Lukas 12

₁Tausente mënxe hon sich kesamelt, soo fiil tas ëne uf te anere ketreet hot. Tan, saat Yeesus te eyerxt fer ti tisiple:

— Past uf mit te fariseyer sayne sauer taaych, was mënt, mit tëne iire falxichkheet. ₂Ales was tsuu ketekt is, kept uf ketekt un was ferxtekelt is kept pekhant. ₃Soo, ales was teyer in te tunkelheet saat, kept im hele taach keheyert. Un ales was teyer im kehëmnis saat, in en tsuune tsimer, kept kans klaar aan kesaat.

₄Yeesus saat wayter:

— Ich fersichere aych, mayn froynte: praycht khee pang hon fon tëne woo te khërwer umpringe, awer tëm noo niks mee mache khëne. ₅Ich tsayche aych fon weem teyer pang mist hon: teyer mist pang hon fon Hërkot, woo net ploos toot mache khan, awer aach noch ti macht hot fer aych in ti hel xike. Yoo, ich saan noch mool: solt pang hon fon Hërkot.

₆— Is es net woer tas finef feelcher fer phaar nikle ferkhaaf kewe? Awer Hërkot ferkest khee ëns fon tëne. ₇Sokaar yeete fon ayre hoer faatem sin ketseelt. Praycht khee pang hon, wayl teyer sayt mee weyert wii fiil feel!

₈Yeesus saat noch:

— Ich saan aych tas, wën yemant unich te layt aan saat tas er mayn is, tan tuut te Soon fom Man aach fersichere, foer te Hërkots ëngle, tas tee persoon sayn is. ₉Awer tee woo unich te layt saat weyer net mayn, tuut te Soon fom Man aach saan foer Hërkots ëngle tas tee persoon net sayn is.

₁₀— Weyer keeche te Soon fom Man xprecht kept fertsayert, awer tee woo keeche te Hayliche Kayst fluuche aus saat kept net fertsayert.

₁₁— Wan se aych nëme fer julkeyert se kewe in te sinakooke ore foer te kowerneyer un autoriteete, praycht aych net khimere, am tënke wii teyer aych tefenteere solt ore was teyer saan solt. ₁₂Wayl, in tëm momënt, tuut te Hayliche Kayst aych lërne was teyer saan solt.

₁₃En man woo unich em folek waar saat fer Yeesus:

— Mayster, xik mayne pruuter ti ërepxaft fon unser fater mit mich teele.

₁₄Yeesus antwort tëm:

— Man, weyer hot mich als richter ore als yemant woo aychentum ferteele tuut unich aych aan kextelt?

₁₅Too hot Eyer wayter fer al kesaat:

— Kept acht! Past uf mit yeete kelt keerichum; wayl en mënx sayn echt leewe is net ti raychtum woo eyer hat, wën tii ach kroos is.

₁₆Un Yeesus hot tëne noch en paraapel fertseelt:

— En rayche man sayne khamp hot en fol ërnt protutseyert. ₁₇Un tee hot sich iwerleet, fer sich selwer am saan: Was mache ich, wayl ich hon net kenuuch plats fer ti kans ërnt uf heepe? ₁₈Un saat fer sich selwer: — Ich mache es soo: ich rayse mayn xep ap un tuun se noch mool kreeser uf paue, tan khan ich too ti kroos ërnt un mayn kans raychtum wech tuun. ₁₉Tan, wil ich saan fer mayn seel: Host fiil raychtum fer fiile yoore wech ketuun; ruu, es, trink un mach tich en kuut leewe. ₂₀Awer, Hërkot saat tëm: Ferikte, ti nacht kept tayn seel tich ferlangt; un was tuu prepareyert host, fer weem playpt tas?

₂₁Yeesus saat, tsum xlus:

— Soo paseyert tas mit tëne woo fer sich selepst raychtum uf heepe un net raych sin fer Hërkot.

₂₂Tan, hot Yeesus fer sayn tisiple kesaat:

— Is tesweche woo ich aych saan: macht aych khee soriche mit ese woo teyer praycht fer se leewe, net mool mit tsaych woo teyer praycht fer aych se klayte. ₂₃Wayl es leewe is mee weyert wii es ese un te khërwer is importanter wii es tsaych. ₂₄Kukt mool ti feel: ti seeye net, ërnte net, hon khee xop, awer Hërkot kept tëne se ese. Meecht teyer net mee weyert sin wii ti feel? ₂₅Weyer fon aych khan, torich soriche, sayn leewe lënger mache? ₂₆Also, wën teyer etwas soo kleenes net khënt fërtich pringe, warom khimert teyer aych mit tëm aneres? ₂₇Kukt mool wii ti pluume uf em khamp wakse: ti xafe net, un mache khee tsaych fer sich selepst. Awer ich saan fer aych tas net mool Salomoon, woo soo raych waar, soo xeen tsaych aan ketsoo hat wii een fon tëne pluume. ₂₈Is Hërkot woo ti planse uf em khamp klayte tuut, woo hayt too sin un moye ferxwine, im oofe ferprënt. Tan is es klaar tas Eyer aach aych klayte tuut, woo soo en kleene klaawe hot! ₂₉Soo, kept net unruich, imer am suuche was se ese ore was se trinke. ₃₀Wayl, ti layt fon tee welt woo Hërkot net khëne sin tii woo imer tas ales am suuche sin. Ayre Fater wees tas teyer tas ales praycht. ₃₁Also, tuut uf es eyerxte plats in ayer leewe te Hërkots Raych, un Hërkot wërt aych mit tëm aneres fersoriche.

₃₂Yeesus saat wayter:

— Say oone pang, mayne kleene krup fon tisiple. Wayl ayre Fater hot kefale in aych te Raych se kewe. ₃₃Ferkhaaft ales was teyer hat un kept tas kelt fer ti aarme. Hoolt thaxe woo net kaput keen un heept ayer raychtum im himel uf, woo se nii ën wil hon; wayl tort khëne ti xpitspuuwe se neet xteele, un ti fixelcher ore mote se net ferfrese. ₃₄Wayl, woo ayer raychtum is, too wërt ayer hërts aach sin.

₃₅Un Yeesus saat noch:

— Playpt prepareyert fer ales: lost aych fërtich aan ketsoo un mit ayre lampe aan kextoch. ₃₆Sayt wii ti knechte woo sayne hër waarte, wën tee fom hochtsayt fest hëm khomt. Klaych wën eyer an ti teyer klope tuut, keen ti knechte uf mache. ₃₇Kliklich ti knechte woo te hër wach un prepareyert fint! Ich fersichere aych tas tas woer is: te aychne hër prepareyert sich fer tii se petiine, xikt se sich an te tix setse un eyer selepst tuut se petiine. ₃₈Ti wëre kliklich sin wën te hër se fint am wache, wën eyer ach um halep nacht aan khomt ore sokaar noch xpeeter. ₃₉Erinert aych: wën te hër fom haus wist an was fer uertsayt te xpits puup khome teet, teet er em net es haus uf preche lose. ₄₀Teyer aach, playpt am wache, wayl te Soon fom Man khomt aan wën nimant am waarte is.

₄₁Tan hot Pheeter kefroot:

— Hër, is tii paraapel ploos fer uns ore is se fer ti layt al?

₄₂Te Hër hot keantwort:

— Weyer is, tan, te leaale un kluuche knecht? Is tee woo te Hër kexikt hot sayn haus uf pase un ese kewe an te richtich uertsayt fer ti anere knechte. ₄₃Kliklich is te aarwater woo tas am mache is wën te hër aan khomt! ₄₄Ich fersichere aych tas, in te woerheet, te Hër wërt em aan xtele fer sayn kans aychentum uf pase. ₄₅Awer, petënkt aych mool was paseere tuut mit tëm knecht woo tënkt te hër teet tsu lang taure fer tsurik hëm se khome. Un petënkt aych mool tas tee knecht aanfangt ti anere knechte se ferxlaan un ese un trinke pis er pesof kept. ₄₆Tan khomt te hër tsurik am taach woo te knecht kraat net am waarte is un an en xtun woo er net wees. Tan tuut te hër xike er solt kextrooft kewe un kept hiin kexikt woo ti xlechte knechte hiin khome.

₄₇— Te knecht woo wees was te hër wil, awer tuut sich net prepareere un macht net was er wil, kept fiil ferpaytxt als xtroof. ₄₈Awer te knecht woo net wees was te hër wil un macht etwas woo kextrooft mus sin, tee knecht kept weenich ferpaytxt. Soo, fer wëm fiil kep waar, fon tëm kept aach fiil ferlangt; un, fer wëm noch mee kep waar, soo fiil meyer waart te Hër fon tëm.

₄₉Yeesus saat wayter:

— Ich sin khom fer fayer uf ti Ëyert aan xteche un ich het kërn tas teet xon in hele flame prëne! ₅₀Ich mus noch en taaf uf mich nëme, un ich sin aarich unruich pis tas paseyert. ₅₁Tënkt teyer ich weyer friite pringe khom fer ti welt? Also, ich saan aych tas ich net te friite pringe khom sin, awer sin khom tas ti mënxe sayn sayt aus suuche. ₅₂Wayl, fon hayt aan foran, en familye mit finef persoone wërt sich teele: tray keeche tswaay un tswaay keeche tray. ₅₃Ti eltre playwe keeche ti khiner un ti khiner keeche ti eltre. Ti motere keeche ti tochtere un ti tochtere keeche ti motere. Ti xwiicher motere keeche ti xwiicher tochtere un tii keeche sayn xwiicher motere.

₅₄Yeesus saat aach fer tas folek:

— Wën teyer en wolek siit uf xtaye im wëst, saat teyer klaych: “Es kept reen”. Un, es tuut wërklich reene. ₅₅Un, wën teyer te siit wint ploose xpiert, saat teyer: “Es kept hays”. Un es macht hits. ₅₆Teyer Xayn Hayliche! Teyer wist ti sinaale fom himel un fon te eyert ausleye. Tan, warom wist teyer net ausleye was ti sinaale fon tee tsayte saan wole?

₅₇Un Yeesus macht xlus, am saan:

— Warom tuut teyer net selepst aus suuche was richtich is se mache? ₅₈Wën yemant aych aan kept un aych uf es kericht ruuft, macht ales was meechlich is fer ales resolweere iwich em weech mit tëm persoon. Tas tee tich net an te richter nëmt, un te richter tich em politsay ap kept un tee tich in ti katee xtecht. ₅₉Ich saan tich sicher tas tuu net too raus khomst eep tuu te letste nikel petsaale tuust.