Lukas 8

₁En tsayt tëm noo is Yeesus aus kang un is torich xtet un wile kereest, ti kuut naychkheet am aan saan fon Hërkots Raych. Ti tswelef tisiple sin mit em kang, ₂un aach phaar fraae woo fon xlechte kayste pefrayt kep waare un fon krankheete keheelt kep. Tas waare Maria, Matalena kenënt, fon weem siwe temoone raus kextoost kep waare; ₃Yohana, Kusa sayn fraa, woo en hooche aan kextelte fon Herootes sayn rechiirung waar; Susana un fiile anere fraae woo, mit sayn aychne xpënte, Yeesus un sayn tisiple keholef hon.

₄En kroos folek, woo fon fiile xtet pay khom waar, hot sich um Yeesus rom kesamelt. Wii se al paysamer waare, hot Yeesus tii paraapel tëne fertseelt:

₅— En man is aus kang fer se seeye. Un, wii eyer ti soome am aus xtraue waar, sin phaar langst te weech kefal, woo ti layt se fertreet hon un ti feel hon se uf kephikt. ₆Anere soome sin hiin kefal woo fiil xteen waare, un, wii se aankefang hon se khayme, sin se fertrokent wayl khee kenuuch faychtichkheet waar. ₇En aner teel is tswixich ti tërner kefal, woo mit te planse kewakst sin un hon se ferxtrike kemach. ₈Awer phaar soome sin uf kuute potem kefal. Ti planse sin kewakst un hon hunert khërner protutseyert fer yeete soome.

Un Yeesus saat tsum xlus:

— Weyer oore hot sol kuut heere!

₉Yeesus sayn tisiple hon kefroot was eyer saan wolt mit tee paraapel. ₁₀Yeesus antwort:

— Fer aych tsaycht Hërkot ti kehëmnis fon sayne Raych. Awer fer ti anere kept ales kelërnt torich paraaple, tas se kuke un net siin khëne un tas se heere un net ferxteen.

₁₁— Was ti paraapel petayte wil is tas: te soome is Hërkot sayn wort. ₁₂Ti soome woo langst te weech kefal sin, sin ti layt woo ti wërter heere. Awer te Taywel khomt un nëmt ti mensaaj aus tëne sayn hërts tas se net klaawe un tas se net keret kewe. ₁₃Ti soome woo hiin kefal sin woo fiil xteen waare sin ti layt woo ti mensaaj mit kroos frayt aan heere. Ti hon khee wortsle un tesweche klaawe se ploos en khorts tsayt; un, wën se in proop kextelt kewe, lose se ales in xtich. ₁₄Ti soome woo tswixich ti tërner kefal sin, sin ti layt woo ti mensaaj heere, awer ti soriche, ti raychtum un ti ferkniichunge fom leewe ferkreesere sich un tuun se ferxtrike mache. Tesweche tuun se khee fruchte protutseere. ₁₅Un ti soome woo uf kuute potem kefal sin, sin ti layt woo ti mensaaj heere un tuun se uf heepe in sayn kuut un wilich hërts; un, wayl se leal sin, protutseere se kuute fruchte.

₁₆Yeesus saat wayter:

— Nimant macht en lamp aan un tëm noo tuut se unich en khorep ore unich en pët. Im keeche teel, ti lamp kept uf en lamp xtëner ketuun tas al tii woo ins haus khome tas licht siin khëne. ₁₇Wayl ales was ferxtekelt is, kept entekt, un ales was in kehëmnis is, wërt pekhant kemach un wërt feroot.

₁₈— Soo, past uf tas teyer richtich heyert. Tan, weyer fiil hat, tëm wërt noch mee kep; awer weyer weenich hat, sokaar was eyer tënkt er het wërt iim wech kehool.

₁₉Yeesus sayn mama un sayn priiter sin aan khom, awer weche tëm kroose folek khonte se net ticht pay em hiin khome. ₂₀Tan saat yemant fer Yeesus:

— Tayn mama un tayn priiter sin yaus un wole mit tich xpreche.

₂₁Awer Yeesus saat fer se al:

— Mayn mama un mayn priiter sin tii woo em Hërkot sayn wërter heere un tëm noo hantle.

₂₂En taach is Yeesus uf en poot kextii mit sayn tisiple un saat:

— Meyer faare uf ti aner sayt fon te lakoo.

Tan sin se ap kefaar.

₂₃Soo lang wii se ti lakoo am iwer faare waare, is Yeesus in kexloof. En xtarke wint hot aankefang se ploose un en xtorem is uf kextii, un te poot is fol waser kep, soo tas se al in kefoer waare. ₂₄Tan sin ti tisiple ticht pay Yeesus khom un hon em wach kemach, am saan:

— Mayster, Mayster! Meyer khome um!

Yeesus is uf kextii un hot en ortnung këp fer te wint un fer te xtorem. Tan is es weter xtil keplip.

₂₅Tan saat er fer ti tisiple:

— Hot teyer khee klaawe?

Awer ti waare ferwunert un fol pang un saate ëne fer ti anere:

— Was fer man is tas? Te xikt sokaar iwer te wint un iwer ti wele, un tii tuun em aan heere!

₂₆Yeesus un sayn tisiple sin an ti rechioon fon Gerasa aan khom, an ti aner sayt fon Kalilëya. ₂₇Klaych wii Yeesus fom poot aus kextii is, is en man fon tee xtat mit tëm sich pekeechne khom. Tee man waar tomineyert fon temoone. Xon lang tsayt heyer, hot eyer khee tsaych mer aan ketsoo kehat un hot nime in en haus kewoont, awer hot in te kreewer fom friithoof keleept. ₂₈Wii eyer Yeesus kesiin hot, hot te man en xraay kelos, is foer Yeesus uf te potem kefal un saat in hat xtim:

— Yeesus, Soon fom Heechste Hërkot! Was wilst tuu fon mich? Ich pite, tuu mich net xtroofe!

₂₉Tee saat tas wayl Yeesus kexikt hat tas te temoon aus iim solt keen. Tee hot em oft mool kekrif kehat. Ti layt hate sokaar xon tëm ti fiis un ti hënt samer kepun kehat mit aysne khete, awer tee hat se ferproch, un te temoon hot em pis in te tesërt kefiert.

₃₀Yeesus hot tëm kefroot:

— Wii heest tuu?

Eyer hot keantwort:

— Mayne naame is Xworem!

(Tee saat tas wayl fiile temoone iim pesetst hate). ₃₁Tan hon ti temoone tringlich ferlangt tas Yeesus se net in te apismus xike solt.

₃₂Fiil xwayn waare too ticht an en përich am frese. Ti temoone hon tringlich fer Yeesus ferlangt tas er se in ti xwayn keen lose solt, un Yeesus hot kelos. ₃₃Tan sin se aus em man kang un sin in ti xwayn kang, woo sich em përich runer kexmis hon, in ti lakoo un sin fersof.

₃₄Wan ti mëner woo ti xwayn am uf pase waare kesiin hon was paseyert waar, sin se aus keris un hon ti naychkheete aus keteelt in te xtat un in te keechent. ₃₅Fiil layt sin kuke kang was paseyert waar. Wan se ticht pay Yeesus khom sin, hon se te man kesiin fon weem ti temoone raus kang waare. Un sin ferxrok wayl er an Yeesus sayn fiis kesitst hot, waar keklayt un in sayne perfekte ferxtant. ₃₆Tii woo ales kesiin hate, hon fer es folek fertseelt wii te man keheelt kep waar. ₃₇Tan is tas kanse folek fon te rechioon fon Gerasa fol mit pang kep un hot ferlangt tas Yeesus aus sayn lant këngt. Tan is Yeesus uf te poot kextii un is fort kefaar. ₃₈Un te man fon wëm ti temoone raus kextoost kep waare, hot fer Yeesus aan kehal:

— Los mich mit aych keen!

Awer Yeesus hot em ap kexikt, am saan:

₃₉— Kee hëm un fertseel was Hërkot fer tich kemach hot.

Tan is te man torich ti xtat kang am fertseele was Yeesus iim ketuun hat.

₄₀Wan Yeesus tsurik khom is, hot en kroos folek em ap kehool mit frayt, wayl al waare too keplip iim am waate. ₄₁Tan is en man khom, woo Jairo keheest hot, woo xëf waar fon te sinakook fon tëm plats. Tee hot sich an Yeesus sayn fiis kexmis un hot tringlich ferlangt tas er an sayn haus khome solt ₄₂wayl sayn eensichst meetche, mit tswelef yoer, waar am xtërwe.

Iwich em weech, hot tas folek Yeesus fertrikt fon aler sayte. ₄₃Too triwer, is en fraa tichter khom, woo xon tswelef yoer en ferpluutung hat. Tii hat xon ales aus kep was sii hat, mit toktre, awer nimant khont se heele. ₄₄Ti is Yeesus hine noo khom un hot an te saum fom Yeesus sayne mantel kethupt. ₄₅Too hot Yeesus kefroot:

— Weyer hot aan mich kethupt?

Al hon nee kesaat. Tan saat Pheeter:

— Mayster, tas kanse folek is um tich rom un tich am fertrike.

₄₆Awer Yeesus saat:

— Yemant hot mich aan kethupt, wayl ich hon kexpiert tas fon mich kraft raus kang is.

₄₇Tan is ti fraa, am siin tas se sich net wayter ferxtekle khont, tichter khom, am tsitre, un hot sich foer Yeesus sayn fiis keleet. Un, foer te kanse layt, hot se fer Yeesus kesaat warom se aan em kethupt hot un wii se keheelt kep waar im selwiche momënt. ₄₈Tan saat Yeesus:

— Mayn khint, tuu pist heel kep wayls tuu keklaapt host! Kee in friite.

₄₉Yeesus waar noch am xpreche, wii fon Jairo sayn haus en knecht khom is, woo saat:

— Hër Jairo, tas meetche is xon kextorep. Prauchst net mee te Mayster xteere.

₅₀Yeesus hot tas keheyert un saat fer Jairo:

— Khee pang hon; hal tayne klaawe, un ti wërt noch mool kesunt kewe.

₅₁Wan Yeesus an Jairo sayn haus khom is, hot er Pheeter, Yohan un Tiaako mit rin keruuf, un noch em meetche sayne fater un moter, sonst nimant.

₅₂Ti kanse layt woo too waare, waare am prile un hon keyoomert weche em meetche. Tan saat Yeesus:

— Prilt net, tas meetche is net toot; tas xlooft ploos.

₅₃Tan hon se aankefang em se ferxpote, wayl ti wuste tas es khint toot weyer. ₅₄Awer Yeesus is kang, hot tas meetche an ti hant kehool un saat in hat xtim:

— Meetche, xtay uf!

₅₅Tas is noch mool leewent kep un is klaych uf kextii. Tan hot Yeesus kexikt solte tëm ese kewe. ₅₆Tëm sayn eltre hon sich aarich ferwunert, awer Yeesus hot kexikt tas se fer nimant fertseele solte was paseyert waar.