Mateus 24

₁Yeesus is aus em hoof fom Thëmpel kang, un, wii eyer xon fort am keen waar, sin tëm sayn tisiple ticht pay em khom un hon sayn acht aan keruuf fer tas kepaus fom Thëmpel. ₂Too saat eyer:

— Sayt teyer tas ales am siin? Wayl ich fersichere aych tas tas woer is: too playpt khee xteen uf em anere; ales wërt um kexmis.

₃Yeesus hot am Oliiwe Përich kesitst. Tan, sin ti tisiple ticht pay em khom un hon em in priwaat kefroot:

— Saa fer uns wën tas paseere sol. Was fer sinaal kept tas fer se wayse tas ti tsayt khom is fer aych tsurik khome un ales ans ën khomt?

₄Yeesus hot keantwort:

— Past uf tas nimant aych hinerkeen tuut. ₅Wayl fiile wëre khome, sich am ferxtele wii wën se ich weere, am saan: “Ich sin te Kristus”! Un tuun fiil layt hinerkeen. ₆Praycht khee pang hon wën teyer te ratau fon fiile patalye ore kriiche aan saan heere tuut. ₇Een natsioon tuut keeche ti aner khëmfe, un een lant tuut tas aneres iwerfale. Uf fiil plets tuut tas ese feele un ti eyert tuut xutre. ₈Tas tings wërt sin wii ti eyerxte phayn fon en kepoer.

₉— Tëm noo khomt teyer in ti katee un wërt ap kep fer kekweelt kewe un teyer kept umkeprung. Ale layt tuun aych hase wayl teyer mayn aanhënger sayt. ₁₀In tëne tsayte tuun fiile sayne klaawe in xtich lose un tuun eene em anere hase. ₁₁Tan khome fiil falxe profëte tsum foerxayn un tuun fiile layt hinerkeen. ₁₂Ti xlechtichkheet tuut sich soo ferprayte, tas te liipe fon fiile ap khiile tuut; ₁₃awer, weyer xtram playpt pis ans ën kept keret. ₁₄Un ti kuut naychkheet iwer te Raych kept aan kesaat in te kans welt als tsayer fer ti kans mënxheet. Tan khomt te ën.

₁₅Un Yeesus saat wayter:

— Teyer wërt siin uf em Hayliche Plats “te kroose terror”, fon was te Profët Daniël kexproch hat. (Tas te leeser ferxteet was tas petayte wil!) ₁₆Tan, tii woo in te rechioon fon Yutëya sin, sole uf ti përiche ausrayse. ₁₇Weyer uf sayn haus is, uf em terase, sol klaych ausrayse un sol net rin keen fer sayn tings hoole. ₁₈Un weyer uf em khamp is, sol net tsurik hëm laafe fer sayn tsaych hoole. ₁₉Ay fon te fraae woo en khint am waarte sin un fon te motere mit kleene khiner in tëne taache! ₂₀Peet Hërkot aan tas teyer net im winter ore uf em samstach ausrayse mist. ₂₁Wayl in tëne taache kept es en layte soo kroos wii es noch nii kep hot tsayt tas Hërkot ti welt ketsoo hot; un nii mee tuut was eenliches paseere. ₂₂Awer, Hërkot hot ti tsayt fon tee layte weenicher kemach. Wën tas net soo weyer, teet nimant keret wëre. Awer, weche em folek woo Hërkot aus kesuucht hot fer se rete, kept ti tsayt weenicher kemach.

₂₃Also, wën yemant fer aych saat: “Kukt! Te Kristus is too” ore “Te Kristus is tort”, klaapt tas net. ₂₄Wayl wëre tsum foerxayn khome falxe profëte un falxe mesiias, woo wunere mache tuun un wunerlich tings fer hinerkeen, wën meechlich, sokaar tas folek woo Hërkot aus kesuucht hot. ₂₅Kept acht! Ich sin tas ales aych am saan, eep tas paseyert.

₂₆— Un, wën se saan: “Kukt! Eyer is im tesërt”, keet net tort hiin. Ore noch: “Kukt! Eyer is too ferxtekelt”, klaapt tas net. ₂₇Wayl, soo wii te plits en xtrich tsiit iwer te himel, fom oost pis wëst, soo sol te aankhom fom Soon fom Man sin.

₂₈— Woo te khërwer fon en toote is, too tuun sich ti oots feel samle.

₂₉Yeesus saat:

— Noo tëne taache fol layte, kept ti sun tunkel, un te moont tuut net mee xayne. Ti xtërne fale fom himel un ti krafte fom welt raum kewe aan kexutert. ₃₀Tan khomt te sinaal fom Soon fom Man tsum foerxayn am himel. Ale foleke fon te eyert tuun prile un siin te Soon fom Man am runer khome fon te wolke, mit macht un kroos kloor. ₃₁Ti kroos trompet tuut klingle, un eyer tuut sayn ëngle xike uf ti fier eke fon te eyert. Ti ëngle tuun Hërkot sayn raus kesuuchte samle fon een sayt fon te welt pis uf ti aner.

₃₂Yeesus saat noch:

— Lërnt was te fayche paam aych lërne tuut. Wën sayn est kriin kewe, un ti pleter aan fange se khayme, weest teyer tas te sumer am khome is. ₃₃Soo aach, wën teyer siit tas tings paseere, kriit teyer se wise tas ti tsayt ticht is, fërtich fer aanfange. ₃₄Ich fersichere aych tas tas woer is: tas tings tuut paseere eep tii woo yets leewent sin al xtërwe tuun. ₃₅Te himel un ti eyert tuun ferxwine, awer mayn wërter playwe fer imer.

₃₆Yeesus macht wayter, am saan:

— Awer nimant wees net mool te taach net mool ti xtun woo tas ales paseere sol, net mool ti ëngle im himel, net te Soon, awer ploos te Fater. ₃₇Te aankhom fom Soon fom Man wërt eenlich sin wii tas woo paseyert waar in Noee sayn tsayt. ₃₈Wayl foer em Sintflut, hot tas folek kes un ketrunk, un ti mëner un fraae hon kehayrat, pis an te taach woo Noee in kextii is im kroose poot. ₃₉Awer, wuste net was am paseere waar, pis ti Sintflut khom is un hot se al mit kenom. Soo aach wërt te aankhom fom Soon fom Man sin.

₄₀— An tëm taach wëre tswaay mëner in te plantaaj am xafe sin: ëne wërt kenom, un te anere kelos. ₄₁Tswaay fraae wëre am xafe sin an te miil, wayts am maale: een wërt kenom, un ti aner kelos. ₄₂Playpt am wache, wayl teyer wist net was fer taach ayre Hër aan khome tuut. ₄₃Tënkt too traan: wën te hër fom haus wist wan te xpits puup aankhome teet, teet eyer am wache playwe un teet net lose tas sayn haus iwerfal keept. ₄₄Tesweche, playpt teyer am wache, wayl te Soon fom Man wërt khome in te uertsayt woo teyer net am waarte sayt.

₄₅Yeesus saat noch:

— Meyer wise tas es te leaale un intelijënte knecht is woo te hër aanxtelt fer ti anere knechte uf pase, fer tëne te es mitel kewe an te richtich uertsayt. ₄₆Kliklich tee knecht woo tas am mache is wën te hër aan khome tuut! ₄₇Ich fersichere aych tas tas woer is: te hër tuut en man aanxtele als xëf fon sayn kans aychentum. ₄₈Awer, wën te knecht xlecht is, tuut eyer soo tënke: “mayne hër is lang am taure fer tsurik se khome.” ₄₉Tan tuut eyer aanfange sayn khameraate ferhaue, se ese un se trinke mit te pesofne. ₅₀Un te hër khomt tsurik am taach woo te knecht net am waarte is un an te xtun woo eyer net wees. ₅₁Tan xikt te hër te knecht in xtiker xnayte un tuut em konteneere fer uf tas plats khome woo ti xaynhayliche hiin khome. Tan wërt eyer prile un ti tseen kwiitxe in hofnungsloos.