Ti tseen meet
1Yeesus saat:
— An tëm taach wërt te Himels Raych sin wii tseen meet woo sayn lampe kehool hon un sin aus kang fer te praut pekeechne. 2Finef waare oone ferxtant, un finef waare ferxtënich. 3Ti meet oone ferxtant hon sayn lampe kehool, awer hon khee eel mit kehool fer noo se file. 4Ti ferxtëniche meet hon kleesyer mit eel mit kehool fer sayn lampe. 5Te praut waar lang am taure, tesweche hon ti tseen meet aankefang se xlumre un sin inkexloof.
6— Um halep nacht hot sich te xraay keheyert: “Te praut is am khome! Khomt aych mit tëm pekeechne!”
7— Tan sin ti tseen meet wach kep un hon sayn lampe aan kextoch. 8Tan hon ti meet oone ferxtant fer ti anere kesaat: “Kept uns en pisye eel, wayl unsere lampe sin aus am keen.”
9Awer, ti ferxtëniche meet hon keantwort:
— Uf khee aart! Te eel woo meyer hon is net kenuuch fer uns un fer aych. Wën teyer eel wolt, keet em khaafe!
10Tan sin ti meet oone ferxtant aus kang fer eel khaafe, un, soo lang wii se aus waare, is te praut aan khom. Ti finef meet woo mit sayn lampe too fërtich waare sin mit tëm rin kang fer tas hochtsayts fest, un ti teyer is tsuu kexlos kep.
11— Xpeeter hiin sin ti anere aan khom un hon aankefang se xraaye: “Hër, hër, los uns rin khome!”
12Te praut hot keantwort: “Ich fersichere aych tas tas woer is: — Ich wees net weyer teyer sayt!”
13Un Yeesus macht xlus, am saan:
— Also, playpt am wache wayl teyer weest net te taach un net ti xtun.
Ti tray knechte
14Yeesus saat wayter:
— Te Himels Raych wërt sin wii en man woo en rees mache teet. Tee hot sayn knechte keruuf un hot se aan kextelt fer sayn aychentum uf pase. 15Un hot tëne kelt kep tëm noo yeete ëne sayn kapasiteet waar: fer te eyerxte hot eyer finef hunert koltne nikle kep; fer te tswete hot eyer tswaay hunert kep; un fer te trite hot eyer hunert kep. Tan is eyer ap kefaar fer se reese. 16Te kneecht woo finef hunert nikle kriit hat is klaych aus kang, hot kexefter ap kemach mit tëm kelt un hot noch anere finef hunert nikle fertiint. 17Kraat soo, tee woo tswaay hunert nikle kriit hat, hot aach noch anere tswaay hunert fertiint. 18Awer, tee woo hunert nikle kriit hat is kang, hot en loch in ti eyert kekraapt un hot em hër sayn kelt ferxtekelt.
19Fiil tsayt tëm noo, is te hër tsurik khom un hot en ap rechnung kemach mit tëne. 20Te knecht woo finef hunert nikle kriit hat is khom un hot noch finef hunert ap kep, am saan: “Teyer het mich finef hunert nikle kep. Kuk! Too sin noch finef hunert woo ich fertiint hon.”
21Te hër saat:
— Aarich kuut, kuute un troye knecht. Tuu waarst leaal im hantle mit weenich kelt un, tesweche, xtele ich tich aan fer kexefte mache mit fiiles. Khom mit meyer fayre!
22Tan is te knecht woo tswaay hunert nikle kriit hat aan khom un saat: “Teyer het mich tswaay hunert nikle kep. Kuk! Too sin tswaay hunert mee, woo ich fertiint hon.”
23Te hër saat:
— Aarich kuut, kuute un troye knecht. Tuu waarst troy im hantle mit weenich kelt un, tesweche, xtele ich tich aan fer kexefte mache mit fiiles. Khom mit meyer fayre!
24Too is te knecht woo hunert nikle kriit hat aan khom un saat: “Ich wees tas teyer en xrooe man sayt, woo ërnt woo teyer net keplanst hot un samelt woo teyer net keseet hot. 25Ich hon pang kriit un, tesweche, hon ich tayn kelt in ti eyert ferxtekelt. Kuk! Too is tayn kelt.”
26Te hër saat:
— Xlechte un faule knecht! Tuu wust tas ich ërnte woo ich net keplanst hon un samle woo ich net keseet hon. 27Tesweche hest tuu mise mayn kelt uf ti pank kextelt hon, un, wën ich tsurik kheemt, teet ich tas mit tsinse tsurik kriin.
— Tëm noo, hot eyer sich noo te anere knechte kewënt un saat: 28“Hoolt tëm tas kelt wech un kept tas fer tee woo tausent nikle hat. 29Wayl tee woo fiil hat wërt mee kriin un, soo, wërt tee noch mee hon. 30Un xmayst wech, in ti tunkelheet, te unnutsliche knecht. Tort wërt eyer prile un ti tseen kwiitxe fon hofnungsloos.”
Te letste kericht
31Yeesus macht xlus, am saan:
— Wën te Son fom Man khome tuut als Kheenich, mit te kanse ëngle, wërt tee sich uf sayne kheenichs troon setse. 32Ti kanse foleke fon te eyert tuun sich foer tëm fersamle, un tee tuut ti layt ausnaner teele eene fon te anere, soo wii te xeefer ti xeef ap xpërt fon te kaprite. 33Eyer tuut ti kuute uf sayn rechts sayt un ti anere, uf sayn links sayt. 34Tan wërt te Kheenich saan fer tii woo uf sayn rechts sayt sin: “Khomt, teyer woo keseechent sayt fon mayne Fater! Khomt un kriit te Raych woo mayne Fater fer aych prepareyert hot tsayt tas ti welt ketsoo kep waar. 35Wayl ich hat hunger, un teyer het mich ese kep; ich hat torxt, un het mich waser kep. Waar en auslëner, un het mich uf kenom in ayer haus. 36Waar oone tsaych, un heet mich keklayt; waar krank, un het mich uf kepast. Waar in te katee, un sayt mich pesuuche kang.”
37— Tan wëre ti kuute frooe: “Hër, wan waar tas meyer tich mit hunger kesiin hon un tich ese kep hon ore mit torxt un tich waser kep hon? 38Wan waar tas meyer tich als auslëner kesiin hon un tich uf kenom hon in unser hayser ore oone tsaych un tich keklayt hon? 39Wan waar tas mëyer tich krank kesiin hon ore in te katee un sin tich pesuuche kang?”
40— Tan wërt te Kheenich anworte: “Ich fersichere aych tas tas woer is: wën teyer tas fer te keringste fon mayn priiter kemach hot, waar fer mich woo teyer tas kemach hot.”
41— Tëm noo, wërt Eyer saan fer tii woo uf sayn links sayt sin: “Keet wech fon mich, teyer woo unich te ferfluuchung fon Hërkot sayt! Keet ins eewiche fayer, prepareyert fer te Taywel un sayn ëngle! 42Wayl ich hat hunger, un teyer het mich khee ese kep; hat torx, un het mich khee waser kep. 43Waar en auslëner, un het mich net in ayer haus uf kenom; waar oone tsaych, un het mich net keklayt. Waar krank un in te katee, un teyer het mich net uf kepast.”
44Un tii wëre frooe: “Hër, wan waar tas woo meyer tich kesiin hon mit hunger, ore mit torxt, ore als auslëner, ore oone tsaych, ore krank, ore in te katee un hon tich net keholef?”
45— Te Kheenich wërt antworte: “Ich fersichere aych tas tas woer is: yeetes mool woo teyer een fon tëne keringste persoone net keholef het, waar mich woo teyer net keholef het.”
46Un Yeesus hot soo xlus kemach:
— Also, tii keen uf te eewiche xtroof, awer ti kuute keen fer es eewiche leewe.
