Lukas 11

₁En taach waar Yeesus am peete uf en plats. Wan eyer fërtich waar mit em peete, hot ëne fon sayn tisiple ferlangt:

— Hër, lërn uns peete, wii Yohan sayn tisiple kelërnt hot.

₂Yeesus antwort:

— Wën teyer peete tuut, saat:

₅Tan saat Yeesus fer sayn tisiple:

— Xtelt aych mool foer tas ëne fon aych um halep nacht pis an en froynt sayn haus keet, un saat tëm: “Froynt, leen meyer tray proote. ₆Is paseyert tas mayne froynt fon en rees aan khom is, un ich hon niks fer em aan se piite.”

₇— Un xtelt aych foer tas te froynt fon trin antwort: “Tuu mich net xteere! Ti teyer is xon kexlos, un ich un mayn khiner laye xon im pet. Ich khan net uf xtaye fer tich tas proot kewe.”

₈Yeesus saat:

— Ich saan sicher fer aych tas khan sin tas tee net uf xtayt wayl eyer froynt is fon tëm woo ferlangt, awer kans sicher xtayt eyer uf weche te xteerung un kept tëm ales was er ferlangt. ₉Tesweche saan ich: ferlangt un teyer kriit es; suucht un teyer wërt es fine; klopt, un ti teyer wërt sich uf mache fer aych. ₁₀Wayl al tii woo ferlange, kriin es; tii woo suuche, fine es; un ti teyer kept uf kemach fer tee woo klopt. ₁₁Wën tayn khint en fix ferlangt, kepst tuu tëm en xlang? ₁₂Ore, wën tayn khint en aay ferlangt, kepst tuu tëm en skorpioon? ₁₃Soo xlecht wii teyer sayt, weest teyer awer toch was kuut is fer ayre khiner. Soo fiil mee wërt te Fater, woo im himel is, te Hayliche Kayst kewe fer tii woo em ferlange tuun!

₁₄Yeesus waar en temoon fon en man am aus xtoose, woo em net xpreche kelos hot. Wan te temoon raus kang is, hot te man aankefang se xpreche. Tas folek hot sich ferwunert, ₁₅awer phaar saate:

— Is Pelsepuu, te xëf fon te temoone, woo tëm kraft kept fer temoone aus xtoose.

₁₆Anere, woo wolte en proop keeche Yeesus xtele, hon ferlangt tas eyer en wuner mache teet fer se wayse tas sayn macht fon Hërkot kheemt. ₁₇Awer Yeesus, woo tëne sayn ketanke khënt, saat:

— Tas lant woo sich in krupe teelt woo unich sich khëmfe, wërt kans sicher fernicht kewe; ti familye woo sich in krupe teelt woo unich sich khëmfe kept aach fernicht. ₁₈Wën Satanaas sayne raych krupe hot woo unich sich khëmfe, wii wërt eyer wayter eksisteere? Teyer saat tas es Pelsepuu is woo mich ti macht kept fer temoone fort yaan. ₁₉Awer, wën tas soo is, weyer kept fer ayre aanhënger ti macht fer temoone fort yaan? Soo, ayre aychne aanhënger pewayse tas teyer kans ferkheyert sayt. ₂₀In te woerheet, is torich em Hërkot sayn macht woo ich ti temoone aus xtoose, un tas pewayst tas te Hërkots Raych xon pis an aych khom is.

₂₁— Wën en xtarke man, mit fiil keweere sayn aychne haus uf past, ales was er hot playpt kuut uf kehoop. ₂₂Awer, wën en xtërkere man en iwerfalt un kewint tëm ap, nëmt tee tëm ti kanse keweere wech uf was tee sich ferlos hat un ferteelt mit te anere ales was te man hat.

₂₃— Weyer net mit mich is, is keeche mich; un weyer mich net heleft fersamle, is am ferxtraue.

₂₄Yeesus saat wayter:

— Wën en xlechte kayst aus yemant keet, keet er torich plets oone waser, am suuche woo ruue, awer fint net. Tan saat eyer: “Ich keen tsurik noo mayn haus, fon woo ich raus kang sin.” ₂₅Tan khomt eyer tsurik un fint es haus kekheyert un uf keraumt. ₂₆Tan keet er aus un keet noch anere siwe kayste hoole woo noch xlechter sin wii eyer, un al playwe too am woone. Soo, kept tee mënx xlechter traan wii tefoer.

₂₇Wan Yeesus tas kraat kesaat hat, hot en fraa woo unich em folek waar, tëm kexraayt:

— Wii klikich is ti fraa woo tich uf ti welt keprung hot un tich prust kep hot!

₂₈Awer Yeesus antwort:

— Noch kliklicher sin tii woo em Hërkot sayn mensaaj heere un tëm noo leewe.

₂₉Wan en kroos folek sich um Yeesus rom kesamelt hot, hot Eyer aankefang se xpreche un saat:

— Sin ti layt fon hayt tsu taach mool xlecht! Ferlange en wuner als en sinaal fon Hërkot, awer khee ëne sinaal wërt tëne kep, sonst te wuner fon Yoonas. ₃₀Soo wii te Profët Yoonas en sinaal waar fer ti pewooner fon te xtat Niniwe, soo aach te Soon fom Man wërt en sinaal sin fer ti layt fon hayt tsu taach. ₃₁Am Richte Taach, tuut ti kheenichiin fon Sabá sich uf xtele fer aych se konteneere, wayl sii fon waytem khom is fer Salomoon sayn fol wisheet aan heere. Un ich saan sicher tas tee woo too is mee importanter is wii Salomoon. ₃₂Am Richte Taach tuun ti pewooner fon Niniwe sich uf xtele un aych konteneere wayl, wii se Yoonas sayn preetichte keheyert hon, hon se sich keroyert fon sayn sinte. Un ich saan aych sicher tas tee woo too is mee importanter is wii Yoonas.

₃₃Yeesus saat wayter:

— Nimant macht en lamp aan fer uf en ferxtekelt plats hiin tuun ore unich en khorep. Kraat es keeche teel, es licht kept uf en aychne plats hiin ketuun, tas tii woo ins haus khome ales richtich siin khëne. ₃₄Ti aue sin wii en licht fer te khërwer: wën tayn aue kuut sin, kept tayne kanse khërwer fol licht. Awer, wën tayn aue xlecht sin, kept tayne khërwer fol tunkelheet. ₃₅Also, pas uf tas es licht woo pay teyer is khee tunkelheet is. ₃₆Wayl, wën tayne khërwer kans klënsich is, un khee een teel tunkel is, tan kept er kans fol licht wii es paseyert wën tuu ilumineyert kepst fom klans fon en lamp.

₃₇Wan Yeesus uf keheyert hot se xpreche, hot en fariseyer em in kelaat fer in sayn haus es nachts ese ese. Yeesus is kang un hot sich an te tix kesetst. ₃₈Te fariseyer hot sich ferwunert wii er kesiin hot tas Yeesus net ti hënt kewex hat foer em ese. ₃₉Tan saat te Hër tëm:

— Teyer, fariseyer, wext tas klaas un te teler auswenich, awer inwënich sayt teyer fol kewaltichkheet un fol xlechtichkheet. ₄₀Teyer unferxtëniche! Is es net te selwiche woo ti auswënich sayt un ti inwënich sayt kemach hot? ₄₁Soo, kept fer ti aarme layt was in ayre kleeser un in ayre telere is, un soo playpt ales sauwer fer aych.

₄₂— Ay fon aych, fariseyer! Wayl teyer kept tas tseente teel fer Hërkot sokaar fom phefer mëns, fon te aruuta un fom kanse kriins, awer sayt net kerecht mit te anere un liipt te Hërkot net. Un is kraat tas tings woo teyer mache mist, oone tas anere neewe lose.

₄₃— Ay fon aych, fariseyer! Wayl teyer het tsu kërn ti eere plets in te sinakook un kept kërn mit rexpekt aan kexproch uf te prase.

₄₄— Ay fon aych! Wayl teyer sayt kreewer woo mer net siit, kreewer woo ti layt truf treete oone se siin.

₄₅Tan, hot en Kesets mayster fer Yeesus kesaat:

— Mayster, mit tëne wërter tuust tuu uns aach pelaytiche.

₄₆Yeesus antwort:

— Ay fon aych aach, Kesets mayster! Wayl teyer tuut soo xweere lest te layt uf te pukel laate, tas se neekst net phake khëne. Awer teyer macht khee finger krum fer se helfe. ₄₇Ay fon aych! Wayl macht xeene kreewer fer ti profëte, ti selwiche woo ayre foerkhomer umkeprung hon. ₄₈Too temit tsaycht teyer tas teyer tsuu saat mit was ayre foerkhomer kemach hon, wayl tii hon ti profëte umkeprung un teyer paut tëne ti kreewer. ₄₉Tesweche, saat em Hërkot sayn wisheet: “Ich xike tëne profëte un preeticher un tii tuun phaar umpringe un anere tuun se yachte.” ₅₀Tesweche, kewe ti layt fon hayt tsu taach kextrooft weche em toot fon te kanse profëte woo umkeprung kep sin tsayt tas ti welt ketsoo kep is, ₅₁fon Apël pis Sakariias, woo umkeprung kep is tswixe em altaar un tas Hayliche Plats. Yoo, ich saan aych sicher tas tas folek fon hayt kextrooft kept weche tëne kanse profëte woo umkeprung kep sin.

₅₂— Ay fon aych, Kesets mayster! Wayl tëyer het te xlisel woo ti tier fon te Wisheet uf macht. Un soo, net mool teyer selepst keet rin un lost net ti anere rin keen.

₅₃Wan Yeesus too raus kang is, hon ti Kesets mayster un ti fariseyer aankefang em kritiseere mit wuut un hon aankefang fiil frooe se mache iwich aner tings. ₅₄Ti wolte tëm mache etwas ferkheyertes saan woo se penutse khënte fer iim aan se kewe.