Kalatas 4

₁Ich saan noch tas: soo lang wii te soon woo ti aychentum ërpe tuut noch net kroosyeerich is, kept eyer pehantelt als sklaawe, wën eyer ach in te woerheet te aychner is fon ales. ₂Soo lang wii tee yinger is, sin layt woo tee un aach sayn kexefter uf pase, pis an ti tsayt woo te fater aan kesaat hot. ₃Soo aach meyer, eep mer kaystlich kroos kewakst sin, waare meyer sklaawe fon te kaystliche machte woo ti welt tomineere. ₄Awer, wan ti richtich tsayt khom waar, hot Hërkot sayne aychne Soon kexikt, woo khom is als soon fon en mënxlich moter un hot unich te kesets keleept ₅fer pefraye tii woo unich te kesets waare, tas meyer khënte Hërkots khiner kewe.

₆Un, fer se tsayche tas teyer tëm sayn khiner sayt, hot Hërkot te Kayst fon sayne Soon kexikt fer unser hërts, te Kayst woo aus ruuft: “Fater, mayne Fater.” ₇Soo, sayt teyer net mee sklaawe; teyer sayt khiner. Un, wii teyer khiner sayt, kept Hërkot aych ales was eyer se kewe hat fer sayn khiner.

₈In te ferkangne tsayt het teyer Hërkot net kekhënt un, tesweche, waart teyer sklaawe fon kote woo, in te woerheet, khee kote sin. ₉Awer, yets woo teyer Hërkot khënt, un peser, yets woo Hërkot aych khënt, wii soo wolt teyer tsurik keen an tii kaystliche machte woo xwach un oone weyert sin? Warom wolt teyer tëne sayn sklaawe noch mool sin? ₁₀Warom kept teyer soo fiil importans fer etliche taache, yoer tsayte un yoore? ₁₁Ich mache mich wërklich soriche iwich aych! Meecht ti kans aarwat woo ich mit aych hat niks weyert sin?

₁₂Mayn priiter, ich pite tas teyer wërt wii ich. Wayl ich sin wii teyer, un teyer het mich in niks pelayticht. ₁₃Teyer wist toch noch warom ich aych es eyerxte mool te ewankeelium aan kesaat hon? Tas waar wayl ich krank waar. ₁₄Awer, teyer het mich net ap ërnst foer kehool un net ap kextoost, wën ach mayn kesuntheet en hart proop fer aych waar. Im keeche teel, het teyer mich ap kehool wii wën ich en ëngel fon Kot weyer ore wii ich te aychne Yeesus Kristus weyer. ₁₅Un wii hërlich waart teyer. Ich khan fersichere tas, wën teyer het khënte, het teyer ayre aychne aue aus keropt fer mich se kewe. Was is paseyert? ₁₆Khan tas woer sin tas, wayl ich ti woerheet kesaat hon, ich mich in ayre faynt transformeyert hon?

₁₇Tii mëner tsayche en kroose interese an aych, awer tëne sayn intensioon is net kuut. Was tii wole is aych ausnaner mache fon mich, tas teyer te selwiche interese an tëne xpiert woo tii an aych tsayche. ₁₈Is kuut tas teyer imer en echte interese hat, net ploos wën ich pay aych sin. ₁₉Mayn liipe khiner, ich sin am layte weche aych, wii en fraa mit te phayn fer en khint kriin. Un tuun wayter layte pis Kristus mit aych am leewe is. ₂₀Wii kërn teet ich too pay aych sin fer ayer hërts xpreche khëne! Ich sin kans pekhimert mit aych.

₂₁Teyer woo wolt unich te kesets sin, saat mich etwas: sayt teyer net am heere was tas Kesets saat? ₂₂Tas saat tas Aapraham tswaay khiner kehat hat: eene, fon en sklaawe fraa, Agar; un anere fon en fraa woo fray waar, Sara. ₂₃Te sklaawe fraa sayn khint is ketsoo kep wii ti kanse khiner ketsoo kewe, awer te fraa woo frfay waar sayn khint is ketsoo kep weche Hërkot sayn ferxprechung. ₂₄Tas tiint als simpool: ti tswaay fraae tuun ti tswaay alianse ap pilte. Een alians is tii fom Sinay përich un is ap kepilt torich Agar. Tii woo fon tee alians sin, kewe als sklaawe kepoer. ₂₅Wayl Agar is te Sinay përich, in Araapia, am ap pilte, un Agar is te simpool fon te aktual Yeruusalëm, woo sklaawe is mit sayn kans folek. ₂₆Awer, ti himlix Yeruusalëm is fray un is unser moter. ₂₇Wayl ti Hayliche Xrifte saan:

₂₈Mayn priiter, teyer sayt wii Iisak; sayt Hërkot sayn khiner weche Hërkot sayn ferxprechung. ₂₉In tëne tsayte, hot te soon woo ketsoo kep waar wii ti kanse khiner ketsoo kewe te soon woo ketsoo kep waar weche Hërkot sayne Kayst keyacht; un tas selwiche tings is yets am paseere. ₃₀Awer was saan ti Hayliche Xrifte? Tii saan: “Xik ti sklaawe fraa fort un tëm sayne soon, wayl te soon fon te sklaawe fraa ërept net em fater sayn aychentum, mit em soon fon te fraa woo fray is.” ₃₁Also, mayn priiter, meyer sin net khiner fon en sklaawe fraa, awer fon en fraa woo fray is.