Lukas 10

₁Tëm noo hot te Hër noch tswaay un siptsich fon sayn tisiple raus kesuucht un hot se tsu tswet kexikt foer iim keen in ale xtet un pletser, torich tii woo eyer hiin must. ₂Eep eyer se fort kexikt hot, hot er kesaat:

— Ti ërnt is kroos, awer tii aarwater sin weenich. Tesweche, ferlangt fer te hër fon te plantaaj tas eyer mee aarwater xikt fer ti ërnt se mache. ₃Keet! Ich xike aych wii xoofe tswixich ti wolfe. ₄Holt kee thax un khee traache thax mit, un noch net mool en santaal. Un halt net xtil iwich te weech fer nimant se pekriise. ₅Wën teyer in en haus rin keet, macht tii pekriisung: “Tas tii friite in tëm haus sich ferhalt!” ₆Wën tort en friitliche man woont, lost tëm ti pekriisung; awer, wën te man net friitlich is, hoolt ayer pekriisung tsurik. ₇Playpt im selwiche haus un est un trinkt was se aych aan piite, wayl te aarwater fertiint sayne loon. Keet net aler kepot fon een haus tsum aneres in pensioon.

₈— Wën teyer in en xtat khomt un kept kuut ap kehool, est es ese woo se aych kewe. ₉Heelt ti kranke fon tee xtat un saat fer es folek fon tort: “Em Hërkot sayne Raych is pis an aych khom.” ₁₀Awer, wën teyer in en xtat khomt un kept net kuut ap kehool, keet uf ti xtroos un ruuft aus: ₁₁“Sokaar te xtaap fon tee xtat woo sich an unsere fiis kehonk hot, xitle meyer ap, keeche aych! Awer, tuut traan tënke: em Hër sayne Raych is pis an aych khom.”

₁₂Un Yeesus saat noch tas:

— Ich khan es aych sicher saan tas, am Richte Taach, Hërkot Sotooma mee tauert wii tii xtat woo aych net kuut ap kehool hot!

₁₃Un Yeesus hot wayter kesaat:

— Ay fon tich, xtat Khorasiin! Ay fon tich, xtat Petsayta! Wayl, wën ti wunere woo pay aych kemach kep sin in te xtet Tyrus un Sitoom kemach kep weere, hete tëne sayn inwooner xon lang sayn sinte tsurik kelos. Un, fer se tsayche tas se sich keroyert hete, hete se sich mit krop tsaych aan ketsoo un hete ex uf te khop ketuun! ₁₄Am Richte Taach, tuut Hërkot Tyrus un Sitoom mee taure wii aych, Khorasiin un Petsayta! ₁₅Un tuu, Kafarnaum, mënst teest in te himel kehoop kewe? In te tiifste fom toote welt kepst tuu kexmis!

₁₆Too saat Yeesus fer ti tisiple:

— Weyer aych heyert is mich am heere; weyer aych ap xtoost is mich am ap xtoose; un weyer mich ap xtoost is tee woo mich kexikt hot am ap xtoose.

₁₇Ti tswaay un siptsich sin aarich froo tsurik khom un hon fer Yeesus kesaat:

— Sokaar ti taywle hon uns keheyert wii meyer se, in Tayne naame, fon te layt raus kexikt hon!

₁₈Yeesus hot keantwort:

— Tas is woer. Ich hon Satanaas fom himel runer fale kesiin wii en plits. ₁₉Heyert! Ich hon aych ti macht kep fer uf ti xlange un uf ti krepse se treete un fer, oone khee xaate layte, em keechner sayn kraft phake. ₂₀Awer, kept net froo wayl ti xlechte kayste aych heere, awer toch wayl te naame fon yeete eene fon aych im himel uf kexrip is.

₂₁In tëm momënt, mit em Hayliche Kayst sayn kraft, is Yeesus aarich froo kep un saat:

— Oh! Fater! Hër fom himel un fon te eyert, ich tanke teyer wayls tuu fer ti layt oone xuul ketsaych host, tas woo tuu fon te kluuche un kelërnte mënxe ferxtekelt host. Yoo, Fater, tuu host tas kërn kemach.

₂₂— Mayne fater hot meyer ales kep. Nimant wees wehyer te Soon is, sonst te Fater; un nimant wees weyer te Fater is, sonst te Soon un tii fer weem te Soon tsayche wil weyer te Fater is.

₂₃Too hot Yeesus sich kewënt noo te tisiple un saat ploos fer tii:

— Kliklich sin ti layt woo siin khëne was teyer am siin sayt! ₂₄Ich saan aych tas fiile profëte un kheeniche wolte kesiin hon was teyer am siin sayt, awer khonte net; un wolte keheyert hon was teyer am heere sayt, awer hon es net keheyert.

₂₅En Kesets mayster woo wolt Yeesus in proop xtele hot sich kehoop un hot kefroot:

— Mayster, was mus ich mache fer es eewiche leewe kriin?

₂₆Yeesus hot keantwort:

— Was saan ti Hayliche Xrifte too tefun? Un wii ferxteest tuu was tii saan?

₂₇Te man hot keantwort:

— “Liip te Hër, tayne Kot, mit tayn kans hërts, mit tayn kans seel, mit tayn kans kraft un mit tayn kanse ferxtant. Un liip tayne neekste wii tich selepst!”

₂₈Yeesus hot keantwort:

— Tayn antwort is richtich! Mach es soo, tan wërst tuu leewe.

₂₉Awer te Kesets mayster wolt sich entxultiche, un hot kefroot:

— Weyer is tan mayne neekste?

₃₀Yeesus hot soo keantwort:

— En man is fon Yeruusalëm noo Jerikoo kang. Iwich em weech, hon phaar mëner em pextool, hon em sayn tsaych aus ketuun, hon em ferxlaa un hon em halep toot laye kelos. ₃₁En priister waar tee selwiche weech am keen. Wan eyer te man kesiin hot laye, is er uf tii aner sayt fom weech kang. ₃₂Is aach en lewite tort torich kang. Tee hot te man aach kesiin laye un is wayter kang.

₃₃Awer en samaritaaner woo aach torich tee weech am reese waar is tort hiin khom. Wan eyer te man kesiin hot, hot eyer em mechtich ketauert. ₃₄Too is er ticht pay te man kang, hot em ti weye sauwer kemach mit eel un wayn un hot se tsuu kepun. Tan hot te samaritaaner te man uf sayn aychne muule kesetst un hot em pis an ti neekst pensioon kenom, woo eyer em wayter uf kepast hot. ₃₅Am anere taach, hot eyer tswaay silwerne nikle kep fer te hër fon te pensioon, un saat:

— Tuu em pefleeche. Wën ich noch mool tsurik khome, petsaale ich teyer was tuu mee aus kepst mit tëm.

₃₆Too hot Yeesus fer te Kesets mayster kefroot:

— Weyer, fon tee tray, mënst tuu, waar te neekste fon tëm man woo pextool kep waar?

₃₇Te Kesets mayster hot keantwort:

— Tee woo em keholef hat!

Un Yeesus saat:

— Tan kee un mach tas selwiche!

₃₈Yeesus un sayn tisiple sin wayter kereest un sin an en kleen plats hiin khom. En fraa woo Marta keheest hot, hot em an sayn haus uf kenom.

₃₉Marta hat en xwester woo Maria keheest hot, un tii hot sich am Hër sayn fiis kesetst un hot sich tsu keheyert was eyer kesaat hot. ₄₀Marta hot sich kekhimert mit te kans haus aarwat. Too is es ticht pay Yeesus khom un hot kefroot:

— Khimerst tuu tich net traan, tas mayn xwester mich aleen lost mit te kans aarwat? Saa tëm toch, tas es meyer helfe sol!

₄₁Te Hër hot tëm keantwort:

— Marta, Marta, tuu pist unruych un machst teyer ketanke iwer fiil tings, ₄₂awer noore eens is nootwënich! Maria hot es peste fon se al raus kesuucht, un tas khan tëm nimant wech hoole.