Yohan 18

₁Yeesus hat sayn kepeet kraat fërtich kemach kehat, too is eyer aus kang mit sayn tisiple un is uf ti aner sayt fon te pach Setroom kang. Too waar en kaate, woo Yeesus rin kang is mit sayn tisiple. ₂Yuutas, te woo Yeesus am hinerkeen waar, hot tas plats kekhënt wayl Yeesus sich fiil mool too fersamelt hat mit te tisiple. ₃Too is Yuutas pis an tee kaate kang mit em krupe fon soltaate un phaar wachter fom Thëmpel, woo kexikt kep waare fon te priister un fariseyer. Tii hate xwaarte un hon latërne un fakle mit kehat. ₄Yeesus wust ales was mit iim paseere teet. Tesweche is eyer tëne inkeeche kang un hot kefroot:

— Weyer sayt teyer am suuche?

₅Tii hon keantwort:

— Yeesus fon Nasarëë!

Yeesus saat:

— Sin ich!

Yuutas, te hinerlist, waar pay tëne. ₆Wii Yeesus kesaat hot: “Sin Ich”, hon se tsurik kep un sin uf te potem kefal. ₇Yeesus hot noch mool kefroot:

— Weyer sayt teyer am suuche?

Tii hon noch mool keantwort:

— Yeesus fon Nasarëë!

₈Yeesus saat:

— Ich hon xon fersichert tas es ich sin. Wëns ich sin woo teyer wolt, tan lost ti anere fort keen!

₉Yeesus hot tas kesaat tas sich in hale teet was eyer tefoer kesaat hat: “Fater, fon al tii woos tuu mich kep host, khee ëne hot sich ferloer.”

₁₀Too hot Simon Pheeter sayn xwaart raus ketsoo, un hot en knecht fom Hooche Prister pekhëmft un hot tëm en oer ap kehakt. Tëm knecht sayne naame waar Malko. ₁₁Awer, Yeesus saat fer Pheeter:

— Tuu tayn xwaart wech! Tënkst tuu, filaycht, tas ich net te khelich fom layte trinke, woo te Fater mich kep hot?

₁₂Klaych tëm noo hon ti soltaate, te komantant un ti wachter fom Thëmpel Yeesus kefang un hon em aan kepun. ₁₃Too hon se em eyerxt pis Anaas sayn haus kenom. Anaas waar xwiicher fater fon Kaifaas, woo in tëm yoer te Hooche Prister waar. ₁₄Kayfaas waar tee woo kesaat hat fer ti fiirer fon te yute tas es peser fer iine weyer tas ploos ëne man xtërwe teet fer tas folek.

₁₅Simon Pheeter waar Yeesus noo am keen, mit en anere tisiple. Tee tisipel waar pekhant fom Hooche Priister un, tesweche, khont eyer rin keen uf te hoof fon tëm sayn haus mit Yeesus. ₁₆Awer, Pheeter is yaus keplip, ticht an te teyer. Te anere tisipel, woo pekhant waar fom Hooche Priister, is raus kang un hot mit te maat kexproch woo ti teyer uf kepast hot. Tan, hot sii Pheeter rin keen kelos ₁₇un hot tëm kefroot:

— Pist tuu net ëne fon tëm man sayn aanhënger?

Tee hot keantwort:

— Ich, net!

₁₈Weche te khelt, hon ti knechcte un ti wachter en fayer kemach kehat un waare sich am wëërme, ronterom am xteen. Pheeter hot aach kextan, tswixe tëne, sich aach am wëërme.

₁₉Te Hooche Priister hot phaar frooe kemach fer Yeesus iwich tëm sayn aanhënger un sayn unterichtung. ₂₀Un Yeesus antwort:

— Ich hon imer kexproch fer al uf puplikee plets. Hon keuntericht in te sinakooke un uf em hoof fom Thëmpel, woo tas folek sich samelt, un hon nii etwas ferxtekelt kesaat. ₂₁Tan, warom sayt teyer mich tas am frooe? Froo fer tii woo mich aankeheyert hon, wayl tii wise kans richtich was ich tëne kesaat hon.

₂₂Wii Yeesus tas kesaat hot, hot ëne fon te wachter fom Thëmpel woo too waare tëm uf te pake kexlaa un saat:

— Is es soo woo meyer mit em Hooche Priister xprecht?

₂₃Yeesus antwort:

— Wën ich en lii kesaat hon, peways tas ich keloo hon! Awer, wën ich ti woerheet saat, warom pist tuu mich am ferxlaan?

₂₄Tëm noo, hot Anaas Yeesus kexikt, noch aan kepun, fer Kaifaas, te Hooche Priister.

₂₅Pheeter waar imer noch tort kewees, am xteen, sich am wëërme ticht am fayer. Tan hon se tëm kefroot:

— Pist tuu net ëne fon te aanhënger fon tëm man?

Tee hot keantwort:

— Nee, ich sin net!

₂₆Eene fon te knechte fom Hooche Prister, ferwant fom man woo Pheeter tas oer hap kexnit hat, hot kefroot:

— Waarst net tuu eene fon tëne woo ich mit tëm kesiin hon im kaate?

₂₇Un noch mool hot Pheeter nee kesaat.

Un im selwiche momëmt hot te haan kekreet.

₂₈Tëm noo, hon se Yeesus fon Kaifaas sayn haus pis an te reemixe kowerneyer kenom. Es waar xon moynts frii. Ti yute fiirer sin net in te palas rin kang wayl se wolte sauwer playwe, tëm noo tëne iire relichioon; wayl ploos soo khënte se tas nachts ese fon te Oostre ese. ₂₉Too is te kowerneyer Pilatos raus khom, is sich mit tëne pekeechne kang un froot:

— Was fer pexultichung hot teyer keeche tee man?

₃₀Tii hon keantwort:

— Tënkt teyer tas meyer aych tee man ap kewe teere wën tee khee telikt ketuun het?

₃₁Pilatus saat:

— Hoolt tee man un julkeyert em teyer selepst, tëm noo ayer kesets.

Too hon tii keantwort:

— Meyer hon net ti recht fer yemant umpringe.

₃₂Tas is soo paseyert tas sich in kehal het was Yeesus kesaat hat wii eyer kexproch hot iwer wii eyer xtërwe teet.

₃₃Pilatus is noch mool in te palas kang, hot Yeesus keruuf un froot:

— Pist tuu te kheenich fon te yute?

₃₄Yeesus antwort:

— Tuust tuu tas selwer frooe ore waare anere layt woo tas fon mich kesaat hon?

₃₅Pilatus saat:

— Sin ich filaycht en yut? Tayn aychne layt un ti xëfe fon te priister hon tich ap kep fer mich. Was host tuu kemach?

₃₆Yeesus antwort:

— Mayne Raych is net fon tee welt! Wën mayne Raych fon tee welt weyer, teere mayn aanhënger khëmfe un net lose tas ich ap kep keept fer ti yute fiirer. Awer, te fakt is tas mayne Raych net fon tee welt is!

₃₇Pilatus hot kefroot:

— Tan, pist tuu kheenich?

Yeesus hot keantwort:

— Pist tuu woo saast tas ich kheenich sin! Waar fer iwer ti woerheet xpreche woo ich kepoer waar un uf ti welt khom sin. Weyer uf te sayt fon te woerheet is, heyert mayn xtim.

₃₈Pilatus hot kefroot:

— Was is ti woerheet?

Wii eyer tas kesaat hat, is Pilatus noch mool raus khom fer mit em folek xpreche, un saat:

— Ich siin khee een uersach fer tee man konteneere. ₃₉Awer, tëm noo ayer kewoonheet, tuun ich imer en kefange loos lose an te Oostre. Wolt teyer tas ich fer aych te kheenich fon te yute loos lose?

₄₀Al hon aankefang se xraaye:

— Nee, tee net! Meyer wole hon tas Parapaas loos khomt!

Awer Parapaas waar en pantit.