Lukas 9

₁Yeesus hot sayn tswelef aphostle samer keruuf un hot tëne macht un autoriteet kep fer ti kanse temoone fort yaan un ti krankheete heele. ₂Tan hot eyer se kexikt fer em Hërkot sayne Raych aan saan un ti kranke kesunt mache. ₃Un saat tëne:

— “Nëmt niks mit iwer te weech: khee xtok, khee traache thax, khee proot, khee kelt un aach khee tswete punx. ₄Wën teyer an en xtat aan khomt, playpt uf tëm plats woo teyer uf kenëmt kept pis teyer fon too wayter reest. ₅Awer, wën teyer net kuut ap kehool kept, keet klaych aus tee xtat, xitelt te xtaap fon ayre fiis ap wën teyer too raus keen tuut, als sinaal keeche ti layt”.

₆Tan, hon ti tswelef sich uf weech kemach un sin torich ti kanse pewoonte plets kang ti kuute naychkheete am aan saan un ti layt iweraal am heele.

₇Herootes, te kowerneyer fon Kalilëya, hot fon ales was am paseere waar xpreche keheyert un wust net was eyer tënke solt. Wayl phaar hon kesaat tas Yohan Te Taafer, noch mool peleept weyer, ₈un anere saate tas Eliias tsum foerxayn khom weyer, un noch anere tas ëne fon te alte profëte peleept weyer. ₉Awer, Herootes saat:

— Ich selepst hon kexikt em Yohan te khop ap hake. Weyer, tan, meecht tee man sin fon weem ich tas tings xpreche heere?

Un Herootes wolt Yeesus khëne lërne.

₁₀Ti aphostle sin tsurik khom un hon fer Yeesus fertseelt ales was se kemach hate. Tan hot er se mit iim kehool, un sin aleen pis tas plats Petsayta kang. ₁₁Awer tas folek hot tas se wise kriit un sin tëne noo kang. Un Yeesus hot se ap kehool, hot iwich em Hërkot sayne Raych kexproch un hot keheelt tii woo keheelt muste kewe.

₁₂Waar nacht am kewe, un tesweche hon ti tswelef aphostle fer Yeesus kesaat:

— Xik tas folek fort. Ti khëne pis an ti pewoonte plets keen un plantaaje hayser woo too ticht rom sin un tort khëne se etwas fine fer se ese un plats fer iwer nacht se playwe, wayl tas plats soo unpewoont is.

₁₃Awer, Yeesus antwort:

— Kept teyer selepst tëne se ese.

Ti tisiple hon kesaat:

— Meyer hon ploos finef proote un tswaay fix. Wilst tuu hon tas meyer ese khaafe keen fer tas kanse folek?

₁₄Too waare unkefeyer finef tausent mëner. Yeesus saat fer sayn tisiple:

— Xikt tas folek sich hiin setse in krupe fon unkefeyer fineftsich layt.

₁₅Ti tisiple hon tas soo kemach un hon ti layt sich al setse kexikt. ₁₆Tan hot Yeesus ti finef proote un ti tswaay fix kehool, hot noo em himel kekukt un hot tas fer Hërkot ketankt. Tëm noo, hot er tas proot un ti fix in xtiker keproch un hot se ap kep fer ti tisiple tas tii se ferteele solte unich em folek. ₁₇Al hon kes un sin sat kep, un ti tisiple hon noch tswelef khërep fol kemach mit te xtiker woo iwerich keplip sin.

₁₈Een mool waar Yeesus aleen, am peete, un ti tisiple sin ticht pay em khom. Tan froot eyer:

— Weyer saat tas folek tas ich weyer?

₁₉Tii hon keantwort:

— Phaar saan tas tuu Yohan Te Taafer, pist; anere, tas tuu Eliias pist; un anere, tas tuu ëne fon te alte profëte pist, woo peleept is.

₂₀Yeesus froot:

— Un teyer? Weyer tënkt teyer tas ich sin?

Pheeter antwort:

— Te Mesias woo Hërkot kexikt hot.

₂₁Tan hot Yeesus ti tisiple ferpot tas fer yemant se saan. ₂₂Un saat wayter:

— Te Soon fom Man mus fiil layte mit mache. Eyer kept ap kextoost fon te yute sayn fiirer, fon te priister sayn xëfe un fon te Kesets mayster. Kept toot kemach un, am trite taach, wërt eyer peleept.

₂₃Tëm noo saat eyer fer ti kanse layt:

— Wën yemant mayne aanhënger sin wil, mus sayn aychne interese ferkese un mus fërtich sin fer yeete taach sayn krayts uf nëme un mit mich keen. ₂₄Wayl, weyer sayn aychne interese foer tsiit kriit nii es wërkliche leewe; awer weyer fon sich selepst ferkest weche mich, tee kriit es wërkliche leewe. ₂₅Was hot tas fer weyert yemant ti kans welt kriin, awer es wërkliche leewe ferleere un fernicht kewe? ₂₆Wayl, wën yemant sich fon mich xeemt un fon mayn untericht, tan wërt te Soon fom Man sich aach fon tëm xeeme, wën tee aan khomt in sayn kloor un im Fater sayn kloor un fon te hayliche ëngle. ₂₇Ich fersichre aych tas too hier phaar layt sin woo net xtërwe eep se em Hërkot sayne Raych siin.

₂₈Unkefeyer en woch tëm noo wii Yeesus tas tings kesaat hot, hot eyer Pheeter, Yohan un Tiaako kehool un is uf te përich kang fer se peete. ₂₉Wii eyer am peete waar, hot sayn kesicht sich ferënert, un sayn tsaych is aarich ways un klënsich kep. ₃₀Uf mool, sin too tswaay mëner tsum foerxayn khom un hon aankefang mit Yeesus se xpreche. Waare Mooses un Eliias, ₃₁woo umkekrayst waare mit en himlixe xayn. Tii hon kexproch iwich te toot woo, tëm noo em Hërkot sayne wile, Yeesus mit mache mist in Yeruusalëm. ₃₂Pheeter un sayn khameraate waare tiif am xloofe, awer sin wach kep un hon Yeesus sayn kloor kesiin un ti tswaay mëner woo pay iim waare. ₃₃Wan ti tswaay mëner wech keen wolte, saat Pheeter:

— Mayster, wii kuut tas meyer too sin! Meyer xtele tray hite uf: een fer tich, aner fer Mooses un noch aner fer Eliias.

Pheeter wust net was eyer am saan waar. ₃₄Tee waar noch am xpreche, wan en wolek khom is un hot se ketekt. Ti tisiple hon pang kriit wan ti wolek runer uf tii khom is. ₃₅Un fon te wolek is en xtim khom, woo saat:

— Tas is mayne Soon, mayne aus kesuuchte. Heyert was tee saat!

₃₆Wan ti xtim uf keheyert hot, hon se kesiin tas Yeesus aleen waar. Ti tisiple hon sich ruych kehal un toomols hon se fer nimant fertseelt iwich was se kesiin hate.

₃₇Am neekste taach sin se fom përich runer kang, un en kroos folek hot Yeesus pekeechent. ₃₈Too hot en man woo unich em folek waar aankefang se xraaye:

— Mayster, ich pite fer mayne soon, mayne eensichste soon! ₃₉En xlechte kayst krayft iim, un, pletslich, xraayt tas khint un fangt aan krëmfe se kriin un se xaume aus em munt. Te kayst ferkweelt em un lost em, uf khee aart, loos. ₄₀Ich hon xon fer tayn tisiple ferlangt tas se te xlechte kayst aus xtoose solte, awer tii hon tas net kemach kriit.

₄₁Yeesus antwort:

— Xlechte layt un oone klaawe! Pis wan playwe ich mit aych? Pis wan mus ich aych aus hale?

Tan saat eyer fer te man:

— Pring tayne soon mool heyer.

₄₂Wii tas puupche ticht am khome waar, hot eyer en aanxlaach kriit, un te temoon hot em uf te potem kexmis. Tan hot Yeesus en ortnung kep fer te xlechte kayst, hot tas puupche keheelt un hot em fer sayne fater ap kep. ₄₃Un al hon sich ferwunert mit em Hërkot sayn kroos macht.

Al waare ferwunert mit was Yeesus am mache waar, un eyer saat fer sayn tisiple:

₄₄— Ferkest net was ich aych saan tuun: te Soon fom Man wërt ap kep in te mënxe sayn hënt.

₄₅Awer tii hon tas net ferxtan, wayl was tii wërter petayte solte waar tëne ferxtekelt kep tas se es net ferxteen khënte. Un ti hate pang fer noch etwas se frooe fer Yeesus.

₄₆Ti tisiple hon aan kefang se tiskuteere iwich weyer fon tëne te importanteste weyer. ₄₇Awer, Yeesus wust was ti am tënke waare. Tan hot eyer en khint kehool un hot es uf sayn sayte kextelt. ₄₈Tan saat eyer:

— Tee woo, wayl eyer mich noo keet, tas khint aan hoolt, is mich am aan hoole; un weyer mich aan hoolt, is tee woo mich kexikt hot am aan hoole. Also, tee woo te kleenste unich aych is, tee is te importanteste.

₄₉Yohan saat:

— Mayster, meyer hon en man kesiin woo temoone aus xtoost mit te kraft fon tayne naame, awer meyer hon em ferpot tas se mache wayl er net fon unsere krupe is.

₅₀Tan saat Yeesus fer Yohan un fer ti anere tisiple:

— Tuut em net ferpote, wayl weyer net keeche aych is, halt mit aych.

₅₁Wii ti tsayt am khome waar fer Yeesus noo em himel keen, hot eyer resolweyert noo Yeruusalëm keen. ₅₂Tan hot eyer phaar tisiple kexikt foer keen. Uf em weech sin se an en kleen xtetche aan khom fon te rechioon fon Samariia fer en plats se prepareere woo Yeesus playwe khënt. ₅₃Awer ti pewooner fon tëm plats wolte Yeesus net ap hoole wayl se kesiin hon tas eyer noo Yeruusalëm am keen waar. ₅₄Wan sayn tisiple Tiaako un Yohan tas kesiin hon, hon se kesaat:

— Wilst tuu hon tas meyer fayer fom himel runer khome xike fer ti layt se fernichte?

₅₅Awer, Yeesus, sich noo tëne am rom wëne, hot se kexteyert. ₅₆Tan sin eyer un sayn tisiple noo en aner xtetche kang.

₅₇Wii Yeesus un sayn tisiple uf em weech waare, saat en man fer Yeesus:

— Ich sin fërtich fer tich noo se keen uf yeete plats woos tuu hiin keest.

₅₈Tan saat Yeesus:

— Ti fukse hon sayn hoole, un ti feel sayn niste. Awer te Soon fom Man hot net woo ruue.

₅₉Tan saat Yeesus fer en anere man:

— Khom mit mich.

Awer tee antwort:

— Hër, los mich eyerxt tsurik keen fer mayne fater se peërtiche.

₆₀Yeesus saat:

— Los ti toote sayn toote peërtiche. Awer tuu, kee un saa em Hërkot sayne Raych aan.

₆₁En anere man saat:

— Ich keen tich noo, awer eyerxt los mich apxiit fon mayn familye mache.

₆₂Yeesus antwort:

— Weyer ti eyert aanfangt se tsakre un tsurik kukt, tiint net fer em Hërkot sayne Raych.