Mateus 27

₁Soo wii es taach kep is, hon ti priister sayn xëfe un ti yute fiirer sayn pleen kemach tas Yeesus umkeprung keept. ₂Tii hon em aan kepun, hon em kenom un hon em ap kep fer te kowerneyer Pilatos.

₃Wii Yuutas, tee woo Yeesus hinerkang hot, kesiin hot tas Yeesus konteneyert kep waar, hot iim te remors kexteyert un is ti traysich silwerne nikle tsurik kewe kang fer ti xëfe fon te priister un fer ti yute fiirer, ₄am saan:

— Ich hon sinte kemach, en unxultiche man tsum toot am ap kewe.

Tii hon keantwort:

— Was hon meyer temit se tuun? Tas is tayne propleem.

₅Tan hot Yuutas tas kelt in te Thëmpel keworef un is fort kang. Tëm noo hot eyer sich uf kehonk.

₆Ti xëfe fon te priister hon tas kelt kehool un kesaat:

— Tas kelt is trekich mit pluut, un is keeche unser Kesets tas kelt in ti opfer khas fom Thëmpel se tuun.

₇Hon too triwer kereet, un hon resolweyert tas kelt penutse fer te “Let Khamp” khaafe, tas tas plats als friithoof tiine solt fer tii woo auslëner sin. ₈Tesweche is tee khamp pis hayt “Pluut Khamp” kenënt. ₉Soo is es paseyert was te profët Jeremiias kesaat hat: “Tii hon traysich silwerne nikle kehool, te prays woo tas folek fon Israël tefoer petsaalt hat, ₁₀un hon se penutst fer te let khamp se khaafe, wii te Hër mich kexikt hat se mache.”

₁₁Yeesus hot foer em Kowerneyer kextan, un tee hot iim aus kefroot, am saan:

— Pist tuu te kheenich fon te yute?

Yeesus hot keantwort:

— Weyer tas am saan is sayt teyer.

₁₂Awer, wii Yeesus aan kep waar fon te xëfe fon te priister un ti yute fiirer, hot Yeesus niks keantwort. ₁₃Tan saat Pilatos:

— Pist tuu net am heere was tii am saan sin keeche tich?

₁₄Awer Yeesus hot niks kesaat, un te Kowerneyer hot sich fiil too temit ferwunert.

₁₅Aler Oostre Fest, hat Pilatus ti kewoonheet ëne fon te kefangne loos lose, tëm noo em folek sayne ferlange. ₁₆In tee keleechenheet waar in katee en kans pekhante man, woo Barrabas kenënt waar. ₁₇Tan, wii tas kroos folek sich fersamelt hat, hot Pilatos kefroot:

— Weyer is tee woo ich loos lose sol: Barrabás ore Yeesus, woo Kristus kenënt kept?

₁₈Pilatos wust kans kuut tas ti yute fiirer Yeesus ap kep hate wayl se naytich waare iwer iim.

₁₉Soo lang wii Pilatus uf em kericht xtuul kesitst hot, hot sayn fraa tii oter kexikt:

— Tuu solst niks se tuun hon mit tëm unxultiche man, wayl tii nacht hat ich, in en traum, fiil layte mit kemach weche tëm.

₂₀Ti xëfe fon te priister un ti yute fiirer hon tas folek ferpapelt tas se ferlange solte tas te kowerneyer Pilatus Barrabás loos lose solt un Yeesus tsum toot konteneere teet. ₂₁Tan hot te Kowerneyer kefroot:

— Was fer fon tëne tswaay wolt teyer hon tas ich loos lose sol?

Tii hon keantwort:

— Barrabás!

₂₂Pilatus hot kefroot:

— Was mache ich tan mit Yeesus, tee woo Kristus kenënt kept?

Al hon keantwort:

— Pekrayts iim!

₂₃Eyer hot kefroot:

— Was fer xlechtes hot eyer ketuun?

Too hon se hat aan kefang se xraaye:

— Pekrayts iim!

₂₄Tan hot Pilatus kesiin tas er uf khee plats am khome waar un tas folek sich am rewolteere waar. Tan hot eyer kexikt solte waser pringe, hot sayn hënt kewex foer em folek un saat:

— Ich tuun net antworte fer te toot fon tëm man. Tas is mit aych.

₂₅Un tas kanse folek hot keantwort:

Tas te xtroof weche tëm toot iwer uns fale sol un iwer unser khiner!

₂₆Tan hot Pilatus Barrabás loos kelos, wii tii ferlangt hate. Tëm noo, hot eyer kexikt solte Yeesus ferpaytxe un hot em ap kep fer pekraytst kewe.

₂₇Tëm noo hon Pilatus sayn soltaate Yeesus noo em Palas fom Kowerneyer kenom un hon te kanse patalion um tëm rom fersamelt. ₂₈Hon Yeesus sayn tsaych aus ketuun un hon tëm en roote mantel um kehonk. ₂₉Hon en kroon kemach mit rangle fol mit tëner, un hon tas uf tëm sayne khop ketuun, un hon en xtok in sayn rechts hant ketuun. Too hon se aan kefang sich foer iim se kniye un se xpote, am saan:

— Lank leewe fer te Kheenich fon te Yute!

₃₀Hon iim ferxpukt, hon te xtok imer kehool un tëm uf te khop kehau. ₃₁Wii se iim ferxpot hate, hon se tëm te roote mantel ap ketuun un hon tëm sayn aychent tsaych aan ketsoo. Tëm noo hon se iim kenom fer pekraytst kewe.

₃₂Wii se raus am keen waare, hon ti soltaate en man aan ketrof woo Simon keheest hot, fon te xtat Cirene, un hon em ketswung Yeesus sayn krayts se traan. ₃₃Tan sin se aan khom an en plats woo Kolkota keheest hot. (Kolkota petayt “Kalwaario”). ₃₄Too hon se en mixung fon wayn un kal kep fer Yeesus se trinke. Awer, wii eyer tas kexmekt hat, wolt eyer tas net trinke. ₃₅Klaych tëm noo hon ti soltaate iim pekraytst un hon tëm sayn tsaych unich sich ferteelt, tas klik am aus xpiile mit topelt xteen, fer siin was fer teel yeete kriin teet. ₃₆Tëm noo hon se sich too hiin kesetst fer Yeesus se wache. ₃₇Hon tëm iwer te khop en thaafel hiin kenaachelt woo truf kexrip waar als aanklaache keeche iim: “Tas is Yeesus, te Kheenich fon te Yute”. ₃₈Mit Yeesus, hon se aach tswaay xpitspuuwe pekraytst: ëne uf ti rechts sayt un en anerfe uf ti links sayt.

₃₉Tii woo too langst kang sin hon em ferxpot, hon te khop kexitelt un hon em ferxënt, ₄₀soo am saan:

— Ey, tuu host kesaat tuu khënst te Thëmpel fernichte un noch mool uf paue in tray taache! Wëns tuu te Soon fon Kot pist, khom runer fon tëm krayts un ret tich selepst!

₄₁Ti xëfe fon te priister, ti Kesets mayster un ti yute fiirer hon aach iwer iim kexpot, am saan:

₄₂— Eyer hot ti anere keret, awer khan sich selwer net rete! Eyer is te Kheenich fon Isarël, kël? Wën eyer yets kraat fom krayts runer khome tuut, tan tuun meyer an tëm klaawe! ₄₃Eyer hot an Hërkot keklaapt un saat tas eyer Hërkot sayne Soon weyer. Meyer kuke mool op Hërkot iim yets rete wil!

₄₄Un sokaar ti xpitspuuwe woo mit iim pekraytst kep waare hon em ferxpot.

₄₅An mitach hot tas aan kefang tunkel se kewe, un ti kans eyert is tray xtun im tunkle keplip. ₄₆Mitachs um tray uer, hot Yeesus kans hat kexraayt:

— “Eli, Eli lemá sabactani”? Tii wërter petayte: “Mayn Kot, mayn Kot, warom host tuu mich in xtich kelos?”

₄₇Phaar layt woo too waare hon tas keheyert un saat:

— Tee is Eliias am ruufe.

₄₈Eene fon tëne layt is kelaaf un hot en xwam nas kemach in keweenliche wayn, hot an ti xpits fon en xteke ketuun un hot tas fer Yeesus kep fer se trinke. ₄₉Awer, anere hon kesaat:

— Waat mool. Meyer kuke mool op Eliias iim rete khomt!

₅₀Too hot Yeesus noch mool en xtarke xraay kelos un is kextorep.

₅₁Tan is te foerhank fom Thëmpel in tswaay xtiker feris, fon uwe pis runer. Ti eyert hot kexutert, un ti felse sin ferplatst. ₅₂Ti kreewer sin uf kang, un fiil layt fom Hërkot sayn folek woo xon kextorep waare sin noch mool peleept kep ₅₃un sin aus em kraap kang. Un, noo Yeesus sayn peleepung, sin se in Yeruusalëm, ti Haylich Xtat, rin kang woo fiile layt se kesiin hon.

₅₄Te ofitseyer fom reemixe militeyer un sayn soltaate, woo Yeesus am uf pase waare, hon te eyert xuter kesiin un ales was paseyert waar. Tan hon se fiil pang kriit un hon kesaat:

— Tas waar wërklich Hërkot sayne Soon!

₅₅Phaar fraae waare too kewees, fon waytem am kuke. Waare tii woo mit Yeesus khom waare fon Kalilëya un hate em keholef kehat. ₅₆Unich tëne waar Maria Matalena; Maria, mama fon Tiako un Yoosef un noch ti mama fon Sepeteu sayn puuwe.

₅₇Es waar xon neekst nacht wii aan khom is fon te xtat Arimatëya en rayche man woo Yoosef keheest hot. Tee waar aach en aanhënger fon Yeesus. ₅₈Yoosef is pay Pilatus kang un hot Yeesus sayne khërwer ferlangt. Un Pilatus hot kexikt solte tee tëm ap kewe. ₅₉Tan, hot Yoosef te khërwer kehool, in em nay layn tuuch in kewikelt ₆₀un hot em in sayn aychne kraap rin ketuun, woo fer khotsem aus kekraapt kep waar in ti fels. Tëm noo, hot eyer en kroose xteen foer kerolt fer te inkang tsuu mache un is fort kang. ₆₁Maria Matalena un ti aner Maria waare tepay kewees, foer em kraap kesetst.

₆₂Am neekste taach, tas mënt, te taach noo fraytach, hon ti xëfe fon te priister un ti fariseyer sich fersamelt mit Pilatus ₆₃un saate:

— Kowerneyer, meyer hon traan ketënkt tas, wii eyer noch leewent waar, hot tee liichner kesaat: “Noo tray taache kewe ich peleept.” ₆₄Also, xik tas kraap kuut uf pase pis an te trite taach, tas tëm sayn tisiple net te khërwer xteele khëne un tëm noo saan fer tas folek tas eyer peleept kep is. Wayl tii letst lii weyer xlimer wii ti eyerxt.

₆₅Tan saat Pilatus:

— Nëmt tii soltaate mit aych un past tas kraap uf soo kuut wii teyer khënt.

₆₆Ti sin kang, hon en fersicherung sinaal an te xteen kemach un hon ti soltaate too kelos, tas kraap am wache.