En aner heelung uf samstachs
1An en samstach, is Yeesus ins haus fon en importante fariseyer kang fer se ese, un ti layt hon en mit acht opserweyert. 2En man, woo peen un aarme kexwol hat, is ticht pay Yeesus khom. 3Tan, hot Yeesus kefroot fer ti Kesets mayster un fer te fariseyer:
— Was saat unser kesets: tëref mer ore tëref mer net uf samstachs en heelung mache?
4Tii, awer, hon niks keantwort. Un, Yeesus hot te man kehool, hot em keheelt un hot em ap kexikt. 5Tëm noo, froot eyer tëne:
— Wën ayer khint ore ayre oks in en prune falt, tuut teyer em net klaych raus hoole, wëns ach uf en samstach paseyert? 6Un ti khonte niks too truf antworte.
Humiliteet un Kast Froyntxaft
7En mool waar Yeesus am peoopachte wii ti layt imer ti peste plets am tix aus suuche. Tan hot eyer tii ferklaychung kemach:
8— Wan yemant tich inlaat fer en hochtsayts fest, sets tich net uf es peste plats. Wayl khan sin tas yemant woo mee important is in kelaat kep is. 9Tan, tee woo ti tswaay in kelaat hot, wërt fer tich saan: “Kep tas plats fer tee.” Tan, wërst tuu pexeemt un must tich uf es letste plats setse. 10Im keeche teel, wëns tuu in kelaat kepst, sets tich uf es letste plats. Soo, weyer tich in kelaat hot, wil fer tich saan: Mayne froynt, khom tichter, tich uf en peser plats setse. Un tas wil en kroose eer fer tich sin foer te anere in kelaate layt. 11Wayl, weyer sich selwer mee wii ti anere rechent, kept erniitricht, awer weyer sich erniitricht, kept keeert.
12Tëm noo saat Yeesus fer te man woo em in kelaat hat: — Wan tuu en mitach ese ore en nachts ese aan saast, tuu net tayn froynte inlaate, net tayn kexwister, net tayn ferwante, net tayn rayche nachparx layt. Wayl tii kans sicher tich aach inlaate tuun un soo tuun se tayn frontlichkheet petsaale. 13Awer, wan tuu en fest machst, tuu ti aarme, ti laame un ti plinte inlaate 14un tan kepst tuu keseechent. Wayl tii khëne net petsaale was tuu kemach host, awer Hërkot petsaalt tich am taach woo ti layt woo tas kuutes tuun witer peleepe.
Ti paraapel fom kroose fest
15Eene fon tëne woo am tix waar, hot tas keheyert un saat fer Yeesus:
— Kliklich tii woo sich an te tix setse im Hërkots Raych!
16Tan saat Yeesus tëm:
— Seliche man hot fiil layt in kelaat fer en fest woo eyer mache teet. 17Wii ti uertsayt khom is, hot eyer sayne tiiner kexikt saan fer ti layt woo in kelaat waare: “Khomt, wayl ales is xon fërtich!”
18— Awer tii, eene noo em anere, hon aankefang ausreet se suuche. Te eyerxte saat fer te tiiner: “Ich hon en nay xtik lant kekhaaft un ich mus tas noo kuke keen. Ich pite, unxultich mich!”
19— Anere saat: “Ich hon finef xpane okse kekhaaft un ich mus siin op se kuut xafe. Ich pite, unxultich mich!”
20— Un noch anere saat: “Ich hon kraat kehayrat un, tesweche, khan ich net keen.”
21— Te tiiner is tsurik kang un hot ales fer sayne hër fertseelt. Tee is aarich wuutich kep un saat: “Kee xnel torich ti xtroose un torich ti eke fon te xtat un pring ti aarme, ti tefisiënte, ti paraliseyerte, ti plinte un ti laame.”
22— Xpeeter hiin, saat te tiiner: “Hër, ich hon xon kemach was tuu kexikt host, awer is imer noch plats iwerich.”
23— Tan, hot te Hër keantwort: “Tan kee torich ti xtroose un weeche un mach tas tii woos tuu too pekeechenst khome tuun, tas mayn haus fol kept. 24Wayl, ich saan sicher fer aych tas khee ëne fon tëne woo te eyerxt in kelaat kep waare mayn ese xmeke tuut!”
Was Yeesus ferlangt fon tëne woo iim noo keen
25Waar mool en kroos folek mit Yeesus am keen. Eyer hot sich noo tëne kewënt un saat:
26— Weyer mit mich keen wil khan net mayne tisipel sin wën eyer mich net mee liipt wii sayne fater, sayn moter, sayn fraa, sayn khiner, sayn kexwister un sokaar sich selepst. 27Khan net mayne tisipel sin weyer net fërtich is fer se xtërwe wii ich xtërwe wërt un mit mich keen, 28Wën yemant fon aych en haus paue wil, setst sich te eyerxt un rechent wii fiil tas khoste sol, fer siin op sayn kelt kenuuch is fer es fërtich mache. 29Sonst hat eyer filaycht te funtamënt keleet un khan net wayter paue. Tan, al tii woo tas siin tuun em ferxpote, am saan: 30“Tee man hot aankefang se paue un khont es net fërtich mache.”
31— Wën en kheenich woo tseen tausent soltaate hat kriich keeche en anere kheenich mache wil woo keeche iim khomt mit tswansich tausent soltaate, mus eyer sich setse un iwerleye op eyer kenuuch kraft hot fer tas se mache. 32Wën net, teet eyer peser mache, wën eyer yemant foer xike teet fer friite pextime, soo lang wii tee noch wayt wech is.
Yeesus macht xlus, am saan:
33— Nimant fon aych khan mayne tisipel sin wën eyer net ales tsurik lost was er hot.
Sals oone kexmak
34— Te sals is etwas nutsliches; awer, wën eyer te kexmak ferleere tuut, is es khee sals mee. 35Kept eyer wech kexmis, wayl tiint net mee fer ti eyert un net fer khunst tinger. Weyer oore hot sol kuut heere.
