Lukas 2

₁In tëne tsayte, hot te Khayser Aukust en ortnung kexikt fer ti kanse foleke fom Khayser Raych. Ti kanse layt muste sich rejistreere tas en tseelung fom folek kemach keept. ₂Wan ti eyerxt folek tseelung kemach kep is, waar Sireenio te kowerneyer fon Siiria. ₃Tan sin se al sich rejistreere kang, yeete ëne in sayn aychne xtat.

₄Tesweche is Yoosef fon Nasarëë, in Kalilëya, pis ti rechioon fon Yutëya kang, an en xtat woo Petleheem heest, woo te kheenich Dawii kepoer waar. Yoosef is sich tort rejistreere kang wayl eyer apxtam fon Dawii waar. ₅Hot Maria, mit weem er hochtsayt pextimt hat, mit kehool, un sii waar en khint am waarte, ₆un, is paseyert tas, soo lang wii se in Petleheem waare, ti tsayt khom is fer tas khint uf ti welt se khome. ₇Tan, hot Maria sayn eyerxt khint uf ti welt keprung. Hot tas puupche in lumpe in kewikelt un hot em in en fres khump keleet, wayl khee plats waar fer tii in khee pensioon.

₈In tee rechioon waare xeefer woo iwer nacht uf em khamp keplip sin, ti xeef am uf pase. ₉Tan is em Hërkot sayne ëngel tsum foerxayn khom, un em Hër sayn kloor licht hot iwich ti xeefer kexaynt. Tii hon fiil pang kriit, ₁₀awer te ëngel saat:

— Praycht khee pang hon! Ich sin too fer aych en kuut naychkheet pringe, un tii sol uersach sin fer en kroos frayt unich em kanse folek! ₁₁Hayt, in te xtat fon Dawii, is ayre Reter kepoer kep — te Kristus, te Hër! ₁₂Tas is ti pewaysung: teyer fint en kleen khint in lumpe in kewikelt, woo in en fres khump layt.

₁₃Im selwiche momënt sin fiil ëngle tsum foerxayn khom, pay tëm ëngel, wii wën es en himlixe militeyer weyer. Ti waare loop liiter fer Hërkot am singe, am saan:

₁₅Wan ti ëngle tsurik noo em himel sin, hon ti xeefer ëne tsum anere kesaat:

— Meyer keen noo Petleheem fer se wise kriin was tort paseyert is; meyer keen kuke was te Hër uns kesaat hot.

₁₆Ti sin xnel kang, un hon Maria un Yoosef kefun, un hon tas puupche im fres khump laye kesiin. ₁₇Tan hon se fertseelt was ti ëngle kesaat hate iwich tee. ₁₈Al tii woo aan keheyert hon was ti xeefer kesaat hon, hon sich fiil ferwunert. ₁₉Maria hot tas tings ales in sayn hërts uf kehoop un hot sich oft too triwer iwerleet. ₂₀Tan, sin ti xeefer tsurik uf te khamp kang, loop kesang fer te Hërkot am singe weche ales was se keheyert un kesiin hate.

Un ales waar paseyert wii te ëngel es aus kexproch hat.

₂₁En woch tëm noo, wan te taach fer tas khint sayn pexnaytung khom is, hon se tëm te naame Yeesus kep. Wayl te ëngel hat tee naame fer tas khint kep kehat eep es uf ti welt khom is.

₂₂Te taach fer Maria un Yoosef ti serimonii fon te raynichung in hale is khom, soo wii Mooses sayn kesets es xikt. Tan hon se es khint pis Yeruusalëm kenom fer es fer te Hër presenteere. ₂₃Wayl is kexrip im Hër sayn kesets: “Aler eyerxt khint wërt separeyert un fer te Hër hiin kep”. ₂₄Tii sin aach tort hiin kang fer tswaay tutel taypcher ore taupe se opfere, wii em Hër sayn kesets es xikt.

₂₅In Yeruusalëm hot en man kewoont woo Simeon kenënt waar. Eyer waar en kuute un frome man, un waar ti retung fer es israelite folek am waarte. Te Hayliche Kayst waar pay em, ₂₆un te aychne Kayst hot tëm ferxproch kehat tas, eep er xtërwe teet, teet er te Kristus siin. ₂₇Fom Kayst kefiert, is Simeon pis an te thëmpel kang. Wan ti eltre tas Yeesus Khint pis an te Thëmpel kenom hon fer se mache was ti kesets xikt, ₂₈hot Simeon tas khint in ti aarme kehool un hot Hërkot keloopt. Eyer saat:

₃₃Em puupche sayne fater un moter hon sich ferwunert mit was Simeon iwich es puupche saat. ₃₄Simeon hot se keseechent un saat fer Maria, Yeesus sayn mama:

— Tas puupche is fon Hërkot aus kesuucht kep soo fiil fer ti ruiniirung soo wii fer ti retung fon fiile layt in Israël. Tee wërt em Hërkot sayne sinaal sin; fiile layt wëre keeche tee xpreche, ₃₅un soo wëre tëne sayn ferxtekelte ketanke pekhant. Un, Maria, ti traurickheet, wii en xaref xwaart, wërt tayn hërts ferxnayte.

₃₆Too waar aach en profëtin, woo Ana kenënt waar, woo witfraa waar un aarich alt. Tii waar tochter fon Fanuel, apxtam fon Aser. Siwe yoer noo sayn hochtsayt, is sayne man kextorep. ₃₇Yets waar se fier un achtsich yoer alt. Sii is nii foer em Thëmpel wech kang un hot Hërkot taache un nacht keloopt, am faste un am peete. ₃₈In tëm momënt is se aan khom un hot aankefang Hërkot se loope un iwich es puupche se xpreche fer al tii woo Yeruusalëm sayn pefrayung am waarte waare.

₃₉Wan se ales fërtich kemach hate was em Hër sayn kesets xikt, sin Yoosef un Maria tsurik kang noo Kalilëya, pis in ti xtat Nasarëë.

₄₀Tas puupche is kewakst un is imer xtërker kep, hat fiil wisheet kehat un waar fom Hërkot keseechent.

₄₁Yeetes yoer sin Yeesus sayn eltre noo Yeruusalëm kang fer es Oostre Fest. ₄₂Wan Yeesus tswelef yoer alt waar, sin se uf es Fest kang, wii sayn kewoonheet waar. ₄₃Noo em Fest, hon se ti rees tsurik noo hëm aankefang. Awer Yeesus waar in Yeruusalëm keplip, un sayn eltre wuste tas net. ₄₄Tii tachte tas Yeesus pay en krup fon layt weyer woo tsurik am reese waar un tesweche sin se te kanse taach kereest. Tan hon se aankefang em se suuche unich te ferwante un froynte. ₄₅Wii se em net kefun hon, sin se tsurik noo Yeruusalëm kang fer em se suuche. ₄₆Tray taache tëm noo hon se em kefun in ëne fon te hoofe fom Thëmpel, tswixich te kesets mayster am sitse, tëne aan am heere un am aus frooe. ₄₇Al tii woo em am aan heere waare, waare fiil ferwunert mit sayn wisheet un mit te antworte woo eyer kept hot. ₄₈Wan sayn eltre em kesiin hon, hon se sich aach ferwunert. Un ti mama saat tëm:

— Mayn khint, warom host tuu tas mit uns kemach? Tayne fater un ich waare tich pekhimert am suuche.

₄₉Yeesus antwort:

— Warom waart teyer mich am suuche? Wust teyer net tas ich in mayne Fater sayn haus must sin?

₅₀Awer tii hon net ferxtan was eyer saat.

₅₁Tan is Yeesus tsurik noo Nasarëë kang mit sayn eltre un hot tëne wayter aan keheyert. Un sayn mama hot tas ales in sayn hërts uf kehoop.

₅₂Soo wii er in kreest kewakst is, is Yeesus aach in wisheet kewakst, un soo wii Hërkot hon aach ti layt en imer mee keliipt.