Kalatas 2

₁Fërtsen yoer tëm noo, sin ich tsurik noo Yeruusalëm kang mit Barnabë un hon Titus mit mich kenom. ₂Ich sin tsurik tort hiin kang wayl Hërkot mich reweleyert hot tas ich tas mache solt. Too, in en fersamlung mit te fiirer fon te khërich, hon ich tëne auskeleet ti mensaaj fom ewankeelium woo ich aan saan fer tii woo khee yute sin. Ich wolt net hon tas tii aarwat woo ich kemach hat ferloer këngt. ₃Titus waar pay mich, awer eyer waar net ketswung kep sich pexnayte lose, wën eyer ach khee yut waar. ₄Awer phaar layt hate sich mit uns kesamelt kehat, am mache wii wën se priiter im klaawe weere, un wolte iim pexnayte. Waare mëner woo in te kruupe khom waare als xpioone fer ti frayheet woo meyer hon wayl meyer fereenicht sin mit Yeesus Kristus xpikuliire un fer uns noch mool in sklaawe transformeere. ₅Awer, in khee momënt hon meyer uf kep, wayl meyer wolte hon tas teyer te echte ewankeelium kriin teet.

₆Un tii woo aus kesiin hon tas se ti fiirer fon te khërich weere — ich saan tas wayl es mich niks aus macht was se waare, wayl Hërkot julkeyert net torich em xayn — tii fiirer, saan ich noch mool, hon mich khee een nay itee kep. ₇In keeche teel, tii hon kesiin tas Hërkot mich kexikt hat te ewankeelium aan saan fer tii woo khee yute sin, soo wii eyer fer Pheeter ti responsapiliteet kep hat fer te ewankeelium aan saan fer ti yute. ₈Wayl, torich Hërkot sayn macht sin ich aphostel kemach kep fer te ewankeelium aan saan fer tii woo khee yute sin, soo wii Pheeter aphostel kemach kep waar fer te ewankeelium aan saan fer ti yute. ₉Tesweche hon Tiaako, Pheeter un Yohan, woo ti fiirer fon te khërich kerechent waare, erkhënt tas Hërkot mich en xpetsiaale ufkaape kep hat. Un, als sinal tas meyer partner weere, hon se fer mich un Barnabë ti hant kep. Un meyer al mitsamer hon pextimt tas ich un Barnabë unich tëne woo khee yute sin xafe teere un tii unich te yute. ₁₀Tii hon uns ploos een tings ferlangt: tas meyer an tii aarme fon tëne sayn khërich tënke solte, un tas hon ich imer fersuucht se mache.

₁₁Awer, wan Pheeter noo Antiokia in Siiria khom is, hon ich mich keeche iim kextelt in puplikum, wayl eyer kans ferkheyert waar. ₁₂In te woerheet, eep ti phaar mëner woo Tiaako kexikt hat aankhom sin, hot Pheeter am tix kes mit tëne priiter woo khee yute sin. Awer, noo em aankhom fon tëne mëner, wolt eyer net mee am tix ese mit te priiter woo khee yute sin, wayl eyer pang hat fon tëne woo tii woo khee yute sin pexnayte wolte. ₁₃Un aach ti anere yute priiter hon aankefang se hantle wii xaynhayliche, kraat soo wii Pheeter. Un sokaar Barnabë hot sich kelos mit xlepe torich tëne sayn xaynhaylichkheet. ₁₄Wan ich kesiin hon tas tii net richtich am hantle waare, tëm noo em ewankeelium sayn woerheet, saat ich fer Pheeter, foer ale layt: “Tuu pist en yut, pist awer net am leewe als en yut un toch wii yemant woo khee yut is. Tan, wii soo wilst tuu tii woo khee yute sin tswinge sole leewe als yute?”

₁₅Ti woerheet is tas meyer yute sin torich em kepoer un net “sinter woo khee yute sin”, wii se kenënt kewe. ₁₆Awer, meyer wise tas se al aan kenom kewe fon Hërkot ploos torich em klaawe an Yeesus Kristus un net wayl se ti kesets noo keen. ₁₇Wën meyer fersuuche aan kenom kewe fon Hërkot wayl meyer fereenicht sin mit Kristus, kept es klaar tas meyer “sinter” sin wii tii woo khee yute sin. Awer, meecht tas mëne tas Kristus fer ti sinte xafe tuut? Sicher net! ₁₈Wën ich, noo te fernichtung fon te kesets, aanfange noch mool se uf paue als mitel fer aan kenom kewe fon Hërkot, tan, yoo, kept es klaar tas ich ti kesets ferproch hon. ₁₉Also, was te kesets aan keet, sin ich toot, umkeprung torich ti aychne kesets, fer se leewe fer Hërkot. Ich sin toot kemach kep mit Kristus am krayts. ₂₀Soo, sin xon net mee ich woo leewe, awer is Kristus woo in mich leept. Un tas leewe woo ich yets leewe, leewe ich torich em klaawe an Hërkot sayne Soon, woo mich keliipt hot un hot sich selepst kept weche mich. ₂₁Ich wil sicher net te Hërkots knaate ap saan. Wayl, wën es torich ti kesets is woo ti mënxe aan kenom kewe fon Hërkot, tan hot Yeesus sayne toot niks kenutst.