Mateus 26

₁Wii Yeesus fërtich waar mit tëm tings se unterichte, saat eyer fer ti tisiple:

₂— Teyer wist tas in tswaay taache kept tas Oostre Fest kefayert, un te Soon fom Man wërt ap kep fer pekraytst se kewe.

₃Tiëm noo hon ti xëfe fon te priister un ti yute fiirer sich fersamelt im palas fon Kayfaas, te Kroose Priister, ₄un hon en plaan kemach fer Yeesus heelich fange un em umpringe. ₅Ti waare am saan:

— Meyer mache tas net iwer em fest, tas es khee rewolte kept unich em folek.

₆Yeesus waar uf em plats woo Petanye kenënt waar, in Simon, te lepra kranke sayn haus. ₇Too, wii se am tix kesetst hon, is en fraa ticht pay Yeesus khom mit en klaas woo fon alapastro kemach waar, fol mit en aariche tayre parfum, un hot te parfum uf tëm sayne khop kexut. ₈Wii se tas kesiin hon, sin ti tisiple pees kep un hon kesaat:

— Was en fertsotleray! ₉Tee parfum khënt ferkhaaft kep sin fer en kuute prays, un tas kelt khënt fer ti aarme kep sin.

₁₀Awer, Yeesus, am wise was ti am saan waare, saat:

— Warom tuut teyer ti fraa xteere? Ti hot etwas kans kuutes fer mich kemach. ₁₁Wayl ti aarme sin fer imer pay aych, awer ich net. ₁₂Was tii kemach hot, is mayne khërwer parfumeere fer mayn peërtichung. ₁₃Ich fersichere aych tas tas woer is: uf yeete plats fon te welt woo te ewankeelium aan kesaat kept, kept fertseelt was tii kemach hot, un tii wërt erinert.

₁₄Tan is eene fon te tswelef tisiple, woo Yuutas Iskariotes kenënt waar, mit te xëfe fon te priister xpreche kang. ₁₅Eyer saat:

— Was petsaalt teyer mich tas ich Yeesus aych ap kewe?

Un tii hon tëm traysich silwerne nikle petsaalt.

₁₆Un fon too aan foran hot Yuutas en keleechenheet kesuucht fer Yeesus ap se kewe.

₁₇Am eyerxte taach fom Fest fom Proot oone Heep, sin ti tisiple ticht pay Yeesus khom un hon kefroot:

— Woo wolt teyer hon tas meyer tas Oostre Nachts Ese fer aych prepareere?

₁₈Tee hot keantwort:

— Keet pis in ti xtat, suucht seliche man uf un saat: “Te Mayster xikt saan: Mayn xtun is khom. Mayn tisiple un ich tuun ti Oostre fayre in tayn haus.”

₁₉Ti tisiple hon kemach wii Yeesus kexikt hat un hon tas Oostre nachts ese prepareyert.

₂₀Wii es nacht kep is, hon Yeesus un ti tswelef tisiple sich aan kesetst fer se ese. ₂₁Iwer tas nachts ese, saat Yeesus:

— Ich fersichere aych tas tas woer is: eene fon aych tuut mich hinerkeen.

₂₂Ti sin aarich traurich kep un, eene noo em anere, hon aankefang se frooe:

— Teyer tënkt net tas es ich sin, kël?

₂₃Yeesus antwort:

— Weyer mich hinerkeen tuut, is tee woo mit mich im selwiche teler tas proot thunkt. ₂₄Wayl te Soon fom Man tuut xtërwe wii ti Hayliche Xrifte saan; awer owee fon tëm woo te Soon fom Man am hinerkeen is. Es weyer peser fer iim tas eyer nii uf ti welt khom weyer.

₂₅Tan, hot Yuutas, te woo Yeesus hinerkeen teet, kefroot:

— Mayster, teyer sayt net am tënke tas es ich sin, kël?

Yeesus hot keantwort:

— Weyer tas am saan is pist tuu selepst.

₂₆Soo lang wii se am ese waare, hot Yeesus es proot kehool un hot Hërkot ketankt. Tëm noo, hot eyer tas proot keteelt un hot tas fer ti tisiple kep, am saan:

— Hoolt un est; tas is mayne khërwer.

₂₇Klaych tëm noo, hot eyer te wayn khelich kehool un Hërkot ketankt. Tan hot eyer te khelich fer ti tisiple hiin kelangt un saat:

— Trinkt teyer al ₂₈wayl tas is mayn pluut, woo ferxut kept fer fiile fer ti sinte fertsaye; tas pluut woo ti alians fersichert woo Hërkot kemach hot mit sayn folek. ₂₉Ich fersichere aych tas ich nii mee fon tëm wayn trinke tuun pis an te taach woo ich mit aych en naye wayn trinke in mayn Fater sayne Raych.

₃₀Tan hon se loop liiter kesung un sin uf te Oliiwe Përich kang.

₃₁Un Yeesus saat fer ti tisiple:

— Tii nacht tuut teyer al ausrayse un mich in xtich loose, wayl ti Hayliche Xrifte saan: “Ich tuun te xeefer umpringe, un ti xeef kewe ferxtraut.” ₃₂Awer, wën ich xon noch mool peleept kep sin, keen ich foer aych pis Kalilëya.

₃₃Tan saat Pheeter fer Yeesus:

— Ich tuun aych nii in xtich lose, wën ach ti anere al tich in xtich lose.

₃₄Awer, Yeesus saat iim:

— Ich fersichere tich tas tas woer is: hayt ooment, eep te haan kreye tuut, tuust tuu tray mool saan tas tuu mich net khëne tuust.

₃₅Pheeter hot keantwort:

— Ich tuun nii saan tas ich tich net khëne, wën ich ach xtërwe mus mit aych!

Un ti anere tisiple hon tas selwiche kesaat.

₃₆Yeesus is mit te tisiple uf en plats kang woo Ketseemani kenënt waar un saat tëne:

— Setst aych too hiin, soo lang wii ich too neewe hiin keen fer se peete.

₃₇Tan is Yeesus kang, un hot Pheeter un ti tswaay puuwe fon Zebedeu mit kenom. Too hot eyer aankefang en kroos traurichkheet se xpiire un is petriip kep ₃₈un saat tëne:

— Ti traurichkheet woo ich am xpiire sin is soo kroos, tas tii mich umpringe khan. Playpt hier mit mich am wache.

₃₉Eyer is en pisye foran kang, hot sich kekniit, hot sayn kesicht pis uf te potem ketuun un hot kepeet:

— Mayne Fater, wën tas meechlich is, tuu tee laytungs khelich wech fon mich! Awer, tas net kemach kept was ich wil, sonst was tuu wilst.

₄₀Tëm noo, is eyer tsurik un hot ti tray tisiple am xloofe ketrof. Tan saat eyer fer Pheeter:

— Meecht teyer net mool een xtun mit mich wache khëne? ₄₁Tuut wache un peet tas teyer net keproopt kept. Is laycht wole ti fersuuchung aus hale; was wërklich xwiirich is, is tas kemach kriin.

₄₂Tsum tswete mool is Yeesus kang un hot kepeet, am saan:

— Mayne Fater: wën tee laytungs khelich net khan wech fon mich ketuun kewe oone tas ich em trinke tuun, tan tas tayne wile kemach kept.

₄₃Eyer is noch mool tsurik kang un hot ti tisiple noch mool am xloofe ketrof. Ti hate xloof un khonte net ti aue uf pehale.

₄₄Yeesus is noch mool fon tëne wech kang un hot tsum trite mool kepeet, ti selwiche wërter am saan. ₄₅Tan is eyer tsurik kang pis woo ti tisiple waare un hot kefroot:

— Sayt teyer imer noch am xloofe un am ruue? Kukt! Ti uertsayt is khom, un te Soon fom Man is ap am kewe sin in te hënt fon te sintiche layt. ₄₆Xtayt uf, un meyer keen fort. Kukt! Too is am khome te man woo mich am hinerkeen is!

₄₇Yeesus waar noch am xpreche, wii Yuutas aan khom is, ëne fon te tswelef tisiple. Mit tëm waar en kroos folek am khome, ti hënt fol xwaarte un kniple, woo kexikt kep waar fon te xëfe fon te priister un te yute fiirer. ₄₈Tee woo Yeesus am hinerkeen waar hat en sinaal ap kemach kehat mit tëne. Tee hot kesaat kehat: “Fangt te man woo ich en khus kewe, wayl tas is eyer.” ₄₉Yuutas is ticht pay Yeesus kang un saat:

— Mayster, tas te friite mit aych playpt!

Un hot em kekhust. ₅₀Yeesus hot keantwort:

— Froynt, was tuu mache tuust, mach es yets.

Tan sin se khom, hon Yeesus kefang un hon em aan kepun. ₅₁Awer, ëne fon tëne woo too pay Yeesus waar hot ti xwaart raus ketsoo, hot en knecht fom Kroose Priister iwerfal un hot tëm en oer ap kehakt. ₅₂Tan saat Yeesus:

— Tuu tayn xwaart wech, wayl weyer en xwaart penutst khomt um torich en xwaart. ₅₃Weest tuu net tas, wën ich hilef ferlange teet fer mayne Fater, teet eyer kraat yets tswelef militeere fon ëngle mich xike? ₅₄Awer, in tëm fal, wii khënt sich in hale tas was ti Hayliche Xrifte saan tas paseere mus?

₅₅Tëm noo saat Yeesus fer tas folek:

— Teyer khomt mit xwaarte un kniple fer mich se fange wii wën ich en pantit weyer? Ich waar yeete taach am unterichte uf em hoof fom Thëmpel, un teyer het mich net kefang. ₅₆Awer tas ales is am paseere tas sich in hale tuut was ti profëte kexrip hon in te Hayliche Xrifte.

Tan hon ti tisiple al Yeesus in xtich kelos un sin aus keris.

₅₇Ti mëner woo Yeesus kefang hon, hon em pis am Kroose Priister Kaifaas kenom, woo phaar Kesets mayster un phaar yute fiirer fersamelt waare. ₅₈Pheeter is Yeesus noo kang fon waytem pis an te hoof fom Kroose Priister sayn haus. Is rin kang un hot sich kesetst mit te soltaate fer se wise wii tas ans ën kheemt.

₅₉Ti xëfe fon te priister un te kanse Heechste Konseel waare en falx pexultichung am suuche keeche Yeesus fer em tsum toot konteneere. ₆₀Awer khonte niks keeche iim fine, wën ach fiil uf kextii sin fer liye se saan iwer iim. Tsum xlus, hon tswaay mëner sich presenteyert ₆₁un hon kesaat:

— Tee man hot fersichert: “Ich khan em Hërkot sayne Thëmpel fernichte un noch mool uf paue in tray taache.”

₆₂Tan is te Hooche Priister uf kextii un hot fer Yeesus kefroot:

— Tuust tuu tich net tefenteere fon tee pexultichung?

₆₃Awer Yeesus hot sich ruich kehal. Tan hot te Hooche Priister noch mool kefroot:

— Im naame fom leewente Hërkot, ich ferlange tas tuu uns saast: pist tuu te Kristus, te Soon fom Hërkot?

₆₄Yeesus hot keantwort:

— Weyer tas am saan is sayt teyer. Awer ich fersichere fer aych tas fon yets aan foran siit teyer te Soon fom Man uf te rechts sayt fom Aler Mechtiche Hërkot sitse un fon te wolke am himel runer am khome!

₆₅Tan hot te Hooche Priister sayn aychent klaytung faris un saat:

— Tee hot plasfeeme aus kexproch! Meyer prayche khee tsayer mee! Teyer het yets kraat tii plasfeem keeche Hërkot keheyert! ₆₆Tan, was resolweyert teyer?

Tii hon keantwort:

— Eyer is xultner un mus xtërwe!

₆₇Klaych tëm noo hon se Yeesus ins kesicht kexpukt un hon em ferpokst. Un tii woo em am ferxlaan waare, ₆₈waare am saan:

— Ey, Kristus, root mool fer uns weyer tich ferxlaa hot!

₆₉Pheeter hot raus uf em hoof kesitst, wii een fon te maate ticht pay em khom is un saat:

— Tuu waarst aach mit Yeesus fon Kalilëya.

₇₀Awer eyer hot ap kesaat foer te kanse layt, am saan:

— Ich wees net fon was tuu am xpreche pist.

₇₁Tëm noo is eyer pis an te inkang fom hoof kang. En aner maat hot em kesiin un saat fer ti layt woo too waare:

— Tee waar mit Yeesus fon Nasarëë.

₇₂Pheeter hot noch mool ap kesaat, am antworte:

— Ich xwoore tas ich tee man net khëne!

₇₃Klaych tëm noo, tii woo too waare sin ticht pay Pheeter khom un hon kesaat:

— Ti aart wii tuu xprechst feroot tas, wërklich, tas tuu aach ëne fon tëne pist.

₇₄Tan saat Pheeter:

— Ich xwoore tas ich tee man net khëne! Tas Hërkot mich xtroofe sol wën ich net ti woerheet am saan sin!

In tëm momënt hot te haan kekreet, ₇₅un Pheeter hot traan ketënkt an was Yeesus kesaat hat: “Eep te haan kreye tuut, saast tuu tray mool tas tuu mich net khëne tuust.” Tan is Pheeter fon too wech kang un hot pitere treene keprilt.