Kesets ore klaawe
1Oh Kalater oone ferxtant! Weyer waar es woo aych ferhekst hot? In mayn preeticht fer aych hon ich Yeesus Kristus sayne toot am krayts perfekt pexrip; khan mer saan tas teyer Yeesus am krayts kesiin hat. 2Antwort mich ploos tas: het teyer te Hërkots Kayst uf kenom wayl teyer kemach het was ti kesets xikt ore wayl teyer ti mensaaj fom ewankeelium aan keheyert het un too traan keklaapt het? 3Wii soo khënt teyer soo weenich ferxtant hon? Teyer het ayer kristlich leewe aankefang torich em Hërkot sayne Kayst un yets wolt teyer pis ans ën keen mit ayer aychne kraft? 4Meecht tas tings woo teyer mit kemach het fer niks ketiint hon? Tas is net meechlich! 5Meecht Hërkot sayne Kayst kewe un wunere unich aych mache wayl teyer ti kesets noo keet? Meecht tas net sin wayl teyer ti mensaaj aan heyert un traan klaawe tuut?
6Tënkt traan an was ti Hayliche Xrifte saan iwer Aapraham: “Tee hot an Hërkot keklaapt, un tesweche hot Hërkot en aan kenom.” 7Also, teyer mist wise tas ti echte nookhomer fon Aapraham sin tii woo klaawe hon. 8Eep tas paseere teet, hon ti Hayliche Xrifte aankesaat tas Hërkot aan nëme teet tii woo khee yute sin torich em klaawe. Tesweche, eep ti tsayt khome teet, hon ti Xrifte ti kuut naychkheet aankesaat fer Aapraham, am saan: “Torich tich, tuut Hërkot ale foleke seechne.” 9Aapraham hot too traan keklaapt un is keseechent kep; soo, al ti woo klaawe kewe keseechent wii tee keseechent kep waar.
10Tii woo ti kesets noo keen sin unich Hërkot sayn ferfluuchung. Wayl ti Hayliche Xrifte saan: “Weyer net imer aan heyert ales was kexrip is im Puch fon te Kesets is unich Hërkot sayn ferfluuchung.” 11Is sicher tas nimant aan kenom kept fon Hërkot torich ti kesets, wayl ti Hayliche Xrifte saan: “Wërt leewe tee woo, torich em klaawe, aan kenom kept fon Hërkot.” 12Awer ti kesets hot niks se tuun mit klaawe. In keeche teel, wii ti Xrifte saan: “Wërt leewe tee woo macht was ti kesets xikt.”
13Awer Kristus hat uns loos khaaft fom fluuch unich tas kesets wan eyer sich ferfluuchung kemach hat uf unser plats. Wii ti Hayliche Xrifte saan: “Ferfluucht yeete woo an en krayts kehonk kept.” 14Kristus hot tas kemach tas, torich Yeesus Kristus, ti seechnung woo Hërkot ferxproch hat fer Aapraham kep wërt fer tii woo khee yute sin un tas meyer al torich em klaawe te Kayst kriin woo Hërkot ferxproch hat.
Ti kesets un ti ferxprechung
15Mayn priiter, ich penutse en payxpiil fom taachliche leewe: wën tswaay persosone etwas ap mache un unertsaychne en kontrat, khan nimant tee ferpreche ore etwas tepay xraywe. 16Hërkot hot sayn ferxprechunge kemach fer Aapraham un fer sayne nookhomer. Wën ti Xrifte saan tas Hërkot sayn ferxprechunge kemach hot fer Aapraham “un fer sayn nookhomenxaft”, wole tii net saan tas tas fon fiile mënxe xprecht, awer ploos eene, was mënt, Kristus. 17Was ich saan wil is tas: Hërkot hot en alians kemach mit Aapraham un hot ferxproch tas in hale. Ti kesets, woo fierhunert un traysich yoer xpeeter kep waar, khan net tii alians ferpreche, net mool Hërkot sayn ferxprechung anuleere. 18Wayl, wën was Hërkot kept te kesets noo keen mus, tan was eyer kept hëngt xon net mee ap fon sayn ferxprechung. Awer, was Hërkot fer Aapraham kep hat, hot eyer kep wayl eyer ferxproch hat.
19Tan, warom is ti kestets kep waar? Ti is kep waar fer tas tings se tsayche woo keeche Hërkot sayne wile sin. Ti kesets solt hale pis Aapraham sayne nookhomer kheemt, wayl ti ferxprechung is kemach kep fer tee nookhomer. Tas kesets is fon ëngle ap kep waar, un en man hot ketiint als mitler. 20Awer, is net nootwënich en mitler hon wën mer am xpeche is fon ploos eene mënx; un Hërkot is ploos eene.
Te opjektiif fom kesets
21Meecht tas petayte wole tas ti kesets keeche Hërkot sayn ferxprechunge is? Sicher net! Wayl, wën en kesets kep weyer woo leewe fer ti layt kewe khënt, tan teere tii aan kenom kewe fon Hërkot wayl se ti kesets aan heere teere. 22Awer, ti Hayliche Xrifte fersichere tas ti kans welt tomineyert is fon te sinte, un tas paseyert soo tas ti layt woo klaawe kriin tuun was Hërkot ferxprecht fer tii woo klaawe hon an Yeesus Kristus.
23Awer, eep ti tsayt fom klaawe khom waar, waare meyer kefangne fon te kesets, pis te klaawe woo khome solt reweleyert keept. 24Soo, meyer waare unich tee kesets pis Kristus khome teet tas meyer fon Hërkot aan kenom keepte torich em klaawe. 25Yets woo ti tsayt fom klaawe khom is, prayche meyer net mee unich te kesets playwe.
26Also, torich em klaawe an Yeesus Kristus, sayt teyer al Hërkot sayn khiner. 27Wayl teyer ketaaft kep waart fer fereenicht playwe mit Kristus un soo sich keklayt mit te kwaliteete fom aychne Kristus. 28Soo kept es khee unerxiite unich yute un tii woo khee yute sin, tswixe sklaawe un fraye layt, tswiche mëner un fraae: al teyer sayt eene in eenichkheet mit Yeesus Kristus. 29Wën teyer tsu Kristus keheyert, tan sayt teyer nookhomer fon Aapraham un wërt kriin was Hërkot ferxproch hot.
