Yohan 4

₁Ti fariseyer hon keheyert saan tas Yeesus mee tisiple am kriin waar un het mee layt ketaaft wii Yohan. ₂(In te woerheet, waar net Yeesus weyer ketaaft hot un toch sayn tisiple.) ₃Wii Yeesus tas se wise krit hot, is eyer fort kang fon Yutëya un is tsurik noo Kalilëya kang. ₄Iwer weech, must eyer torich ti rechioon fon Samariia keen.

₅Yeesus is an en xtat fon te Samariia aan khom, Sikar kenënt, woo ticht waar am lant woo Yaakop fer Yoosef kep hat. ₆Too waar Yaakops waser prune. Waar unkefeyer an mitach wii Yeesus, miit fon te rees, sich ticht an te prune kesets hot.

₇En samaritaaner fraa is waser hoole khom, un Yeesus saat tëm:

— Pite, kep meyer en pisye waser.

₈(Yeesus sayn tisiple waare in ti xtat ese khaafe kang.)

₉Ti fraa hot keantwort:

— Teyer sayt en yut, un ich en samaritaaner. Tan, wii soo tuut teyer mich waser ferlange? (Tii hot tas kesaat wayl yute un samaritaaner sich net naner fertraan.)

₁₀Too saat Yeesus:

— Wëns tuu wist was Hërkot kewe khan un weyer tas is woo tich waser am ferlange is, teest tuu ferlange, un eyer teet tich es waser fom leewe kewe.

₁₁Sii antwort:

— Teyer het khee eemer fer waser raus se hoole, un te prune is tiif. Wii teet teyer tas waser fom leewe pringe? ₁₂Unsere foerkhomer Yaakop hot uns tee prune kep. Tee, sayn khiner un sayn fii hon fon too waser ketrunk. Meecht teyer mee important sin wii Yaakop?

₁₃Tan saat Yeesus:

— Weyer fon tëm waser trinkt wërt noch mool torxt kriin, ₁₄awer te mënx woo fom waser woo ich kewe trinkt, wërt nii mee torxt hon. Wayl tas waser woo ich tëm kewe wërt in tëm en waser kwel woo tëm eewich leewe kept.

₁₅Too hot ti fraa ferlangt:

— Pite, kep mich fon tëm waser! Soo wërt ich nii mee torxt kriin un prauch ich nime heyer khome fer waser hoole.

₁₆Yeesus hot keortnet:

— Kee tayne man ruufe un khom tsurik!

₁₇Ti fraa hot keantwort:

— Ich hon khee man!

Tan saat Yeesus:

— Tuu pist richtich wëns tuu saast hest khee man, ₁₈wayls tuu xon finef hast, un tee woos tuu yets host is net wërklich tayne man. Yoo, tuu host ti woerheet kesaat.

₁₉Ti fraa antwort:

— Yets wees ich tas teyer en profët sayt! ₂₀Unsere foerkhomer hon Hërkot aan kepeet uf too tëm përich, awer teyer, yute, saat tas Yeruusalëm tas plats is woo meyer en aan peete mise.

₂₁Yeesus saat:

— Fraa, klaap an was ich saan: khomt ti tsayt woo nimant Hërkot aan peete tuut net uf too tëm përich un net in Yeruusalëm. ₂₂Teyer, samaritaaner, weest net was teyer atoreere tuut, awer meyer wise was meyer aan peete tuun wayl ti retung khomt fon te yute. ₂₃Awer, khomt ti tsayt, un, in te woerheet, is se xon khom, woo ti echte aan peeter te Fater aan peete tuun in kayst un in woerheet. Wayl sin tii woo te Fater hon wil tas em aan peete tuun. ₂₄Hërkot is Kayst, un tesweche tii woo em aan peete tuun sole em aan peete in kayst un in woerheet.

₂₅Ti fraa antwort:

— Ich wees tas te Messias, Kristus kenënt, khome mus. Un, wën tee khome tuut, tuut eyer ales fer uns ausleeye.

₂₆Too hot Yeesus kesaat:

— Ich, woo mit tich am xpreche sin, sin te Kristus.

₂₇In tëm momënt sin ti tisiple tsurik khom un hon sich ferwunert, wayl tee mit te fraa am xpreche waar. Awer nimant hot kefroot was ti fraa wolt. Un hon aach net fer Yeesus kefroot warom eyer mit te fraa am xpreche waar.

₂₈Klaych tëm noo, hot ti fraa sayne waser kruuch too kelos, is tsurik pis an ti xtat kang un saat fer ti layt al:

₂₉— Khomt te man kuke woo kesaat hot ales was ich fërtich keprung hon. Meecht tee te Kristus sin?

₃₀Fiil layt sin aus te xtat kang un sin pis uf es plats kang woo Yeesus waar.

₃₁In te selwich tsayt, hon ti tisiple fer Yeesus ferlangt:

— Mayster, es etwas!

₃₂Yeesus antwort:

— Ich hon fer se ese en es mitel woo teyer net khënt.

₃₃Too hon ti tisiple aan kefang se frooe, ëne fer te anere:

— Meecht yemant ese keprung hon fer iim?

₃₄Yeesus saat:

— Mayn ese is te wile mache fon tëm woo mich kexikt hot un ti aarwat woo eyer mich kep hot fer fërtich mache. ₃₅Teyer saat imer: “In fier moonate is es tsayt fer ti ërnt.” Awer kukt kuut ti plantaaj aan: was keplanst kep waar, is xon tsaytich un fërtich fer ti ërnt. ₃₆Weyer ërnt, kriit sayne loon, un te resultaat fon sayn aarwat is tas eewiche leewe fer ti mënxe. Un soo, tee woo seet kraat soo wii tee woo ërnt kewe mitsamer froo. ₃₇Wayl is woer was kesaat kept: “Eene seet un te anere ërnt.” ₃₈Ich hon aych kexikt ërnte woo teyer net keseet hot; anere hon too kexaft, un teyer het tëne iire aarwat penutst.

₃₉Fiile samaritaaner fon tee xtat hon an Yeesus keklaapt wayl ti fraa kesaat hat: “Tee hot mich kesaat ales was ich fërtich keprung hon.” ₄₀Wii ti samaritaaner hiin khom sin uf es plats woo Yeesus waar, hon se ferlangt tas eyer pay tëne playwe solt, un Yeesus is tswaay taache too keplip.

₄₁Un fiile anere hon keklaapt weche tëm sayn mensaaj. ₄₂Ti hon fer ti fraa kesaat:

— Yets is es nime weche was tuu kesaat host tas mer klaawe, awer wayl meyer selepst em keheyert hon xpreche. Un wise tas eyer wërklich te Reter fon te welt is.

₄₃Yeeus is tswaay taache too keplip un, tëm noo, is eyer noo te rechioon fon Kalilëya kang. ₄₄Wayl, wii eyer selepst saat: “En profët wërt net rexpekteyert in sayn aychne lant.” ₄₅Wii eyer an Kalilëya aan khom is, hon ti pewooner fon tëm plats em kuut uf kenom. Tii waare uf tas Oostre Fest kang kewees, in Yeruusalëm, un hon kesiin kehat ales was Yeesus tort kemach hat.

₄₆Yeesus is tsurik noo Kanaa in Kalilëya kang, woo eyer waser in wayn transformeyert hat. Too waar en hooche aarwater fon te rechiirung, woo in Kafarnaum kewoont hot. Tee hot en kranke soon tehëm kehat. ₄₇Wii tee keheyert hot tas Yeesus fon te Yutëya khom waar noo Kalilëya, is eyer tëm ferlange kang solt noo Kafarnaum khome sayne soon heele, woo am xtërwe waar. ₄₈Yeesus saat fer te aarwater:

— Teyer klaapt ploos wën teyer kroose wunere siit!

₄₉Te aarwater hot keantwort:

— Hër, khom xnel, eep mayne soon xtërept!

₅₀Yeesus saat:

— Kee hëm! Tayne soon wërt leewe!

Tee hot keklaapt an Yeesus sayn wërter un is fort kang. ₅₁Am hëm weech, hot eyer sayn aarwater aan ketrof, woo kesaat hon:

— Tayne soon leept!

₅₂Too hot eyer kefroot um was uertsayt sayne soon aan kefang hot se pesere. Ti aarwater antworte:

— Kester mitach, um een uer is tas fiiwer wech kang.

₅₃Tan hot te fater traan ketënkt tas kraat um tii uertsayt woo Yeesus kesaat hat: “Tayne soon wërt leewe.” Too hot tee un ti kans familye an Yeesus keklaapt.

₅₄Tas waar te tswete wuner woo Yeesus kemach hat klaych tëm noo wii eyer fon Yutëya pis Kalilëya kang waar.