Lukas 6

₁An en samstach, waar Yeesus torich en weets plansung am keen. Sayn tisiple hon aankefang ti weets eere se ërnte un ap riwle in te hënt un ti khërner ese. ₂Tan hon phaar fariseyer kefroot:

— Warom macht teyer etwas woo unser kesets ferpiit samstachs mache?

₃Yeesus antwort tëne:

— Hat teyer net keleest was Dawii kemach hot wii eyer un sayn mëner hunger hate? ₄Eyer is in Kotes haus rin kang, hot es proot woo keopfert kep waar kehool, hot tefun kes un hot aach fer sayn mëner kep. Awer, is keeche unser kesets yemant fon tëm proot ese; ploos ti priister tërfe tas mache.

₅Un, am ën, saat Yeesus:

— Te Soon fon Man hot autoriteet iwich te samstach.

₆An en anere samstach, is Yeesus in ti sinakook kang un hot aankefang se unterichte. Too waar en man woo sayn rechts hant laam hat. ₇Phaar Kesets mayster un phaar fariseyer hon Yeesus mit acht uf kepast fer siin op tee an samstachs yemant heele teet, wayl tii wolte en uersach fine fer en aan kewe wayl er ti kesetse net noo këngt. ₈Awer, Yeesus hot tëne sayn ketanke kekhënt un, tesweche, saat eyer fer te man mit te laam hant:

— Xtay uf un xtel tich too foer.

Te man is uf kextii un hot sich kextelt. ₉Tan saat Yeesus:

— Ich froe aych: was saat unser kesets iwich te samstach? Was khan mer mache an tëm taach: tas kuute ore tas xlechte? Yemant fom toot rete ore xtërwe lose?

₁₀Yeesus hot se al woo um em rom waare aan kekukt un saat fer te man:

— Xtrek tayn hant!

Te man hot sayn hant kextrekt, un ti is keheelt. ₁₁Tan sin ti Kesets mayster un ti fariseyer wuutich kep un hon aankefang unich sich se xpreche iwich was se khënte mache keeche Yeesus.

₁₂Eene taach is Yeesus uf en përich kang fer se peete un hot ti kans nacht torich te Hërkot aan kepeet. ₁₃Wan es taach kep is, hot er sayn tisiple keruuf un hot tswelef unich tëne aus kesuucht. Un hot tëne tswelef te naame aphostel kep: ₁₄Simon, woo eyer Pheeter kenënt hot un sayne pruuter Antrëas; Yaakop un sayne pruuter Yohann, puuwe fon Sepeteu; ₁₅Filip, Partolomeu, Thoome un Mateus, te xtayer kaseerer; Yaakop, soon fon Alfeu; Tateu ₁₆un Simon, te natsionalist; un Yuutas Iskariotes, woo Yeesus hinerkang hot.

₁₇Yeesus is fom përich runer kang mit tëne uf en eewene plats. En kroos folek waar too kewees. Waare layt fon te kans Yutëya, fon Yeruusalëm un fon Tiiro un Sitoon, xtet woo am rant fom Metiteraan meer kelee hon. ₁₈Ti waare khom fer Yeesus aan se heere un fer keheelt kewe fon sayn krankheete. Ti woo kekweelt waare fon xlechte kayste sin aach khom un sin keheelt kep. ₁₉Al wolte Yeesus aan thupe, wayl fon tëm is en macht khom woo ti kanse layt keheelt hot.

₂₀Yeesus hot noo sayn tisiple kekukt un saat:

₂₆— Ay fon aych wën ti kanse layt aych loope, wayl ti foerkhomer fon tëne layt hon aach ti falxe profëte keloopt.

₂₇— Awer ich saan fer aych woo mich am heere sayt: liipt ayre faynte un macht was kuut is fer ti woo aych hase. ₂₈Winxt kuutes fer tii woo aych ferfluuche un peet fer tii woo aych xlecht pehantle tuun. ₂₉Wën yemant tich ins kesicht haut, hal ti aner sayt hiin, tas eyer tich too aach truf haue tuut. Wën yemant tayne punx wech hoolt, los em te rest tsaych aach hoole. ₃₀Kep imer fer yeete ëne woo tich etwas ferlangt; un, wën yemant wech hoolt was tayn is, ferlang es net tsurik. ₃₁Macht fer ti anere tas selwiche woo teyer wolt tas tii aych mache.

₃₂— Wën teyer ploos liipt tii woo aych liipe, was macht teyer ekstra? Sokaar ti layt woo en xlechte naame hon liipe ti layt woo se liipe. ₃₃Un, wën teyer was kuutes tuut fer tii woo aych was kuutes ketuun hon, was sayt teyer ekstra am mache? Sokaar ti layt woo en xlechte naame hon mache tas. ₃₄Un, wën teyer ploos leent fer tii woo teyer tënkt teere aych petsaale, was sayt teyer ekstra am mache? Sokaar ti layt woo en xlechte naame hon, leene fer layt mit en xlechte naame fer tsurik kriin was se ferleent hon. ₃₅Macht es keeche teel: Liipt ayre faynte un macht kuutes fer tii. Leent un waart net tsurik kriin was teyer keleent hot un, soo, kriit teyer en kroose prays un wërt khiner fom Heechste Hërkot. Macht tas wayl Hërkot aach kuut is fer ti untankpaare un xlechte. ₃₆Sayt paarmhërtsich uf ti anere, soo wii te Himlixe Fater paarmhërtsich uf aych is.

₃₇— Julkeyert net ti anere, un Hërkot tuut aych net julkeere. Konteneyert net ti anere un Hërkot wërt aych net konteneere. Fertsayert ti anere, un Hërkot fertsayert aych. ₃₈Kep fer ti anere, un Hërkot kept fer aych. Er is soo kuut, tas kaape woo Eyer aych kewe wërt soo fiil sin, tas teyer se net in ayre hënt fest hale khënt. Ti selwich moos woo teyer penutst fer ti anere se mese tuut Hërkot penutse fer aych se mese.

₃₉Un Yeesus macht tii ferklaychunge:

— En plinte khan net en anere plinte fiire. Wën er tas macht, tuun ti tswaay in en loch fale. ₄₀Khee xtutënt is peser wii sayne leerer. Awer, wën er fërtich is mit sayne xtuutium, is te xtutënt kraat soo wii sayne leerer.

₄₁— Warom siist tuu tas xpliter woo in tayne pruuter sayn au is un siist net te holsne palke woo in tayn aychne au is? ₄₂Wii khanst tuu fer tayne pruuter saan: “Los mich tas xpliter aus tayn au mache”, wëns tuu net te palke in tayn aychne au mërekst? Xaynhaylich pist tuu! Mach eyerxt te palke aus tayn au un tan khanst tuu kuut siin fer tas xpliter wech mache woo in tayne pruuter sayn au is.

₄₃— Te kuute paam kept khee xlechte fruchte, soo wii te paam woo niks taucht khee kuute fruchte kewe khan. ₄₄Also, yeete paam is pekhant weche te fruche woo er protutseyert. Is net meechlich fayche ërnte an en tëner paam, un khee trauwe ërnte an en prënelse xtok. ₄₅Te kuute mënx pringt foer tas kuutes woo er im hërts hot. Un te xlechte mënx pringt foer tas xlechtes woo er im hërts hot. Wayl tas maul xprecht fon was es hërts fol is.

₄₆— Warom nënt teyer mich “Hër, Hër” un macht toch net was ich saan? ₄₇Ich tsayche aych mit weem sich klaycht te mënx woo khomt un mayn wërter aan heyert un sich noo tëne richt. ₄₈Te mënx klaycht sich mit en man woo, wan er en haus kepaut hot, tiif kekraapt hot un hot ti funtamënte uf ti fels kemach. Tas hooch waser is khom un xmayst keeche tas haus; awer tas is xteen keplip wayl es fest kepaut waar. ₄₉Awer, weyer mayn mensaajr heyert un sich net noo tëm richt, is wii en mënx woo sayn haus uf ti eyert kextelt hot, oone funtamënt. Wan tas waser keeche es kexmis hot, is es klaych um kefal, in xtiker, un is kans uner kang.