂₇Tëm noo sin se tsurik noo Yeruusalëm kang. Wii Yeesus uf em hoof fom Thëmpel am keen waar, sin ti xëfe fon te priister, ti Kesets mayster un ti fiirer fon te yute woo too waare ticht pay iim khom ₂₈un hon kefroot:

— Mit was fer autoriteet machst tuu tas tings? Weyer hot tich autoriteet kep fer tas se mache?

₂₉Yeesus hot keantwort:

— Ich tuun aach etwas fer aych frooe. Wën teyer mich ti richtich antwort kept, saan ich mit was fer autoriteet ich tas tings mache. ₃₀Saat meyer: weyer hot autoriteet kep fer Yohan fer se taafe? Waar tas Hërkot ore waare tas ti mënxe?

₃₁Tan hon se aankefang se saan ëne fer te anere:

— Wën meyer saan tas es Hërkot waar, tuut te frooe: “Tan, warom het teyer net an Yohan keklaapt?” ₃₂Awer, wën meyer saan tas es ti mënxe waare, ay fon uns!

Tii hate pang fom folek, wayl al hon keklaapt tas Yohan wërklich en profët waar. ₃₃Tesweche hon se keantwort:

— Meyer wise net.

Yeesus saat:

— Tan saan ich aach net mit was fer autoriteet ich tas tings mache!