Yeesus, ti Kesets mayster un ti fariseyer
1Tan hot Yeesus fer tas folek un fer sayn tisiple kexproch. 2Eyer saat:
— Ti Kesets mayster un ti fariseyer hon autoriteet fer Mooses sayn Kesets ausleye. 3Tesweche, mist teyer aan heere un noo keen ales was tii saan. Awer, macht net soo wii tii tas mache, wayl ti mache net was se unterichte. 4Pine xweere lest un tuun se uf te anere sayne pukel laate, awer sii selepst helfe tëne net, net mool mit en finger, te last traan. 5Ales was se mache is fer aan kesiin kewe fon te anere. Kukt mool wii kroos sin ti thekste fon te Hayliche Xrifte woo se ap xraywe, an ti xtërn un an ti ërem pine! Un kukt ti kroose fransle an tëne sayn umhënk. 6Ti hon liiwer ti peste plets uf en panket un ti eer plets in te sinakooke. 7Hon kërn wën se mit rexpekt ti tsayt kepoot kriin an te prase un “mayster” kenënt kewe. 8Awer, teyer tëreft net “mayster” kenënt kewe, wayl teyer al sayt mitkliiter fon een selwich familye un het ploos ëne Mayster. 9Un, hier uf te eyert, ruuft nimant “fater”, wayl teyer het ploos eene Fater, woo im himel is. 10Teyer tëreft aach net “fiirer” kenënt kewe, wayl teyer het en meyster, te Kristus. 11Unich aych, te importanteste is tee woo ti anere petiine tuut. 12Weyer sich erheept, kept erniitricht. Awer, weyer sich erniitricht, kept erheept.
Yeesus konteneyert tas ferxtelung
13— Ay fon aych, Kesets mayster un fariseyer, xaynhayliche! Wayl teyer macht ti teyer fom Himels Raych tsuu fer ti anere, awer teyer selepst keet net rin, un lost net rin tii woo rin keen wole.
14[— Ay fon aych, Kesets mayster un fariseyer, xaynhayliche! Wayl teyer tuut ti witfraae aus nutse un xteelt tëne sayn aychentum un, fer tas se ferxtekle, macht teyer lange kepeete! Tesweche sol ayre xtroof xlimer sin!]
15— Ay fon aych, Kestets mayster un fariseyer, xaynhayliche! Wayl teyer faart tas meer iwer un reest iwer aler lëner un fersuucht tas en mënx rom keet fer ayer relichioon. Un, wën teyer tas kemach kriit, tuut tee mënx tswaay mool mee ti hël fertiine wii teyer selepst.
16— Ay fon aych, plinte fiirer! Wayl teyer tuut soo unterichte: “Wën yemant xwoore tuut iwer te Thëmpel, is tee net ketswung sayn xwoorung in se hale. Awer, wën yemant iwer te kolt fom Thëmpel xwoore tuut, tan is eyer ketswung in se hale was eyer kexwoert hot.” 17Tume un plinte! Was is mee important: te kolt ore te Thëmpel woo te kolt haylich macht? 18Teyer untericht aach tas: “Wën yemant xwoore tuut iwer te altaar, is eyer net ketswung sayn xwoer in se hale. Awer, wën eyer xwoore tuut iwer ti opfer woo uf em altaar is, tan is eyer ketswung sayn xwoorung in se hale.” 19Plinte! Was is mee important: ti opfer ore te altaar woo ti opfer haylich macht? 20Tesweche, wën yemant xwoore tuut iwer te altaar, is am xwoore iwer te altaar un ale opfer woo uf em sin. 21Wën yemant xwoore tuut iwer te Thëmpel, is am xwoore iwer te Thëmpel un iwer Hërkot woo too woone tuut. 22Un, wën yemant xwoore tuut iwer te himel, is am xwoore iwer Hërkots troon un te aychne Hërkot, woo uf em setst.
23— Ay fon aych, Kesets mayster un fariseyer, xaynhayliche! Wayl teyer kept fer Hërkot en tseent teel sokaar fom phefer mënts, fom khimel un aner tings woo im kaate wakse tuut, awer keet net ti importanteste kepoote fon te Kesets noo, woo sin: kerechtich sin mit te anere, kuut sin un eerlich sin. Awer, is kraat tas tings woo teyer mache mist, oone tas anere neewe lose. 24Plinte fiirer! Tuut en moskit saye awer xlikt en khameel!
25— Ay fon aych, Kesets mayster un fariseyer, xaynhayliche! Wayl teyer wext tas klaas un te teler auswënich, awer inwënich sin ti fol tings woo teyer samer kriit het torich kewaltichkheet un pekeerichkheet. 26Plinte fariseyer! Wext eyerxt tas klaas inwënich, un tan kept aach ti auswënich sayt sauwer!
27— Ay fon aych, Kesets mayster un fariseyer, xaynhayliche! Wayl teyer wii kreewer woo ways kextrich kep sin, woo auswënich xeen aus siin, awer inwënich sin se fol knoche fon toote un faulheet. 28Auswënich siit teyer kuute mënxe aus, awer inwënich sayt teyer fol liye un sinte.
Te xtroof fon te xaynhayliche
29— Ay fon aych, Kesets mayster un fariseyer! Wayl teyer macht xeene kreewer fer ti profëte un ferputst ti monumënte fon te layt woo richtich keleept hon. 30Un saat: “Wën meyer keleept hete in te tsayte fon unser foerkhomer, hete meyer net kemach was tii kemach hon, meyer hete net ti profëte umkeprung.” 31Soo tuut teyer tsuu saan tas teyer nookhomer sayt fon tëne woo ti profëte umkeprung hon. 32Also, keet un macht xlus an was tii aankefang hon! 33Xlange! Kiftiche xlange nixt! Wii wolt teyer langst ti fertamung fon te hel khome? 34Wayl ich tuun aych ti profëte xike, kluuche mëner un mayster. Teyer tuut phaar umpringe, anere pekraytse, noch anere ferpaytxe in te sinakooke un tëne yachte xtat tsu xtat. 35Tesweche, tuut Hërkot aych xtroofe weche em toot fon ale unxultiche mënxe woo ayre foerkhomer umkeprung hon, tsayt em toot fom unxultiche Apël pis Sakariias, soon fon Parakiias, woo teyer umkeprung hot tswixe em Thëmpel un te altaar. 36Ich fersichere aych tas tas woer is: te xtroof weche tas ales wërt iwer tas folek fon hayt tsuu taach fale.
Yeesus sayne liipe fer Yeruusalëm
37Yeesus macht xlus am saan:
— Yeruusalëm, Yeruusalëm, woo ti profëte umpringt un ferxmayst mit xteen ti mensajeyer woo Hërkot tich xikt! Wii oft wolt ich tayn kans folek umaarme, soo wii ti kluk sayn pipcher samelt unich sayn flite, awer teyer wolt net! 38Yets playpt ayer haus kans inxtich! 39Ich fersichere aych tas teyer mich net mee siin tuut, pis ti tsayt khomt woo teyer saat: “Tas Hërkot seechne sol tee woo im Hër sayne naame khomt!”.
