Yeesus khomt tsum foerxayn fer siwe tisiple
1Tëm noo, is Yeesus noch mool tsum foer xayn khom fer sayn tisiple, am rant fom Kalileya lakoo. Tas is soo paseyert:
2Waare paysamer Simon Pheeter un Thoome, woo “te Tswiling” kenënt waar; Natanaël, woo fon Kanaa in te Kalilëya waar; Zebedeu sayn puuwe, un noch anere tswaay tisiple. 3Simon Pheeter saat fer ti anere:
— Ich keen fixe.
Tii anere saate:
— Meyer keen aach mit tich fixe.
Too sin se al uf te poot kang, awer in tee nacht hon se niks kefixt. 4Moynts, soo wii es am hel kewe waar, waar Yeesus am xtrant. Ti wuste awer net tas es tee weyer. 5Too hot Yeesus kefroot:
— Puuwe, hot teyer etwas kefixt?
To hon se keantwort:
— Niks!
6Yeesus saat:
— Xmayst ti nets an ti rechts sayt fom poot, tan fint teyer ti fix!
Tii hon ti nets kexmis un klaych tëm noo hon se xon net mee kepkhakt tii tsurik in te poot se tsiye, weche te fiile fix woo trin waare. 7Too hot te tisipel woo Yeesus keliipt hot fer Pheeter kesaat:
— Is te Hër Yeesus!
Wii Simon Pheeter keheyert hot tas es Yeesus weyer, hot eyer sayne mantel aan ketsoo, wayl eyer sayn tsaych aus ketsoo hat fer se fixe, un tan hot eyer sich ins waser kexmis. 8Ti anere tisiple sin mit em poot kefaar, ti nets mit te fix noo am xlepe, wayl se ploos unkefeyer hunert meeter wayt fom rant waare. 9Wii se fom poot aus kextii sin, hon se too en kleen fayer kesiin, mit phaar fix am proote uf te khoole. Un waar aach proot. 10Tan saat Yeesus:
— Pringt phaar fon tëne fix woo teyer kraat kefixt hat.
11Too is Simon Pheeter uf te poot un hot ti nets pis uf es lant kexlept. Ti waar fol, mit hunert tray un fuftsich kroose fix, un toch soo is ti nets net feris. 12Yeesus saat:
— Khomt ese!
Khee ëne fon tëne hat koraaj fer se froe weyer eyer weyer, wayl sii wuste tas eyer te Hër weyer. 13Tan is Yeesus khom, hot es proot kehool un hot es tëne kep. Un hot es selwiche mit te fix kemach.
14Tas waar es trite mool woo Yeesus fer sayn tisiple tsum foer xayn khom is, noo sayn peleepung.
Yeesus un Pheeter
15Wii se fërtich kes hate, hot Yeesus fer Simon Pheeter kefroot:
— Simon, Yohan sayne soon, liipst tuu mich mee wii too ti anere mich liipe?
Pheeter hot keantwort:
— Yoo, tuu weest tas ich tich liipe, Hër!
Too saat Yeesus fer tee:
— Pas mayn xoofe uf!
16Un Yeesus hot fer es tswete mool kefroot:
— Simon, Yohan sayne soon, liipst tuu mich?
Pheeter hot keantwort:
— Yoo, tuu weest tas ich tich liipe, Hër!
Un Yeesus hot noch mool fer tee kesaat:
— Pas mayn xoofe uf!
17Un hot fer es trite mool kefroot:
— Simon, Yohan sayne soon, liipst tuu mich?
Too is Pheeter traurich kep wayl Yeesus tray mool kefroot hat: “Liipst tuu mich?” Un hot keantwort:
— Tuu weest ales un weest tas ich tich liipe, Hër!
Un Yeesus hot kexikt:
— Pas mayn xoofe uf. 18Wiis tuu en puup waarst, host tuu tich fërtich kemach un pist hiin woos tuu hiin wolst. Awer ich fersichere es tich tas tas woer is: Wëns tuu alt pist, tuust tuu tii hënt xtreke, yemant tuut se fest pine un tuut tich hiin nëme woos tuu net wilst hiin.
19Tas am saan, hot Yeesus tsum ferxteen kep wii Pheeter xtërwe teet un soo, mache tas Hërkot keloopt kewe sol.
Too saat Yeesus fer Pheeter:
— Khom mit meyer!
Yeesus un te anere tisipel
20Too hot Pheeter sich hinersich rom ketreet un hot kesiin tas te tisipel woo Yeesus liipt hat hine aan tëm am khome waar. Tas waar te selwiche woo neewich Yeesus waar iwer es nachts ese fon te Oostre un woo fer tee kefroot hat: “Hër, weyer is tee woo tich hinerkeet?” 21Wii Pheeter tee tisipel kesiin hot, hot eyer fer Yeesus kefroot:
— Was saast tuu, Hër, iwich tëm?
22Yeesus hot keantwort:
— Wen ich wil tas tee soo lang leewe sol pis ich tsurik khome, was host tuu too temit se tuun? Khom mit meyer!
23Tesweche hot sich tswixich Yeesus sayn aanhënger ferprayt tas tee tisipel net xtërwe teet. Awer Yeesus hat tas net kesaat. Tee saat ploos: “Wen ich wil tas tee soo lang leewe sol pis ich tsurik khome, was host tuu too temit se tuun?”
24Tas is te tisipel woo iwich tas tings kexproch hot un hot se kexrip. Un meyer wise tas was tee kesaat hat woer is.
Tas ën
25Is noch fiil aner tings woo Yeesus kemach hot. Wën se al kexrip kewe teere, eens noo em aneres, ich tënke tas ti picher woo kexrip miste kewe teere kaar net in ti kans welt rin pase.
