Yohan 19

₁Too hot Pilatus kexik Yeesus ferpaytxe. ₂Tëm noo, hon ti soltaate en kroon fon tëner rangle kemach, un hon se uf tëm sayne khop ketuun, un hon tëm en root mantel iwer kehonk. ₃Sin ticht pay em khom un saate:

— Lank leewe fer te kheenich fon te yute!

Un hon tëm ins kesicht kehau. ₄Too is Pilatus noch mool raus khom un saat fer tas folek:

— Heyert mool! Ich pringe te man heyer tas teyer se wise kriit tas ich khee uersach fine fer em konteneere!

₅Too is Yeesus raus khom mit te tëner kroon uf em khop un te roote mantel.

Pilatus saat:

— Kukt! Too is te man!

₆Wii ti xëfe fon te priister un ti wachter fom Thëmpel Yeesus kesiin hon, hon se aankefang se xraaye:

— Pekrayts! Pekrayts!

Pilatus saat noch mool:

— Teyer khënt em mit nëme un pekraytse! Ich fine khee uersach fer tee man konteneere!

₇Tas folek hot keantwort:

— Meyer hon en Kesets, un tii saat tas tee man xtërwe mus wayl eyer fersichert tas eyer Hërkot sayne Soon is.

₈Wii Pilatus tas keheyert hot, hot eyer noch mee pang kriit. ₉Is noch mool in te palas kang un hot fer Yeesus kefroot:

— Fon woo pist tuu?

Awer, Yeesus hot niks keantwort. ₁₀Too, hot Pilatus kesaat:

— Wilst tuu net mit mich xpreche? Tënk tas ich autoriteet hon soo fiil fer tich loos lose wii fer tich pekraytse xike.

₁₁Yeesus hot keantwort:

— Teyer het ploos autoriteet iwich mich wayl tii tich kep waar fon Hërkot. Tesweche, tee woo mich ap kep hot fer aych is xult fon en kreesere sint.

₁₂Noo tas, wolt Pilatus Yeesus loos lose. Awer, tas folek hot kexraayt:

— Wen eyer tee man loos lost, sayt teyer khee froynt fom Kayser! Wayl, weyer saat tas er en kheenich is, is faynt fom Kayser!

₁₃Wii Pilatus tas keheyert hot, hot eyer Yeesus raus keprung un hot sich uf ti tripuune kesetst, uf em plats woo “Xteen Kalsaate” heest. (In hepreyix heest tas plats “Gabatá”.) ₁₄Es waar neekst mitach fom taach foer Oostre. Pilatus saat fer tas folek:

— Too is ayre kheenich!

₁₅Awer, tii hon kexraayt:

— Pring em um! Pring em um! Pekrayts em!

Too, hot Pilatus kefroot:

— Wolt teyer hon tas ich ayre kheenich pekraytse?

Awer, ti xëfe fon te priister hon keantwort:

— Unsere eensichste kheenich is te reemixe khayser!

₁₆Too, hot Pilatus Yeesus ap kep fer ti soltaate fer pekraytst kewe, un ti hon em kenom.

₁₇Yeesus hot tas krayts selepst ketraa pis uf tas plats Kalwaario kenent. (In hepreyix, te naame fon tëm plats is “Kolkota”.)

₁₈Too hon ti soltaate Yeesus ans krayts kenaachelt. Un hon aach tswaay anere mëner pekraytst, ëne uf yeete sayt fon tëm. _19-20Pilatus hot kexikt en xilt xraywe un uwe ans krayts aan mache. An tëm xilt waar kexrip, in hepreyix, lataynix un kriichich: “Yeesus fon Nasarëë, Kheenich fon te Yute”. Fiil layt hon ti xilt keleest, wayl tas plats woo Yeesus pekraytst kep is waar ticht an te xtat. ₂₁Too, hon ti xëfe fon te priister fer Pilatus kesaat:

— Xrayp net: “Kheenich fon te Yute”; xrayp: “Tee man hot kesaat: Ich sin te Kheenich fon te Yute”.

₂₂Pilatus antwort:

— Was ich kexrip hon, hon ich kexrip!

₂₃Tëm noo wii ti soltaate Yeesus pekraytst hate, hon se tëm sayn tsaych kehool un hon tas ferteelt in fier teele, ëns fer yeete ëne. Awer, te punx waar oone noote, kans keweept in een eensichst xtik, fon uwe pis une. ₂₄Tesweche, hon ti soltaate ëne fer te anere kesaat:

— Meyer tuun te punx net ferayse. Meyer tuun em raus xpiile fer siin weyer em pehalt.

Tas is paseyert tas sich in hale teet was ti Hayliche Xrifte saan:

₂₅Ticht an Yeesus sayn krayts waare sayn mama un tëm sayn xwester, un aach Maria, Cleofas sayn fraa, un Maria Matalena. ₂₆Wii Yeesus sayn mama kesiin hot un ticht pay tëm te tisipel woo eyer keliipt hat, saat eyer fer tii:

— Tas is tayn soon.

₂₇Klaych tëm noo, saar eyer fer tee:

— Tas is tayn mama.

Tee aanhënger hot em Yeesus sayn mama kenom, tas sii fon tort aan foran in tëm sayn haus woone solt.

₂₈Yets wust Yeesus tas ales komplët waar. Too, tas sich in hale teet was ti Hayliche Xrifte saan, saat eyer:

— Ich hon torxt!

₂₉Too waar en xisel fol mit keweenliche wayn. Hon en xwam im wayn nas kemach, hon te xwam an en hisopo xteke ketuun un hon tas an Yeesus sayn munt kethupt. ₃₀Wii eyer te wayn ketrunkt hat, saat eyer:

— Ales is komplët!

Too, hot eyer te khop niter kehal un is kextorep.

₃₁Too, hon ti yute fiirer fer Pilatus ferlangt solt xike ti peen ferpreche fon tëne woo pekraytst kep waare un solt xike tas se fon te kraytse ap kemach keepte. Tii hon tas ferlangt wayl es fraytach waar un wolte net hon tas noch, am samstach, ti khërwer noch an te kraytse weere. Un tee samstach waar ekstra kehaylicht. ₃₂Ti soltaate sin kang un hon ti peen ferproch fom eyerxte man woo mit Yeesus pekraytst kep waar un, tëm noo, hon se tëm anere sayn peen ferproch. ₃₃Awer, wii se ticht an Yeesus khom sin, hon se kesiin tas tee xon toot waar un hon tëm sayn peen net ferproch. ₃₄Awer, eene fon te soltaate hot Yeesus sayne sayte kextoch mit en xtech. Im selwiche moment is pluut un waser raus khom.

₃₅Weyer tas kesiin hot, hot fertseelt was paseyert waar tas teyer aach klaawe tuut. Was tee kesaat hot is woer, un tee wees tas eyer ti woerheet saat. ₃₆Tas is paseyert tas sich in hale teet was ti Hayliche Xrifte saan: “Khee ëne fon sayn knoche kewe ferproch.” ₃₇Un uf em aner plats saan ti Hayliche Xrifte: “Tii tuun aan kuke tee woo se torich kextoch hon mit en xtech.”

₃₈Too tenoo, hot Yoosef, fon te xtat Arimatëya, erlaupnis ferlangt fer Pilatus fer Yeesus sayne khërwer nëme. (Yoosef waar Yeesus sayne aanhënger, awer in kehëmnis, wayl eyer hat pang fon te yute fiirer.) Pilatus hot erlaupnis kep un Yoosef is Yeesus sayne khërwer hoole kang. ₃₉Nikoteemus, tee woo mit Yeesus nachts xpreche kang waar, is mit Yoosef kang, unkefeyer finef un traysich khilo fon en mixung fon aloees un mira mit am nëme. ₄₀Ti tswaay mëner hon Yeesus sayne khërwer kehool un hon em in layn ticher inkewikelt woo se tii mixung triwer kextraut hate. Soo hon ti yute te khërwer fon te toote prepareyert fer peërticht kewe.

₄₁Uf em plats woo Yeesus pekraytst kep waar, waar en kaate mit en nay kraap, woo noch nimant rin ketuun kep waar. ₄₂Too hon se Yeesus sayne khërwer hiin ketuun, wayl tas kraap ticht waar un aach wayl te yute sayne samstach klaych aanfange teet.