Lukas 1

₁Liiwe Theoofilus,

Fiil layt hon xon fersuucht xraywe iwer ales was unich uns paseyert is. ₂Ti hon kexrip was fertseelt kep is fon tëne woo tas tings fom aanfank aan kesiin hon un te ewankeelium pekhant kemach hon. ₃Soo, hon ich tas ales thip-thop xtuteyert wii tas tings ales paseyert is fom aanfank aan un hon kemënt tas weyer kuut ales in ortnung xraywe fer tich ₄tas teyer ti kans woerheet wise khënt iwer ales was tich kelërnt kep is.

₅Wan Herootes te kheenich fon Israël waar, waar tort en priister woo Sakariias keheest hat, woo fom Apiias sayn priister krup waar. Sayn fraa hot Isabel keheest un waar tochter fon en priister familye. ₆Tee phaar hot es leewe keleept soo wii es fer Hërkot richtich waar, un hon em Hër sayn kesetse un kepoote kenau in kehal. ₇Awer tii hate khee khiner wayl Isabel khee khiner kriin khont un wayl tii tswaay xon tsu alt waare.

₈En taach, im Thëmpel fon Yeruusalëm, waar Sakariias sayn priister aarwat am mache, wayl eyer an te ray waar fer tii taachlich aarwat se mache. ₉Als priister kewoonheet, waar eyer raus kesuucht kep fer te wayrauch se ferprëne am altar un tesweche is er im Hër sayn Thëmpel rin kang. ₁₀Soo lang wii te wayrauch am prëne waar, hot tas folek traus kepeet. ₁₁Too is en Kotes ëngel em Sakariias tsum foer xayn khom, woo uf te rechts sayt fom altar kextan hat. ₁₂Wan Sakariias em kesiin hot, hot eyer pang kriit un wust net was eyer mache solt. ₁₃Awer te ëngel saat:

— Prauchst khee pang hon, Sakariias, wayl Hërkot hot tayn kepeet keheyert! Tayn fraa kriit en khint, un tuu tuust em Yohan nëne. ₁₄Tëm sayn kepoer pringt frayt un klik fer tich un fer fiile layt, ₁₅wayl fer Hërkot kept tee en importante man. Tee sol khee wayn trinke un khee pier. Fom muter layp aan wërt eyer xon fol sin fom Hayliche Kayst ₁₆un nëmt fiil israelite pis an te Hërkot fon Israël. ₁₇Hërkot xikt em fer kuute naychkheete pringe un wërt xtarek un kreftich wii te profët Eliias. Tee macht tas ti eltre un ti khiner noch mool eenich kewe un tas tii woo net heere wole noch mool tsurik an te richtiche weech keen. Te kriit tas folek fon Israël prepareyert fer wën te Hër khome sol.

₁₈Tan hot Sakariias fer te ëngel kefroot:

— Wii khan ich wise op tas woer is? Ich sin xon fiil tsu alt, un mayn fraa aach.

₁₉Te ëngel hot keantwort:

— Ich sin Gabriel, Hërkots tiiner, un tee hot mich kexikt fer mit tich se xpreche fer tii kuut orter kewe. ₂₀Tuu pist es net am klaawe was ich tich saan, awer tas paseyert an te richtich tsayt. Un, wayls tuu es net keklaapt host, wërst tuu xtimloos un khanst net xpreche pis tayn khint uf ti welt khomt.

₂₁Tas folek waar Sakariias am waarte, un hon sich al ferwunert mit te lang tsayt woo eyer im Thëmpel keplip is. ₂₂Wan Sakariias raus kang is, khont eyer net xpreche. Too hon se kemërekt tas eyer en erxaynung hat im Thëmpel. Tee hot em folek ketsaycht mit te hënt, awer khont net xpreche.

₂₃Wan sayn aarwat tsayt im Thëmpel rom waar, is Sakariias noch mool hëm kang. ₂₄En khorts tsayt tëm noo, waar sayn fraa Isabel en khint am waarte, un is finef moonate lang net tehëm raus kang. Un hot kesaat:

₂₅— Yets woo te Hër mich keholef hot, khan nimant mee mich unich ti fiis hoole wayl ich khee khiner hon.

₂₆Wan Isabel am sekste moonat es khint am waarte waar, hot Hërkot te ëngel Gabriel an en xtat fon te Kalilëya kexikt woo Nasarëë heest. ₂₇Te ëngel hot en orter kenom fer en yung meete woo hochtsayt kontrateyert hat mit en man woo Yoosef keheest hat, un waar nookhomer fon Dawii. Sii hot Maria keheest. ₂₈Te ëngel is khom un saat:

— Tas te friite mit tich sich ferhalt, Maria! Tuu pist mechtich keseechent. Te Hër is mit tich. ₂₉Awer Maria, wii es keheyert hot was te ëngel kesaat hat, wust nime was es tënke solt. Un, erxtaunt, hots triwer noo ketënkt an was te ëngel saan wolt. ₃₀Too hot te ëngel wayter kesaat:

— Khee pang hon, Maria! Hërkot is froo mit tich. ₃₁Tuu kriist en puupche un tuust em Yeesus nëne. ₃₂Tee kept en importante man un wërt Soon fom Heechste Kot kenënt. Hërkot macht em kheenich, wii sayne foerkhomer, te kheenich Dawii. ₃₃Tee wërt fer imer kheenich sin fon te nookhomer fon Yaakop, un tëm sayne Raych kriit nii khee ën.

₃₄Tan hot Maria fer te ëngel kesaat:

— Tas is net meechlich, wayl ich hon noch nii mit en man kexloof!

₃₅Te ëngel hot keantwort:

— Te Hayliche Kayst wërt iwich tich khome, un em Heechste Kot sayn kraft filt tich fol. Tesweche wërt tas khint Haylich un Kotes Soon kenënt. ₃₆Isabel, tayn ferwant, is aach en khint am waarte, mit te kans elter woo se hot. Al hon kesaat tas khënt khee khiner kriin, awer yets is es xon am sekste moonat am waarte. ₃₇Wayl fer Hërkot is niks unmeechlich.

₃₈Maria hot keantwort:

— Ich sin en Hërkots tiiner; tas mit mich paseyert was tuu mich kraat kesaat host!

₃₉Phaar taache tëm noo, hot Maria sich fërtich kemach un is xnel noo en xtat kang woo in te përiche rechioon waar fon te Yutëya. ₄₀Is in Sakariias sayn haus rin kang un hot Isabel pekriist. ₄₁Wan Isabel te Maria sayn pekriisung kehëyert hot, hot tas khint sich peweecht in sayne layp. Too, mit te kraft fom Hayliche Kayst, ₄₂hot Isabel in hart xtim kesaat:

— Tuu pist ti keseechenst fon te kanse fraae, un tas khint woos tuu kriist is aach keseechent! ₄₃Weyer sin ich, tas mayne Hër sayn moter mich pesuuche khomt?! ₄₄Wan tuu mich pekriist host, is tas khint froo kep un hot sich peweecht in mayne layp. ₄₅Tuu pist keseechent, wayl tuu klaapst tas paseyert was Hërkot tich kesaat hot.

₄₆Tan saat Maria:

₅₆Maria is unkefeyer tray moonate pay Isabel keplip un tëm noo is es noch mool tsurik noo hëm kang.

₅₇Ti tsayt is khom fer Isabel sayn khint kriin, un tas hot en puupche kriit. ₅₈Ti nachparx layt un ti ferwante hon keheyert xpreche fom Hërkot sayn kroos kuutheet mit Isabel, un sin al froo kep too temit. ₅₉Wan tas puupche acht taache alt waar sin se em pexnayte khom un wolte tëm em papa sayne naame kewe, Sakariias. ₆₀Awer sayn mama saat:

— Nee. Tëm sayn naame sol Yohan sin.

₆₁Too hon se kesaat:

— Awer tuu host toch khee parënt mit tëm naame!

₆₂Too, mit tsayche, hon se em papa kefroot was fer naame tee wolt hon fer tas khint. ₆₃Sakariias hot en xrayp thaafel ferlangt un hot kexrip: “Tëm sayne naame is Yohan.” Un tii hon sich al ferwunert. ₆₄Im selwiche momënt khont Sakariias noch mool xpreche un hot aankefang Hërkot se loope. ₆₅Tii nachparx layt hon sich fiil ferwunert, un in te kans përich rechioon fon Yutëya hon tii layt kexproch iwer tas woo paseyert is. ₆₆All tii woo tas keheyert hon, hon too triwer noo ketënkt un hon kefroot:

— Was meecht tas puupche kewe?

Wayl, tas is sicher tas em Hër sayn kraft mit em waar.

₆₇Sakariias, em Yohan sayne fater, kefilt mit em Kotes Kayst, hot aankefang se profetiseere. Tee saat:

₆₈— Meyer loope te Hër, Kot fon Israël,

₈₀Tas puupche is kewakst un is kayst kreftich kep. Un hot im tesërt keleept pis te taach woo eyer foer khom is fer tas folek fon Israël.