Yeesus peet fer sayn aanhënger
1Wii Yeesus tas ales kesaat hat, hot eyer noo em himel kekukt un saat:
— Fater, ti xtun is khom. Tsaych ti kloor fon tayne Soon tas tee tayn kloor tsayche khan. 2Wayl tuu host tëm Soon autoriteet kep iwich ti kanse mënxe tas eyer tas eewiche leewe kewe khan fer al tii woos tuu tëm kep hast. 3Un tas eewiche leewe is tas: tich khëne lërne, woo te eensichste waare Hërkot pist; un aach Yeesus Kristus khëne, woos tuu fer ti welt kexikt host. 4Ich hon tayn kloor uf te welt reweleyert, un too tepay ti aarwat woos tuu mich kep hast fërtich kemach. 5Un yets, Fater, kep mich ti kloor woo ich hat mit teyer eep ti welt ketsoo kep waar.
6— Ich hon tich pekhant kemach fer ti mënxe fon tee welt woos tuu meyer kep hast. Tii waare tayn un tuu host se meyer kep. Tii hon tayn mensaaj aan keheyert un hon sich noo tayn wort kericht. 7Un yets wise se tas ales woos tuu mich kep host fon tich khomt. 8Wayl ich hon tëne ti mensaaj ap kep woos tuu mich kep host, un tii hon se aan kenom, un hon se wise kriit tas ich fon tich khom sin, un hon keklaapt tas tuu mich kexikt host.
9— Ich peete fer tii. Peete net fer ti welt, awer fer ti mënxe woos tuu mich kep host, wayl ti sin tayn. 10Ales was mayn is, is tayn, un ales was tayn is, is mayn; un mayn kloor kept reweleyert torich tëne woos tuu mich kep host. 11Yets sin ich noo tich am khome. Tii playwe uf te welt, awer ich sin net mee uf te welt. Hayliche Fater, in te kraft fon tayne naame, te naame woos tuu mich kep host, tuu se xitse tas se ëne sin, soo wii tuu un ich ëne sin. 12Wii ich pay tëne uf te welt waar, hon ich se kexitst torich ti macht fon tayne naame, te selwiche naame woos tuu meyer kep host. Ich hon se kexitst; un khee eene hot sich ferloer, sonst tee woo sich aler weeche toch ferloer het, tas sich in kehal het was ti Hayliche Xrifte saan. 13Un, yets, sin ich ticht pay tich am khome. Awer, ich saan tas soo lang wii ich noch uf te welt sin, tas tëne sayn hërts fol fon mayn frayt kept. 14Ich hon tëne tayn mensaaj ap kep, awer ti welt is fol has uf tii kep, wayl ti sin net fon tee welt, wii ich aach net sin. 15Ich ferlange net tas tuu se fon te welt wech hoolst, awer tuu se xitse fom Xlechte. 16Soo wii ich net fon tee welt sin, sin tii aach net. 17Tas se tayn wëre sin torich ti woerheet; tayn mensaaj is ti woerheet. 18Soo wii tuu mich uf ti welt kexikt host, hon ich se aach kexikt. 19Um tii tuun ich mich komplët ap kewe fer tich. Ich mache tas, tas tii aach wërklich komplët tayn sin sole.
20— Ich pite net ploos weche tëne selepst, awer aach weche tëne woo an mich klaawe wole torich tëne sayne preeticht. 21Un ferlange tas se al ëne sin sole. Un soo wii tuu, Fater, eenich pist mit mich, un ich sin eenich mit tich, tas al ti woo klaawe aach eenich playwe mit uns tas ti welt klaawe khan tas tuu mich kexikt host. 22Ti kloor woos tuu mich kep host hon ich mit tëne keteelt tas tii ëne khëne sin, soo wii tuu un ich ëne sin. 23Ich sin fereenicht mit tëne, un tuu pist fereenicht mit mich, tas tii komplët eenich sin, tas ti welt se wise kriit tas tuu mich kexikt hast, un tas tuu liipst mayn aanhënger soo wiis tuu aach mich liipst.
24— Fater, ich wil tas, woo ich sin wil, tii woos tuu mich kep host pay mich sin, tas se mayn kloor, woos tuu mich kep host, siin khëne; also, tuu host mich xon keliipt eep ti welt ketsoo kep is. 25Kerechte Fater, ti welt khënt tich net, awer ich khëne tich; un tii woos tuu mich kep host wise tas tuu mich kexikt host. 26Ich hon kemach tas tii tich khëne kelërnt hon un wil tas wayter mache, tas te liipe woos tuu uf mich host aach mit tëne sich ferhalt, un tas ich aach eenich mit tëne sin.
