Yohan 2

₁Tswaay taache tëm noo, waar en hochtsayt in Kanaa, in te rechioon fon te Kalilëya, un Yeesus sayn mama waar tort. ₂Yeesus un sayn tisiple waare aach in kelaat kep fer tii hochtsayt. ₃Wii te wayn al kep is, hot Yeesus sayn mama fer tee kesaat:

— Te wayn is al kep.

₄Yeesus hot keantwort:

— Is net nootwenich tas tuu mich saast was ich mache sol. Mayn tsayt is noch net khom.

₅Too hot sii fer ti aarwater kesaat:

— Macht was tee xike tuut.

₆Tort ticht waare seks waser kruuche; in yeete eene hon fon achtsich pis hunert tswansich liter waser rin kepast. Ti yute hon tas waser woo se in tii kruuche uf kehoop hon in sayn purifikatsioon serimoniie penutst. ₇Yeesus saat fer ti tiiner:

— Filt ti kruuche mit waser.

Un tii hon se pis an te rant kefilt. ₈Klaych tëm noo hot Yeesus kexikt:

— Yets hoolt en pisye fom waser fon tëne kruuche raus un nëmt tas hiin fer te xëf fon te tiiner.

Un tii hon tas hiin kenom. ₉Tan hot te xëf fon te tiiner tas waser kexmekt, un tas waser hot sich in wayn transformeyert kehat. Tee wust net fon woo tee wayn khom waar, awer ti tiiner wuste. Tesweche hot eyer te praut keruuf ₁₀un saat:

— Ti kewoonheet is eyerxt te peste wayn aus teele un, wën ti inkelaatne xon fiil ketrunk hon, te keweenliche wayn aus teele. Awer tuu host te peste wayn pis yets wech ketuun.

₁₁Yeesus hot tee sayne eyerxte wuner in Kanaa, fon Kalilëya, kemach. Soo hot eyer sayn kloor reweleyert, un sayn tisiple hon an em keklaapt.

₁₂Tëm noo, sin Yeesus, sayn mama, sayn kexwister un sayn tisiple noo te xtat Kafarnaum kang un sin phaar taache too keplip.

₁₃Phaar taache foer te yute sayn Oostre, is Yeesus pis an ti xtat Yeruusalëm kang. ₁₄Uf em hoof fom Thëmpel hot eyer layt ketrof woo okse, xeef un taupe am ferkhaafe waare; un hot aach tii woo, an sayn tixe am huke, tas kelt um ketrokt hon fer tas folek. ₁₅Too hot eyer em paytx fon xtrike kemach un hot tas kanse folek fon too wech keyaat un aach ti xeef un ti okse. Hot ti tixe fon tëne woo tas kelt um ketrokt hon rom kextilept, un ti nikle hon sich uf em potem ferxtraut. ₁₆Un saat fer tii woo ti taupe am ferkhaafe waare:

— Nëmt tas ales too wech! Heyert uf en kexefts haus mache fon mayne Fater sayn haus!

₁₇Too hon tëm sayn tisiple an te wërter fon te Hayliche Xrifte ketënkt, woo saan: “Mayne liipe iwich tayn haus, oh Hërkot, prënt in mich wii fayer.”

₁₈Too hon ti yute fiirer kefroot:

— Was fer wuner khanst tuu mache fer uns pewayse tas tuu autoriteet host fer tas se mache?

₁₉Yeesus antwort:

— Xmayst tee Thëmpel um, un ich tuun em noch mool uf paue in tray taache!

₂₀Tii hon kesaat:

— Tas hot seks un fërtsich yoer ketauert fer tee Thëmpel uf paue, un tuu saast tas tuu en noch mool uf paue khanst in tray taache?

₂₁Awer te thëmpel woo Yeesus triwer am xpreche waar, waar sayne aychne khërwer. ₂₂Wii Yeesus peleept kep is, hon tëm sayn tisiple traan ketënkt tas tee tas kesaat hat un tan hon se an te Hayliche Xrifte un an tëm sayn wërter keklaapt.

₂₃Wii Yeesus in Yeruusalëm waar, iwich tas Oostre Fest, hon fiil an tëm keklaapt wayl se ti wunere kesiin hon woo eyer kemach hot. ₂₄Awer Yeesus hot khee sicherheet kexpiert, wayl eyer hot se al kuut kekhënt. ₂₅Un nimant praucht mit iim xpreche iwich yemant, wayl eyer wust was yeete persoon am tënke waar.