Mateus 22

₁Yeesus hot noch mool paraaple penutst fer se xpreche fer tas folek. Eyer saat:

₂— Te Himels Raych is wii en kheenich woo en hochtsayts fest prepareyert hot fer sayne soon. ₃Tëm noo, hot eyer ti knechte kexikt solte layt inlaate, awer ti wolte net khome. ₄Tan hot eyer anere knechte kexikt mit tee ortnung: “Saat fer ti inkelaatne tas ales prepareyert is fer es fest. Hon xon ti fete hëmese un okse kexlacht, un ales is fërtich. Tas se uf es fest khome!”

₅— Awer, ti in kelaatne hon sich niks traus kemach mit te inlaatung un sin sayn kexefte ap mache kang: ëne is uf sayn kroos xtik lant, un anere is in sayn kexefts haus kang. ₆Anere hon ti knechte kekrif, hon se ferxlaa un hon se umkeprung. ₇Te kheenich is soo wuutich kep, tas eyer ti layt woo sayn knechte umkeprung hon toot mache kexikt hot un an tëne sayn xtet fayer traan prëne. ₈Tëm noo, hot eyer sayn knechte keruuf un saat: “Mayn hochtsayts fest is fërtich, awer ti in kelaatne sin tas net weyert. ₉Yets, keet torich ti xtroose un khënt inlaate ti kanse layt woo teyer aan trefe tuut.”

₁₀— Tan sin ti knechte aus kang torich ti xtroose un hon fersamelt al tii woo se pekeechent hon, soo ti kuute wii ti xlechte. Un te saal woo tas fest waar is fol mit layt kep. ₁₁Wii te kheenich rin khom is fer ti in kelaatne pekriise, hot eyer en man kemërekt woo khee festlich klaytung aan hat ₁₂un froot: “Froynt, wii soo pist tuu too rin khom oone tas festliche klayhtung?”

— Awer, te man hot niks keantwort. ₁₃Tan saat te kheenich fer ti knechte: “Pint tëm man sayn fiis un tëm sayn hënt aan un xmays em raus, in ti tunkelheet. Too wërt eyer prile un ti tseen kwiitxe fon hofnungsloos.”

₁₄Un Yeesus macht xlus, am saan:

— Wayl fiil kewe inkelaat, awer weenich kewe aus kesuucht.

₁₅Ti fariseyer sin aus kang un hon en plaan kemach fer en pewaysung keeche Yeesus uf xtele. ₁₆Tan hon se kexikt tas phaar fon sayn aanhënger un noch phaar mitkliiter fon Herootes sayn partay fer Yeesus saan këngte:

— Mayster, meyer wise tas teyer eerlich sayt, lërnst ti woerheet iwich wii mer leewe sol wii Hërkot ferlangt un machst tich niks traus mit was ti anere mëne, un julkeyerst net noo em xayn. ₁₇Tan, was mënt teyer: is es ore is es net keeche unser Kesets xtayer petsaale fer te reemixe khayser?

₁₈Awer, Yeesus hot tëne sayn hinerlistichkheet kemërekt un hot keantwort:

— Xayn hayliche! Warom sayt teyer en pewaysung keeche mich am suuche? ₁₉Pringt te nikel mit teem te xtayer petsaalt wërt.

Tii hon te nikel keprung. ₂₀Un eyer hot kefroot:

— Wëm is te naame un tas kesicht woo too uf tëm nikel kraweyert sin?

₂₁Tii hon keantwort:

— Sin em khayser.

Tan saat Yeesus:

— Kept fer te khayser was em khayser is un kept fer Hërkot was em Hërkot is.

₂₂Tii hon sich ferwunert wii se tas keheyert hon. Tan hon se Yeesus too kelos un sin fort kang.

₂₃An tëm selwiche taach sin phaar satuseyer ticht pay Yeesus khom. Tii hon net an ti peleepung keklaapt. ₂₄Tii hon fer Yeesus kesaat:

— Mayster, Mooses hot uns soo kelërnt: “Wën en man xtërept un lost sayn fraa oone khiner, mus tëm sayne pruuter sich mit te witfraa ferhayrate, tas se khiner kriin, woo als khiner fom pruuter woo kextorep is kerechent kewe.” ₂₅Paseyert, awer, tas unich uns siwe priiter waare. Te elste hot kehayrat un is kextorep oone khiner hiner lose. Soo, hot eyer ti witfraa kelos fer te tswete pruuter. ₂₆Tas selwiche is paseyert mit tëm, un aach mit tëm trite un, ëntlichmool, mit tëne siwe al. ₂₇Noo tëne al, is ti fraa aach kextorep. ₂₈Also, am taach fon te peleepung, tsu was fer fon tëne siwe wërt ti fraa keheere? Wën ti al sich mit tëm ferhayrat hon.

₂₉Yeesus hot keantwort:

— Wii ferkheyert sayt teyer, wën teyer net ti Hayliche Xrifte khënt net mool em Hërkot sayn macht! ₃₀Wayl, wën ti toote peleepe, wëre tii wii ti ëngle fom himel, un nimant tuut hayrate. ₃₁Un, was mit te peleepung fon te toote se tuun hot, meecht teyer nii keleest hon was Hërkot saat? Eyer hot fersichert: ₃₂“Ich sin te Kot fon Aapraham, te Kot fon Iisak un te Kot fon Yaakop.” Un Hërkot is net te Kot fon te toote, awer toch fon te leewente.

₃₃Wii tas folek tas keheeyert hot, hon se sich ferwunert mit tëm sayn untericht.

₃₄Ti fariseyer hon sich fersamelt wii tii se wise kriit hon tas Yeesus ti satuseyer sich ruich hale kemach hot. ₃₅Un ëne fon tëne, woo Kesets mayster waar, wolt en pewaysung keeche Yeesus aan richte, un hot kefroot:

₃₆— Mayster, was fer fon te kanse kepoote is te importanteste?

₃₇Yeesus hot keantwort:

— “Liip te Hër, tayne Kot, mit tayn kans hërts, mit tayn kans seel, mit tayne kanse sin.” ₃₈Tas is te kreeste kepoote un te importanteste. ₃₉Un te tswete importanteste is eenlich mit tëm eyerxte: — “Liip ti anere wii tuu tich selwer liipst.” ₄₀Ti kans Mooses Kesets un ti unterichte fon te Profëte hon sayne sats uf tëne tswaay kepoote.

₄₁Wii ti fariseyer fersamelt waare, hot Yeesus tëne kefroot:

₄₂— Was tënkt teyer iwich te Kristus? Fon weem tuut tee apxtame?

Tii hon keantwort:

— Fon Dawii!

₄₃Yeesus hot noch mool kefroot:

— Tan, warom hot Dawii, fom Hayliche Kayst inspireyert, te Kristus Hër keruuf? Wayl Dawii saat:

₄₆Nimant khont sonst niks antworte, un fon tëm taach aan foran hon se khee koraaj mee kehat fer etwas se frooe.