Yohan 20

₁Sontach kans frii, wii es noch tunkel waar, is Maria Matalena pis ans kraap kang un hot kesiin tas te xteen woo tas tsuu kemach hat wech kehool kep waar. ₂Too, is se kelaaf pis ans plats woo Simon Pheeter waar un aach woo en anere tsipel, tee woo Yeesus keliipt hat, waar, un saat:

— Yemant hot te Hër Yeesus aus em kraap kehool, un meyer wise net woo se em hiin ketuun hon!

₃Too, sin Pheeter un te anere tisipel pis ans kraap kang. ₄Ale tswaay sin mitsamer fort kelaaf, awer te anere is xneler kelaaf wii Pheeter un is te eyerxt hiin khom. ₅Tee hot sich kepikt fer rin se kuke un hot ti layn ticher kesiin; awer is net ins kraap rin kang. ₆Awer Pheeter, woo klaych tëm noo aan khom is, is rin kang. Eyer hot aach ti layn ticher woo too kelee hon kesiin ₇un ti pant woo se um Yeesus sayne khop ketuun hate. Ti pant waar net pay te layn ticher, awer hot kewikelt neewe traan kelee. ₈Tan is te anere tisipel, woo te eyerxt aan khom waar, aach ins kraap kang. Eyer hot kesiin un hot keklaapt. ₉(Ti hate noch net ti Haylicher Xrifte ferxtan kehat, woo saan tas es neetich waar tas Yeesus peleepe teet.) ₁₀Un ti tswaay sin tsurik kang, noo hëm.

₁₁Maria Matalena waar ticht keplip woo mer ins kraap rin keet, am prile. Soo lang wii se am prile waar, hot se sich kepikt, hot rin kekukt, ₁₂un siit tswaay ëngle mit ways tsaych, am sitse woo Yeesus sayne khërwer hiin ketuun kep waar. Ëne waar am plats fom khop, un te anere, am plats fon te fiis. ₁₃Ti ëngle hon kefroot:

— Fraa, warom pist tuu am prile?

Sii hot keantwort:

— Yemant hot mayne Hër wech kehool, un ich wees net woo se em hiin ketuun hon!

₁₄Wii se tas kesaat hat, hot se sich tsurik kewënt un siit Yeesus too xteen, awer hot em net erkhënt. ₁₅Too hot Yeesus kefroot:

— Fraa, warom pist tuu am prile? Weyer pist tuu am suuche?

Sii hot ketënkt tas weyer te man woo te kaate uf pase teet un tesweche hot se keantwort:

— Wen teyer em too wech kehool het, saa woos tuu em hiin ketuun host, un ich keen em hoole.

₁₆Yeesus saat:

— Maria!

Sii hot sich kewënt un antwort in hepreyix:

— “Rabi!” (Tas wort petayt “Mayster”.)

₁₇Yeesus saat:

— Net mich fest hale, wayl ich sin noch net ruf noo mayne Fater. Kee tich trefe mit mayn priiter un saa tëne tas ich noo ruf keen, pis an tee woo mayne Fater is un tëne iire Fater, mayne Hërkot un tëne iire Hërkot.

₁₈Too is Maria Matalena kang un saat fer ti tisiple:

— Ich hon te Hër kesiin!

Un hot fertseelt was Yeesus tëm kesaat hat.

₁₉In tëm selwiche sontach, mitachs, waare Yeesus sayn tisiple fersamelt, mit tiire fom haus kexlos, wayl se pang hate fon te yute. Too is Yeesus aankhom, hot sich tswixe tëne kextelt un saat:

— Ti friite sayt mit aych!

₂₀Klaych tëm noo, hot Eyer sayn hënt un sayne sayte ketsaycht. Un ti hon sich fiil kefrayt wii se te Hër kesiin hon. ₂₁Too saat Yeesus noch mool:

— Ti friite say mit aych! Soo wii te Fater mich fer ti welt kexikt hot, tuun ich aych aach xike.

₂₂Too tëm noo hot Eyer iwich se keploost un saat:

— Nëmt te Hayliche Kayst uf. ₂₃Wen teyer yemant ti sinte fertsayert, tan kewe ti sinte fertsayert; awer, wen teyer se net fertsayert, tan kewe se net fertsayert.

₂₄Es waar soo tas, Thomas, ëne fon te tisiple, woo “Te Tswiling” kenënt waar, kraat net pay tëne waar, wii Yeesus aan khom is. ₂₅Too hon ti anere tisiple fer Thomas kesaat:

— Meyer hon te Hër kesiin!

Un tee hot keantwort:

— Wën ich net te sinaal fon te neel an tëm sayn hënt siin un net too traan thupe mit mayne finger, un wën ich net mayn hant an tëm sayne sayte faare, klaawe ich es net!

₂₆Een woch truf, waare Yeesus sayn tisiple noch mool too fersamelt mit te tiire kexlos, un Thomas waar tepay. Yeesus is aankhom, hot sich in te mite fon te tisiple kextelt un saat:

— Tas te friite mit aych sich ferhalt.

₂₇Klaych tëm noo, saat Eyer fer Thomas:

— Kuk mayn hënt un tuu tayne finger too traan. Xtrek tayn hant un faar se an mayne sayte. Heyer uf se tswayfle un klaap!

₂₈Tan hot Thomas aus keruuf:

— Mayne Hër un mayne Kot!

₂₉Yeesus saat:

— Host tuu keklaapt wayls tuu mich kesiin host? Kliklich sin tii woo net kesiin hon, awer toch soo hon se keklaapt!

₃₀Yeesus hot noch fiil anere wunere foer te tisiple kemach woo net in tëm puch kexrip sin. ₃₁Awer tii sin kexrip tas teyer klaawe khënt tas Yeesus te Kristus is, Hërkot sayne Soon, un tas teyer, am klaawe, torich tëm leewe khënt.