Lukas 7

₁Wan Yeesus tas tings ales fer es folek kesaat hat, is eyer noo te xtat Kafarnaum kang. ₂Tort waar en reemixe ofitseyer woo en aarwater hat, weem eyer mechtich kërn hat. Tee aarwater waar aarich krank, neekst am xtërwe. ₃Wan te ofitseyer fon Yeesus xpreche keheyert hot, hot eyer phaar yute fiirer kexikt fer se ferlange tee solt sayne knecht heele khome. ₄Tii sin mit Yeesus xpreche kang un hon tëm tringlich ferlangt:

— Tee man is wërklich tayne hilef weyert, ₅wayl tee liipt unser folek un hot sokaar en sinakook kepaut fer uns.

₆Tan is Yeesus mit tëne kang. Awer, wan eyer xon ticht am haus waar, xikt te reemixe ofitseyer tëm froynte inkeeche fer se saan:

— Hër, net tich ayre, wayl ich sin es net weyert tas tuu in mayn haus rin khomst. ₇Un ich mëne aach tas ich ti eere fer mit teyer se xpreche net fertiint hon. Saa noore een wort, un wërt mayne aarwater kesunt. ₈Ich sin aach unich te autoriteet fon heechre ofitseere un ich hon soltaate woo meyer heere. Ich saan fer eene: “Kee tort hiin”, un tee keet. Ich saan fer en anere: “Khom heyer”, un tee khomt. Un ich saan aach fer mayne knecht: “Mach tas”, un tee machts.

₉Yeesus hot sich mechtich ferwunert wii eyer tas keheyert hot. Tan hot er sich rom ketreet un saat fer tas folek woo em noo kang is:

— Ich saan aych tas ich noch nii soo en kroose klaawe kesiin hon, noch net mool in Israël!

₁₀Too, wii em ofitseyer sayn froynte in tëm sayn haus tsurik khom sin, waar te knecht kesunt.

₁₁Klaych tëm noo is Yeesus noo en xtat kang woo Naym heest. Sayn tisiple un fiil layt sin mit em kang. ₁₂Wii eyer ticht ans toer fon te xtat am khome waar, waare layt raus am keen woo en toote ketraan hon fer se pekraape. Te toote waar te eensichste soon fon en witfraa, un fiil layt fon te xtat sin mit tëne kang. ₁₃Wii Yeesus ti fraa kesiin hot, hot eyer se mechtich ketauert un saat:

— Net prile.

₁₄Too is eyer tichter khom un hot an te sarich kefaar. Un tii woo te sarich am traan waare, hon xtil kehal. Too saat Yeesus:

— Puup, ich ortne teyer: xtay uf!

₁₅Tee puup hot sich im sarich uf kesetst un hot aankefang se xpreche, un Yeesus hot te puup fer sayn mama ap kep. ₁₆Ti layt hon al mechtich pang kriit un hon Hërkot keloopt, am saan:

— Was en kroose profët is unich uns tsum foerxayn khom! Hërkot is sayn folek rete khom!

₁₇Tas tings iwer Yeesus is pekhant kemach kep un hot sich ferxtraut iwer tas kanse lant un ti kans rechioon woo tas lant um kekrayst hot.

₁₈Em Yohan sayn tisiple hon tas ales tëm fertseelt. Too hot Yohan tswaay fon tëne keruuf ₁₉un hot se kexikt fer em Hër Yeesus se frooe: “Pist tuu tee woo het sole khome ore sole meyer en anere waarte?” ₂₀Too sin se ans plats hiin kang woo Yeesus waar un hon kesaat:

— Yohan Te Taafer hot uns kexikt soo frooe: pist tuu tee woo het sole khome ore sole meyer en anere waarte?

₂₁In tee keleechenheet hot Yeesus fiil layt keheelt fon sayn krankheete un layte, hot ti xlechte kayste raus keyaat un hot aach ti plinte keheelt. ₂₂Too hot eyer fer em Yohan sayn tisiple keantwort:

— Keet tsurik un fertseelt fer Yohan ales was teyer kesiin un keheyert hot. Saat fer tee tas ti plinte siin, tas tii laame keen, tii lëpra kranke kewe heel, tii taape heere, tii toote xtaye uf un ti aarme heere te ewankeelium. ₂₃Un kliklich sin ti mënxe woo net fon meyer tswayfle!

₂₄Wii em Yohan sayn tisiple fort kang sin, hot Yeesus fer tas folek soo aan kefang se saan fom Yohan:

— Was sayt teyer in te tesërt hiin kuke kang? En roer xtang woo sich piye tuut mit em wint? ₂₅Was sayt teyer kuke kang? En man woo fayn tsaych aan hot? Layt woo sich fayn aan hon un leewe im lux, woone in te palase! ₂₆Tan saat meyer: was sayt teyer kuke kang? En profët? Ich fersichre es aych tas teyer fiil mee wii en profët kesiin hot. ₂₇Wayl Yohan is tee fon weem ti Hayliche Xrifte saan: “Too is te man woo mayn wort aych pringt”, saat Hërkot. “Ich tuun em foer aan teyer xike fer te weech teyer uf mache.”

₂₈— Ich saan es aych tas, fon te kanse mënxe woo uf ti welt khom sin, is Yohan te kreeste. Awer tee woo te kleenste is im Kotes Raych is kreeser wii tee.

₂₉Ti xtayer kaseerer un tas kanse folek hon tas keheyert. Tas waare tii woo em Hërkot sayn ortnunge aan keheyert hate un waare fon Yohan ketaaft kep. ₃₀Awer ti fariseyer un ti Kesets mayster wolte net fon Yohan ketaaft kewe, un soo hon se te plaan ap ketankt woo Hërkot fer tii hat.

₃₁Un tsum xlus saat Yeesus:

— Mit weem khan ich ti mënxe fon hayt ferklayche? Mit weem klayche tii sich? ₃₂Tii sin wii khiner woo uf em weech xpiile. Een teel ruuft fer ti anere:

₃₆En fariseyer hot Yeesus in kelaat fer nachts ese. Yeesus is pis an tëm sayn haus kang un hot sich kesetst fer se ese. ₃₇In tee xtat hot en fraa kewoont woo net kuut aan kesiin waar. Tii hot es se wise kriit tas Yeesus im fariseyer sayn haus am ese weyer. Too hot se en alapaster kleesye kehool, fol mit riich waser, ₃₈un hot sich an Yeesus sayn fiis kexmis, fon hine pay. Tii hot keprilt un sayn treene hon Yeesus sayn fiis nas kemach. Too hot se ti fiis ap ketrokent mit sayn aychne hoer. Tii hot Yeesus sayn fiis kekhust un hot riich waser triwer kexut. ₃₉Wii te fariseyer tas kesiin hot, hot eyer soo ketënkt: “Wën tee man werklich en profët weyer, teet eyer wise weyer tii fraa is woo an tee am krayfe is un tas sintiche leewe woo sii mit macht.”

₄₀Too saat Yeesus fer te fariseyer:

— Simon, ich hon etwas fer teyer se saan.

Un Simon hot keantwort:

— Xprech, Mayster!

₄₁Yeesus hot kesaat:

— Tswaay mëner hate xulte mit en man woo te layt kelt keleent hot. Eene fon tëne waar finef hunert silwerne nikle xultich, un te anere, fuftsich. ₄₂Awer khee ëne fon te tswaay khont fer te man petsaale woo tëne keleent hat. Too hot tee tëne ti xulte fertsayert. Weyer fon tëne tuut em mee eere?

₄₃Too hot Simon keantwort:

— Ich tënke tas es tee is woo mee fertsayert kep is!

Yeesus hot kesaat:

— Tuu pist richtich!

₄₄Too hot Yeesus sich rom kextelt noo te fraa un saat fer Simon:

— Siist tuu too ti fraa? Wii ich rin khom sin, host tuu meyer khee waser aan kepot fer ti fiis wexe, awer tii hot se kewex mit sayn treene un hot se ap ketrokent mit sayn hoer. ₄₅Tuu host mich net uf te pake kekhust wii ich khom sin; awer tii lost net noo mayn fiis se khuse tsayt ich rin khom sin. ₄₆Tuu host meyer khee riich eel uf te khop ketuun, awer tii hot riich waser uf mayn fiis kexut. ₄₇Ich fersichere tich, tan, tas tee kroose liipe woo sii ketsaycht hot pewayst tas sayn fiile xulte xon fertasayert kep sin. Awer woo weenich fertsayert kept wërt, kept ach weenich liipe ketsaycht.

₄₈Tan saat Yeesus fer tii fraa:

— Tayn sinte sin fertsayert.

₄₉Tii woo am tix kesetst hon, hon aankefang se frooe:

— Was is tas fer man woo pis ti sinte fertsayertt?

₅₀Awer Yeesus saat fer ti fraa:

— Tayne klaawe hot tich keret. Kee in friite.