Kalatas 1

₁Ich, Phaulus, xraywe tee priif — ich woo keruuf kep sin fer aphostel sin, net fon layt ore torich eene mënx, awer torich Yeesus Kristus un Hërkot, te Fater, woo Yeesus peleept hot fom toot. ₂Al ti priiter woo too pay mich sin xike pekriisunge fer ti khëriche fon Kalasia.

₃Tas Hërkot un Yeesus Kristus sayne knaate un friite mit aych sich ferhalt!

₄Em Hërkot un Fater sayne wile am tuun, hot Kristus sich ap kep fer toot kemach kewe fer unser sinte un soo uns prefraye fon tee xlecht welt. ₅Fer Hërkot keheyert ti kloor fer ti kans eewichkheet! Aamen!

₆Ich ferwunere mich mit aych, wayl sayt soo xnel am ferlose tee woo aych keruuf hot torich Kristus sayne knaate un sayt en anere ewankeelium am aan nëme. ₇In te woerheet kept es khee anere ewankeelium, awer ich xpreche soo wayl es phaar persoone kept woo aych am xteere sin, un wole Yeesus sayne ewankeelium ënere. ₈Awer, wën yemant, op tas meyer sin ore en ëngel fom himel, aan saat fer aych en anerxtere ewankeelium fon tëm woo meyer aych kelërnt hon, tas tee ferfluucht kept! ₉Meyer hon xon tefoer kesaat un saan es noch mool: wën yemant en anerxtere ewankeelium aan saat fon tëm woo teyer aan kenom hat, tas tee persoon ferfluucht kept. ₁₀Meecht ich te mënxe sayn tsuuxtimung suuche? Nee! Was ich wil is Hërkot sayn tsuuxtimung. Meecht ich ti mënxe kefale wole? Wën tas soo weyer, weyer ich net Kristus sayne tiiner.

₁₁Mayn priiter, ich fersichere aych tas te ewankeelium woo ich aan saan is khee mënxlich inwentsioon. ₁₂Ich hon tee net kriit fon nimant, un nimant hot tee fer mich kelërnt, awer es waar te aychne Yeesus Kristus woo tee fer mich reweleyert hot.

₁₃Teyer het keheyert xpreche wii ich kemach hon wan ich te relichioon fon te yute noo kang sin. Wist wii ich em Hërkot sayn Khërich keyacht hon oone niks xoone un ales kemach hon fer se fernichte. ₁₄Wan ich tii relichioon praktiseyert hon, waar ich mee foran als ti meyerxte fon te anere yute fon mayn elter un sin mayn foerkhomer sayn tratitsioone noo kang mit kroos acht.

₁₅Awer Hërkot, in sayne knaate, hot mich aus kesuucht noch eep ich kepoer kep waar un hot mich keruuf fer iim se tiine. Un, wii eyer resolweyert hot ₁₆sayne Soon fer mich reweleere tas ich ti kuut naychkheet iwich iim aan saan solt fer tii woo khee yute sin, sin ich niks frooe kang fer nimant. ₁₇Un sin aach net noo Yeruusalëm kang fer se xpreche mit tëne woo aphostle waare foer mich. In keeche teel, ich sin noo te rechioon Araapia kang un tëm noo sin ich tsurik noo Damaskus kang. ₁₈Tray yoer truf, sin ich pis Yeruusalëm kang fer informatsioone ferlange fer Pheeter un sin tswaay woche pay tëm keplip. ₁₉Un hon mit khee anere aphostel kexproch, sonst Yaakhop, em Hër sayne pruuter.

₂₀Was ich fer aych am xraywe sin is woer. Hërkot wees tas ich net am liye sin.

₂₁Tëm noo, sin ich noo te rechioone fon Siiria un Siliisia kang. ₂₂Iwich tii tsayt hon ti layt fon te khëriche fon Yutëya mich net perseenlich kekhënt. ₂₃Ti hate noore keheyert kehat was ti anere kesaat hate: “Tee woo tefoer uns keyacht hat, is yets te klaawe am aan saan woo tee in te ferkangne tsayt fernichte wolt!” ₂₄Un hon Hërkot keloopt weche mich.