Yohan 3

₁Waar mool en fariseyer woo Nikoteemus keheest hot, woo en fiirer fon te yute waar. ₂Een nacht, is eyer Yeesus pesuuche kang un saat:

— Rapii, meyer wise tas tuu en mayster pist woo Hërkot kexikt hot, wayl nimant khan tii wunere mache wën Hërkot net pay iim is.

₃Yeesus hot keantwort:

— Ich fersichere aych tas tas woer is: nimant khan te Hërkots Raych siin wën eyer net noch mool kepoer wërt.

₄Nikoteemus hot kefroot:

— Wii khan en alte man noch mool kepoer kewe? Meech eyer noch mool tsurik in sayn moters layp keen un noch mool uf ti welt khome?

₅Yeesus saat:

— Ich saan sicher fer aych tas tas woer is: nimant khan in te Hërkots Raych khome wën eyer net kepoer kept fom waser un fom Kayst. ₆Weyer fon mënxliche eltre kepoer kept hot en mënxlich natuer; weyer fom Kayst kepoer kept, is yemant mit kaystlich natuer. ₇Tesweche, ferwuner tich net wayl ich saat tas teyer al noch mool mist kepoer kewe. ₈Te wint ploost woo er wil, un heyert mer tas keraux woo er macht, awer wees mer net fon woo er khomt un woo er hiin keet. Tas selwiche paseyert mit al woo fom Kayst kepoer kewe.

₉Nikoteemus hot kefroot:

— Wii khan tas sin?

₁₀Yeesus hot keantwort:

— Teyer sayt leerer fom israelite folek un ferxteest tas net? ₁₁Ich saan tich sicher tas tas woer is: meyer xpreche fon tings woo mer wise un fertseele was mer kesiin hon, awer teyer wolt net unser mensaaj aan nëme. ₁₂Wën teyer net klaapt wën ich fom tings fon tee welt xpreche, wii wolt teyer klaawe wën ich fom tings fom himel xpreche? ₁₃Nimant is ruf noo em himel kang, sonst te Soon fom Man, woo fom himel runer khom is.

₁₄— Soo wii Mooses, im tesërt, ti pronsene xlang an en phoste hooch aan kemach hot, kraat soo aach mus te Soon fom Man kehoop kewe, ₁₅tas al tii woo an em klaawe tuun tas eewich leewe khëne hon. ₁₆Wayl Hërkot hot ti welt soo fiil keliipt, tas eyer sayne eensichste Soon kep hot, tas yeete ëne woo an em klaawe tuut net ferloer keet, awer wërt es eewiche leewe kriin. ₁₇Wayl Hërkot hot sayne Soon kexikt fer ti welt se rete un net fer se julkeere.

₁₈— Yeete ëne woo am Soon klaapt kept net konteneert; awer weyer net klaapt is xon konteneert, wayl eyer net am Hërkot sayne eensichste Soon klaapt. ₁₉Un soo is es tas te julkamënt kemach kept: Hërkot hot tas licht fer ti welt kexikt, awer ti mënxe hon ti tunkelheet keliipt wayl se mache was xlecht is. ₂₀Awer al tii woo xlechtes tuun hase tas licht un tuun fon tëm ausrayse, tas nimant tas xlechtes woo se mache siin khan. ₂₁Awer tii woo noo te woerheet leewe suuche tas licht, tas yeete ëne kans klaar siin khan tas sayn akte kemach kewe tëm noo Hërkot sayne wile.

₂₂Un tëm noo, sin Yeesus un sayn tisiple noo te rechioon fon Yutëya kang. Tee is en tsayt mit tëne too keplip un waar ti layt am taafe. ₂₃Yohan waar aach in Enom am taafe, ticht an Salim, wayl tort fiil waser waar. ₂₄(Yohan waar noch net in kexpërt kep kewees.) ₂₅Phaar fon Yohan sayn tisiple hate en tiskusioon mit en yut kehal iwich ti seremonii fon te raynichung. ₂₆Tii sin fer Yohan saan kang:

— Mayster, tee man woo pay aych waar uf te aner sayt fom Jortan flus is ti layt am taafe. Teyer het iwich em kexproch, tënkst traan? Un al sin tëm noo am keen.

₂₇Yohan hot keantwort:

— Nimant khan etwas hon wën tas net fon Hërkot kep wërt. ₂₈Teyer sayt tsayer fon was ich saat: “Ich sin net te Kristus, awer waar foer tëm kexikt këp.” ₂₉Uf en hochtsayt, is te praut puup tee tsu weem ti praut keheere tuut. Tëm praut sayne froynt is too, un heyert en aan, un frayt sich wën eyer sayn xtim heyert. Soo aach was mit Yeesus am paseere is macht mich kans froo kewe. ₃₀Tee mus imer mee important kewe, un ich, imer weenicher important.

₃₁Tee woo fon uwe khomt is te importanteste fon al, un weyer fon te eyert khomt is fon te eyert un xprecht iwich tings woo fon te eyert is. Weyer fom himel khomt is te importanteste fon al. ₃₂Tee xprecht fon tings woo eyer kesiin un keheyert hot, awer nimant nëmt tëm sayn mensaaj aan. ₃₃Weyer tëm sayn mensaaj aan nëmt pewayst tas was Hërkot saat woer is. ₃₄Tee woo Hërkot kexikt hat saat Hërkot sayn wërter wayl Hërkot kept fon sayne Kayst oone moos. ₃₅Te Fater liipt te Soon un hot ales in tëm sayn hënt ketuun. ₃₆Tesweche, weyer an te Soon klaapt hot tas eewiche leewe; awer weyer te Soon net heyert wërt nii tas eewiche leewe hon, awer wert fer imer te Hërkots xtroof layte.