Lukas 13

₁In tee selwich tsayt sin phaar layt khom un hon fertseelt fer Yeesus wii Pilatus kexikt hat fiil kalileyer umpringe, wii se fer Hërkot keopfert hon. ₂Too saat Yeesus:

— Mënt teyer tas, wayl tii kalileyer soo en xrekliche toot hate, hot tas se petayte tas tii xlimere sinte hate wii ti anere kalileyer? ₃Nee! Ich saan aych tas, wën teyer aych net ënere tuut, khomt teyer kraat soo um wii tii aach. ₄Un tënkt an ti achtseen, fon Siloee, woo um khom sin wan te thorem uf se kefal is. Mënt teyer tas tii xlechter waare wii ti anere woo in Yeruusalëm kewoont hon? ₅Nee! Ich saan aych tas, wën teyer aych net ënere tuut, khomt teyer kenau soo um wii tii aach.

₆Tan hot Yeesus tii paraapel fertseelt:

— Waar mool en man woo en fayche paam keplanst hat in sayne wayn përich. Awer, wii eyer phaar fayche preche wolt, waare kheen. ₇Too saat eyer fer te man woo te wayn përich uf kepast hot: “Kuk mool! Es sin xon tray yoore woo ich fayche hoole khome an tee paam un fine kheen. Xnayt te fayche paam um! Warom sol mer tee xteen lose, em potem sayn naarung wech hoole, fer niks?” ₈Awer te aarwater hot keantwort: “Hër, los te fayche paam noch tas yoer xteen. Ich tuun te potem runterom kuut putse un tuun khunst tinger traan. ₉Wën te paam im neekste yoer fayche kept, tan is es kuut. Wën er khee kept, tan khanst tuu em um xnayte.”

₁₀An en samstach, hot Yeesus kexproch in en sinakook. ₁₁Un tort is en fraa hiin khom woo xon achtsen yoore krank waar, weche en xlechte kayst. Tii is krump kang un khont sich net xtrak mache. ₁₂Wii Yeesus ti fraa kesiin hot, hot er se keruuf un saat:

— Fraa, tuu pist yets heel.

₁₃Too hot eyer sayn hënt iwich te fraa sayne khop kehal, too khont se sich klaych xtrak uf xtele un hot Hërkot keloopt. ₁₄Awer te xëf fon te sinakook hot sich keayert wayl Yeesus yemant uf samstach keheelt hat. Tesweche, saat eyer fer tas folek:

— Es kept seks taache fer se xafe. Tan khomt in tee taache fer keheelt kewe, awer, am samstach, net!

₁₅Too hot te Hër keantwort:

— Teyer xayn hayliche! Am samstach keet yeete eene fon aych an te xtal un pint sayne oks ore sayne muule ap un nëmt em fer waser trinke. ₁₆Un tii fraa, woo fom Aapraham sayn familye heyer khomt, waar xon achtsen yoore aan kepun mit em Sataan. Un tas sol net richtich sin tas tii pefrayt khan kewe an en samstach?

₁₇Em Yeesus sayn keechner muste sich xeeme mit tee antwort, awer tas kanse folek is froo kep mit em wunerlich tings woo Yeesus kemach hot.

₁₈Yeesus saat:

— Wii is Hërkots Raych? Mit was khan ich em ferklayche? ₁₉Is wii en mustart khorn woo yemant in sayn kaarte planst. Tas plënsye wakst un kept en paam, un ti feelcher mache nistcher uf sayn est.

₂₀Yeesus saat wayter:

— Mit was khan ich Hërkots Raych ferklayche? ₂₁Is wii heep, woo en fraa unich tray teeler meel mëngt, pis te taaych kans uf keet.

₂₂Yeesus hot keuntericht in xtet un kleenere plets woo eyer torich kang is, iwer em weech noo Yeruusalëm. ₂₃Yemant hot kefroot:

— Hër, sin es weenich woo keret kewe?

Yeesus hot keantwort:

₂₄— Macht fon alem tas teyer torich ti ëng teyer rin khomt. Ich saan aych, tas fiil wole rin keen, awer kriin es net kemach.

₂₅— Te hër fom haus xtayt uf un macht ti teyer tsuu. Tan playpt teyer traus xteen, klopt an te teyer un saat: “Hër, los uns rin keen!” Un tee tuut antworte: “Ich wees net fon woo teyer heyer khomt.” ₂₆Tan saat teyer: “Meyer hon kes un ketrunk pay tich. Un tuu host an unser xtat kexproch.” ₂₇Awer tee tuut antworte: “Ich wees net fon woo teyer heyer khomt. Keet meyer foer te aue wech, teyer woo ploos tas xlechte macht.” ₂₈Wën teyer Aapraham, Iisak, Yaakop un ti kanse profëte im Kotes Raych siit un teyer sayt yaus, tan wërt teyer prile un ti tseen kwiitxe fon hofnungsloos. ₂₉Fiil khome fom Oost un fom Wëst, fom Nort un fom Siit un setse sich im Kotes Raych an te tix. ₃₀Un tii woo yets ti letste sin, wëre tan ti eyerxte sin, un tii woo yets ti eyerxte sin, wëre ti letste sin.

₃₁Too sin phaar fariseyer tsu Yeesus khom am saan:

— Kee fon too fort, wayl Herootes wil tich umpringe.

₃₂Yeesus hot keantwort:

— Keet un saat fer ti fuks, ich het tas kesaat: “Hayt un moye tuun ich xlechte kayste fort yaan un layt heele, un am trite taach mache ich mayn aarwat fërtich.”

₃₃Un Yeesus hot wayter kesaat:

— Ich mus awer hayt, moye un iwermoye mayn weech noch noo keen; wayl en profët mus in Yeruusalëm umkeprung kewe.

₃₄— Yeruusalëm, Yeruusalëm, woo ti profëte umpringt un xteen wëreft noo tii woo em Hërkot sayn wort aych pringe! Wii fiil mool wolt ich tas kanse folek umaarme, soo wii en hinkel ti pipcher unich ti flite nëmt, awer teyer wolt net! ₃₅Yets kept ayer haus komplët inxtich kelos. Ich saan aych, tas teyer mich net mee siit, pis ti tsayt khomt woo teyer saat: “Hërkot seechen tee woo in tayne naame khomt!”