Yohan 11

₁En man woo Lasarus heest waar krank. Tee waar fon Petanye, woo Maria un sayn xwester Marta kewoont hon. ₂(Tii Maria waar ti selwich woo parfum am Hër Yeesus ketuun hot un hot se ap ketrokent mit sayn hoer. Es waar tëm sayne pruuter, Lasarus, woo krank waar.) ₃Tii tswaay xwestre hon kexikt saan fer Yeesus:

— Hër, tayne liiwe froynt Lasarus is krank!

₄Wii Yeesus tas keheyert hot, saat eyer:

— Tii kranheet nëmt em net pis an te toot. Tas is am paseere tas Hërkot sayn kloor tsaycht; un soo, weeche tee krankheet, wërt em Soon fom Hërkot sayn hërlichkheet aach ketsaycht.

₅Yeesus hot Marta hat un sayn xwester, un aach Lasarus liip kehat. ₆Awer wii eyer se wise kriit hot tas Lasarus krank waar, is er noch tswaay taache keplip woo eyer waar. ₇Too saat eyer fer sayn tisiple:

— Meyer keen tsurik noo Yutëya.

₈Awer ti tisiple hon kesaat:

— Mayster, foer khortsem wolte ti layt fon tort tich umpringe mit xteen, un tuu wilst noch mool tort hiin?

₉Yeesus hot keantwort:

— Hot te taach net tswelef xtune? Wën yemant im taach keet, xtërtst net wayl eyer es licht fon tee welt siit. ₁₀Awer, wën eyer nachts keet, xtolpert eyer wayl in tëm khee licht is.

₁₁Tëm noo, saat Yeesus:

— Unser froynt Lasarus is am xloofe, awer ich keen hiin un mache em wach.

₁₂— Ti tisiple hon kesaat:

— Hër, wën tee am xloofe is, tan wërt eyer ach xon peser sin!

₁₃Awer Yeesus waar am saan tas Lasarus toot waar. Awer tii hon kemënt tee teet fom natierliche xloof xpreche. ₁₄Too saat Yeesus, ufrichtich:

— Lasarus is toot, ₁₅awer ich sin froo wayl ich net pay em waar, wayl soo tuut teyer klaawe. Meyer keen yets pis an sayn haus.

₁₆Thoomas, woo aach “Tswiling” kenënt waar, saat fer ti tisiple:

— Khomt, tan khëne meyer aach mit em Mayster xtërwe.

₁₇Wii Yeesus aan khom is, waare es xon fier taache woo Laasarus peërticht kep waar. ₁₈Petanye waar weenicher wii tray khilomeeter wayt fon Yeruusalëm ₁₉un fiile layt waare Marta un Maria pesuuche un konsoleere khom, wayl tëne iire pruuter kextorep waar. ₂₀Wii Marta se wise kriit hot tas Yeesus am aan khome waar, is se mit tëm sich pekeechne kang. Awer Maria is tehëm sitse keplip. ₂₁Tan saat Marta fer Yeesus:

— Wëns tuu hii kewees weyerst, weyer unsere pruuter net kextorep! ₂₂Awer ich wees tas, toch soo, Hërkot tich ales kewe wil was tuu tëm ferlange tuust.

₂₃Yeesus saat:

— Tayne pruuter tuut witer peleepe!

₂₄Marta antwort:

— Ich wees tas eyer peleepe tuut am letste taach!

₂₅Tan hot Yeesus fersichert:

— Ich sin ti peleepung un tas leewe. Weyer an mich klaapt, wën eyer ach xtërept, tuut eyer toch leewe. ₂₆Un weyer leept un an mich klaapt tuut nii xtërwe. Klaapst tuu an tas?

₂₇Marta saat:

— Yoo, Hër! Ich klaawe tas tuu te Kristus pist, em Hërkot sayne Soon, woo uf ti welt khome solt.

₂₈Wii Marta tas kesaat hat, is es tsurik kang pay Maria, sayn xwester, un saat tëm in priwaat:

— Te Mayster is khom un is tich am ruufe.

₂₉Wii Maria tas keheyert hot, is es xnel uf kextii un is Yeesus trefe kang. ₃₀Wayl tee waar noch net in ti wile khom, awer waar noch uf tëm plats woo Marta em aan ketrof hat. ₃₁Ti layt woo pay Maria im haus waare, tii am konsoleere, hon kesiin tas tii uf kextii is un is xnel fort kang. Too sin se tëm noo kang, wayl ti hon kemënt tii teet ans kraap keen fer se prile.

₃₂Maria is uf tas plats khom woo Yeesus waar, un klaych wii sii em kesiin hot, hot se sich foer tëm sayn fiis niter fale kelols un saat:

— Wëns tuu too keweest weyerst, weyer mayne pruuter net kextorep!

₃₃Yeesus hot Maria kesiin am prile un hot ti layt kesiin woo pay tëm waare, aach am prile. Tas hot em mechtich aan kekrif un unruych kelos. ₃₄Too hot Yeesus kefroot:

— Woo hot teyer em pekrapt?

Tii hon keantwort:

— Khom kuk, hër!

₃₅Yeesus hot keprilt.

₃₆Too hon ti layt kesaat:

— Kukt mool wii tee te Laasarus kërn hat! ₃₇Awer phaar layt hon kesaat:

— Tee hot te plinte keheelt. Hët te niks khëne mache tas Laasarus net kextorep weyer?

₃₈Tas hot Yeesus noch mool aarich aan kekrif. Eyer is pis ans kraap kang, woo en aus kekraapt hool waar mit en kroose xteen foer traan. ₃₉Too hot Yeesus keortnet:

— Nëmt te xteen wech!

Marta, em toote sayn xwester, saat:

— Hër, te riicht xon xlecht, wayl es sin xon fier taache woo eyer pekraapt kep is!

₄₀Yeesus hot keantwort:

— Hon ich tich net kesaat, wëns tuu klaawe teest, teest tuu Hërkot sayn kloor siin?

₄₁Tan hon se te xteen wech kehool. Yeesus hot noo em himel kekukt un saat:

— Fater, ich tanke tich wayls tuu mich keheyert host. ₄₂Ich wees tas tuu mich imer heyerst; awer ich sin tas am saan weche tëne fiile layt woo too sin, tas tii klaawe tas tuu mich kexikt hast.

₄₃Wii eyer tas kesaat hat, hot eyer kexraayt:

— Laasarus, khom raus!

₄₄Un te toote is raus khom. Sayn fiis un sayn hënt waare inkewikelt in lumpe xtriife, un sayn kesicht waar inkewikelt mit en lumpe. Too saat Yeesus:

— Tuut ti lumpe al ap wikle un lost em keen.

₄₅Fiil layt woo Maria pesuuche kang waare, hon kesiin was Yeesus kemach hot un hon an em keklaapt. ₄₆Awer phaar layt sin tsurik kang un hon fer ti fariseyer fertseelt was tee kemach hat. ₄₇Tan hon ti fariseyer un ti xëfe fon te priister sich fersamelt mit em Hooche Konseel un hon kesaat:

— Was sole meyer mache? Tee man is fiil wunere am mache! ₄₈Wën meyer em soo wayter mache lose, tuun se al an tëm klaawe. Tan tuun ti reemixe autoriteete keeche uns foer keen un tuun te Thëmpel fernichte, kraat soo wii unser natsioon.

₄₉Tan saat Kayfaas, woo an tëm yoer de Hooche Priister waar:

— Teyer weest kaar niks! ₅₀Meecht teyer net ferxteen tas fer aych peser is tas ploos eene man fer tas kanse folek xtërept anxtat ti kans natsioon fernichte lose?

₅₁In tëm momënt waar Kayfaas net aus sich selepst am xpreche. Awer, wii eyer te Hooche Priister an tëm yoer waar, waar eyer am profetiseere tas Yeesus xtërwe teet fer ti natsioon. ₅₂Un net ploos fer ti yute natsioon, awer aach fer em Hërkot sayn khiner, woo uf te kans welt ferxtraut sin, in eene eensichste khërwer fersamle.

₅₃Too, fon tëm taach aan wayter, hon ti yute fiirer pleen kemach fer Yeesus umpringe. ₅₄Tesweche is eyer xon net mee unich ti layt kang in te Yutëya, awer is pis an en rechioon kang ticht am tesërt, an en xtat woo Efraim heest, un is tort keplip mit sayn tisiple.

₅₅Hot weenich tsayt fer tas Oostre Fest kefeelt. Fiil yute sin pis Yeruusalëm kang foer em fest fer mit hale in te raynichung serimonii. ₅₆Ti waare Yeesus am suuche un wii se im thëmpel waare, hon se eene fer te anere kefroot:

— Was mënt teyer? Meecht tee uf tas fest khome?

₅₇Ti xëfe fon te priister un ti fariseyer wolte Yeesus in huke. Tesweche hon fer ti layt keortnert solte saan woo Yeesus weyer, wën yemant tas wist.