Yeesus ruuft sayn eyerxte tisiple
1Eene taach, waar Yeesus ticht am xtrant fon te Kalileye Lakoo, un tas folek hot sich um em rom fertrikt fer em Hërkot sayn wort se heere. 2Er hot tswaay poote in te lakoo kesiin, ticht am xtrant. Ti fixer waare kraat aus kextii un waare ti netse am wexe. 3Yeesus is uf ëne fon te poote kextii, woo em Simon keheyert hot, un hot ferlangt tas er en pisye wayter fom xtrant faare solt. Tan hot er sich kesetst un hot aankefang tas folek se unterichte.
4Wii er fërtich waar mit sayn reet, saat Yeesus fer Simon:
— Faar tayne poot uf en plats woo es waser tiifer is. Tan tuust tuu un tayn khameraate ti netse xmayse fer se fixe.
5Simon antwort:
— Mayster, meyer hon ti kans nacht kexaft un hon niks kefixt. Awer, wayls tuu xikst ti netse xmayse, heere ich un mache es.
6Wan se ti netse ins waser kexmis hon, hon se soo fiil fix kefang, tas ti netse sich am ferayse waare. 7Tan hon se kewinkt tas ti fixer fom anere poot se helfe khome solte. Ti sin khom un hon ti tswaay poote soo fol mit fix kemach, tas se neekst uner kang sin.
8Wan Simon Pheeter kesiin hot was am paseere waar, hot er sich foer Yeesus kekniit un saat:
— Hër, playp wech fon mich, wayl ich sin en sintiche mënx.
9Simon un sayn khameraate waare ferwunert mit te fiile fix woo se kefang hate. 10Tiaako un Yohan, Zebedeu sayn puuwe, woo mit Simon kexaft hon, waare aach fiil ferwunert. Tan saat Yeesus fer Simon:
— Prauchst khee pang hon. Fon hayt aan foran tuust tuu mënxe fixe.
11Tii hon ti poote pis an te xtrant kexlept, hon ales in xtich kelos un sin Yeesus noo kang.
Yeesus heelt en lëpra kranke
12Een mool, waar Yeesus in en xtat woo en man waar woo te kanse khërwer ketekt hat mit lëpra. Wan eyer Yeesus kesiin hot, hot te lëpra kranke sich foer iim hiin kekniit, hot sayn kesicht pis uf te potem niter ketuun un ferlangt:
— Hër, ich wees tas tuu mich heele khanst, wëns tuu wilst!
13Yeesus hot sayn hant kextrekt, hot an te man kefaar un saat:
— Yoo! Ich wil. Tuu pist heel.
Im selwiche momënt is ti lëpra ferxwun. 14Tan hot Yeesus tii ortnung tëm kep:
— Heyer mool! Fertseel tas fer nimant, awer kee fer te priister ferlange tee sol tich unersuuche. Tëm noo, fer se pewayse fer ti layt tas tuu heel pist, kee en opfer mache wii Mooses sayn kesets xikt.
15Awer ti naychkheete iwich Yeesus hon sich noch mee ferprayt, un fiil layt sin khom fer em aan se heere un fer keheelt kewe fon sayn krankhete. 16Awer Yeesus is noo unpewoonte plets kang fer se peete.
Yeesus heelt en laame
17Eene taach waar Yeesus am unterichte, un phaar fariseyer un Kesets mayster hon ticht pay em kehukt. Ti waare fon ale xtet fon te Kalilëya, Yutëya un aach fon Yeruusalëm khom. Em Hër sayn macht waar pay Yeesus tas tee ti kranke heele teet. 18Phaar mëner hon en laame man keprung woo uf en pet kelee hot un wolte tee ins haus rin tuun fer em foer Yeesus niiter leye. 19Awer, weche em kroos folek, sin se net rin khom mit tëm laame. Tan hon se em uf te tach ketraa. Hon phaar tsiichle wech kemach un hon em im pet foer Yeesus runer kelos, tswixich te layt woo too waare. 20Yeesus hot kesiin tas tii klaawe hate un saat fer te laame:
— Mayne froynt, tayn sinte sin fertsayert!
21Ti Kesets mayster un ti fariseyer hon ketënkt:
— Weyer is tee man woo soo fluuche keeche Hërkot aus xprecht? Nimant khan ti sinte fertsaye;. Ploos Hërkot hot tii macht.
22Awer Yeesus wust was tii am tënke waare un saat:
— Warom sayt teyer soo am tënke? 23Was is laychter se saan fer te laame: “Tayn sinte sin fertsayert” ore “Xtay uf un kee”? 24Wayl ich tsayche aych tas ich, te Soon fom Man, ti macht hon uf te eyert fer sinte se fertsaye.
Tan saat er fer te laame:
— Ich saan fer tich: xtay uf, hool tayn pet un kee hëm.
25Im selwiche momënt is te man uf kextii foer te kanse layt, hot sayn pet kehool un is hëm kang, Hërkot am loope. 26Al hon sich fiil ferwunert un, fol pang, hon se Hërkot keloopt, am saan:
— Was en wunerlich tings hon meyer hayt kesiin!
Yeesus un Lewii
27Tëm noo is Yeesus raus kang un siit en xtayer kaseerer, am sitse uf em plats woo ti xtayer imer petsaalt kewe. Yeesus saat tëm:
— Khom mit mich.
28Lewii is uf kextii, hot ales kelos un is Yeesus noo kang. 29Tan hot Lewii en kroos fest fer Yeesus kemach in sayn haus. Too waare fiile xtayer kaseerer un anere layt hon pay tëne kesitst. 30Ti fariseyer un ti Kesets mayster, woo fon te fariseyer sayne partay waare, sin pees kep mit Yeesus sayn tisiple un hon kefroot:
— Warom est un trinkt teyer mit te xtayer kaseerer un mit anere layt mit en xlechte naame?
31Yeesus antwort:
— Tii woo kesunt sin prayche khee tokter, awer toch ti kranke. 32Ich sin net khom fer ti kuute se ruufe, awer fer ti sinter se ruufe, tas se sich roye tuun fon sayn sinte.
Yeesus un ti faste
33Phaar layt saate fer Yeesus:
— Em Yohan Te Taafer sayn tisiple tuun oft faste un mache kepeete, un te fariseyer sayn tisiple mache es selwiche. Awer ayre tisiple tuun net faste.
34Yeesus antwort:
— Mënt teyer tas teyer tii woo in kelaat sin fer en hochtsayts fest tswinge khënt se faste soo lang wii te praut noch pay tëne is? Mool sicher net! 35Awer khomt ti tsayt woo te praut tswixe tëne wech kehool kept; tan yoo tuun se faste!
36Yeesus macht aach tii ferklaychung:
— Nimant xnayt en xtik fon nay tsaych ap fer alt tsaych se flike. Wën yemant tas mache teet, fersaut er tas nay tsaych, un tas nay xtik past net kuut mit tëm alt tsaych. 37Nimant tuut naye wayn, woo noch keere tuut, in alte leter sek. Wën yemant tas macht, tuun ti uf platse, te wayn keet ferloer, un ti leter sek keen kaput. 38Nee. Naye wayn mus in naye leter sek ketuun kewe. 39Un nimant wil naye wayn trinke wën er xon alte wayn ketrunk hot, wayl er saat: “Te alte wayn is peser”.
