Yohan 10

₁Yeesus hot kesaat:

— Ich fersichere aych tas tas woer is: weyer net in te xoof xtal keet torich ti teyer, awer tuut iwich ti mauer hupse, is en xpits puup un pantit. ₂Awer, weyer torich ti teyer rin keet is te xeefer fom trop xeef. ₃Te porteyer macht tëm ti teyer uf. Ti xeef erkhëne tëm sayn xtim wën eyer se mit naame ruuft, un eyer tuut se raus fiire fom xtal. ₄Wën se al raus sin, keet eyer tëne foer aan, un tii keen tëm noo wayl se tëm sayn xtim khëne. ₅Awer uf khee aart keen se en frëmte noo! Kraat es keeche teel, tuun aus rayse, wayl se net ti xtim fom frëmte khëne.

₆Yeesus hot ti ferklaychnung kemach, awer nimant hot ferxtan was er saan wolt.

₇Too saat Yeesus wayter:

— Ich fersichere aych tas tas woer is: ich sin ti teyer woo ti xeef torich keen. ₈Al tii woo foer mich khom sin, sin xpitspuuwe un pantite, awer ti xeef hon khee acht kep an tëne sayn xtim. ₉Ich sin ti teyer. Weyer torich mich rin keet wërt keret; khan rin un raus keen un wil ese fine. ₁₀Te xpits puup khomt ploos fer se xteele, umpringe un fernichte; awer ich sin khom tas ti xeef leewe khëne hon, tas komplëte leewe.

₁₁— Ich sin te kuute xeefer; te kuute xeefer kept es leewe wëche sayn xeef. ₁₂En knecht xaft ploos weche em kelt; tee is khee xeefer, un ti xeef sin net tëm. Tesweche, wën er en wolef siit aan am khome, lost er ti xeef tsurik un tuut ausrayse. Tan tuut te wolef ti xeef iwerfale un ausnaner yaan. ₁₃Te knecht tuut ausrayse wayl xaft ploos weche em kelt un khimert sich net mit te xeef. _14-15Ich sin te kuute xeefer. Soo wii te Fater mich khënt, un ich te Fater khëne, soo tuun ich aach mayn xeef khëne, un tii khëne mich. Un ich sin fërtich fer se xtërwe weche tëne. ₁₆Ich hon anere xeef woo net hier in tëm xtal sin. Ich mus tii aach pringe, un tii wëre mayn xtim heere. Tan kewe ti eene eensichste trop xeef mit ploos eene xeefer.

₁₇— Te Fater liipt mich wayl ich mayn leewe kewe fer es noch mool tsurik se kriin. ₁₈Nimant hoolt mayn leewe fon mich wech, awer ich kewe es torich mayne aychne wile. Ich hon ti recht fer mayn leewe se kewe un noch mool tsurik kriin, wayl tas is es was mayne Fater kexikt hot tas ich mache solt.

₁₉Wii taas folek tas keheyert hot, hon se sich noch mool keteelt. Fiil hon kesaat:

₂₀— Tee is fon en taywel tomineyer! Tee is ferikt! Warom heyert teyer was tee saat?

₂₁Anere hon fersichert:

— Weyer fon en taywel tomineyert is xprecht net soo! Meecht en taywel ti plinte siin mache khëne?

₂₂Waar winter un in Yeruusalëm waare se tas “Ketachtnis Fest fom Wiiter Inwayung fom Thëmpel” am fayre. ₂₃Yeesus waar uf em hoof fom thëmpel rom am keen, ticht am “Salomons Foerpau”. ₂₄Too hot tas folek sich um em rom kesamelt un kefroot:

— Pis wan lost tuu uns in tswayfel? Saa mool kans klaar: pist tuu te Kristus ore net?

₂₅Yeesus hot keantwort:

— Ich saat xon, awer teyer het es net keklaapt. Ti aarwate woo ich mache torich ti kraft fon mayne Faters Naame xpreche kuut fer mich, ₂₆awer teyer klaapt es net wayl teyer net mayn xeef sayt. ₂₇Mayn xeef heere mayn xtim; ich khëne se un tii keen mich noo. ₂₈Ich kewe tëne es eewiche leewe un tesweche tuun se nii xtërwe. Nimant khan se fon mayn hant wech rope. ₂₉Ti kraft woo te Fater mich kep hot is kreeser wii ales, un nimant khan se fon tëm sayn hant wech rope. ₃₀Ich un te Fater sin ëne.

₃₁Too hon se noch mool xteen uf kerof fer Yeesus toot xmayse. ₃₂Un tee saat:

— Ich hon fiil kuut tings foer aych kemach woo te Fater mich kexikt hot mache. Weche was fon tëne wolt teyer mich umpringe?

₃₃Tii hon keantwort:

— Is net weche khee kuut tings woo meyer tich umpringe wole, awer, wayl wën tuu tas saast, pist tuu keeche Hërkot fluuche am aus saan. Wayl tuu, woo ploos en mënx pist, machst wii wën tuu Hërkot weyerst.

₃₄Too hot Yeesus fersichert:

— In ayer Kesets is kexrip tas Hërkot saat: “Teyer sayt kote.” ₃₅Meyer wise tas ti Hayliche Xrifte imer ti woerheet saan, un wise tas Hërkot wërklich kote kenënt hot tii woo tëm sayn mensaaj aan kenom hon. ₃₆Mich, awer, hot te Fater aus kesuucht un hot mich kexikt fer uf ti welt khome. Tan, warom saat teyer tas ich fluuche aus saan keeche Hërkot wën ich saan tas ich tëm sayne Soon sin? ₃₇Wën ich net mache was mayne Fater xikt, klaapt net an mich. ₃₈Awer, wën ich mache, un teyer klaapt net an mich, tan klaapt weenichtens an was ich mache. Un soo tas teyer ëntlichmool se wise kriit tas te Fater in mich leept un tas ich im Fater leewe.

₃₉Too hon se noch mool fersuucht Yeesus fange, awer eyer hot sich net fange kelos.

₄₀Yeesus is noch mool tsurik kang uf ti aner sayt fom Jortan flus, uf tas plats woo Yohann, Te Taafer, tefoer ketaaft hat, un is tort keplip. ₄₁Un fiil layt sin en trefe kang, am saan:

— Yohan hot khee wuner kemach, awer ales was tee saat iwer Yeesus is woer.

₄₂Un uf tëm plats hon fiil layt an Yeesus keklaapt.