Akte 9

₁In tee tsayt, hot Saulo net uf keheyert mit kewalt aan saan teet Yeesus sayn aanhënger umpringe. Eyer is mit em Hooche Priister xpreche kang ₂un hot presentatsioon priife ferlangt fer ti sinakooke fon te xtat Damasco. Mit tëne tokumënte khont Saulo ti aanhënger fom Hër sayne Weech woo too kewoont hon inxpërte un noo Yeruusalëm nëme, soo fiil ti mëner wii ti fraae.

₃Awer, uf em weech noo Damasco, wii Saulo xon ticht an tee xtat waar, uf mool is en licht fom himel khom un hot um iim rom kexaynt. ₄Eyer is uf te potem kefal un hot en xtim keheyert woo saat:

— Saulo, Saulo, warom tuust tuu mich yachte?

₅Saulo hot kefroot:

— Weyer sayt teyer?

Ti xtim hot keantwort:

— Ich sin Tee woos tuu yachst. ₆Awer, xtay uf, kee in ti xtat, un too tuun se tich saan was tuu mache must.

₇Ti mëner woo mit Saulo am reese waare sin xteen keplip oone niks saan khëne. Tii hon ti xtim keheyert, awer hon nimant kesiin. ₈Saulo is uf kextii un hot ti aue uf kemach, awer khont niks siin. Tan hon se iim an ti hant kehool un hon em noo Damasco kefiert. ₉Eyer is tray taache keplip oone siin khëne un iwer tii tray taache hot eyer niks kes un niks ketrunk.

₁₀In Damasco hot Yeesus sayne aanhënger kewoont woo Ananias kenënt waar. Tee hot en erxaynung kesiin, woo eyer te Hër kesiin hot, am ruufe:

— Ananias!

Eyer hot keantwort:

— Ich sin hier, Hër!

₁₁Un te Hër saat:

— Mach tich fërtich, un kee pis an Yuutas sayn haus, an ti Rechts xtroos, un suuch en man woo Saulo heest, fon te xtat Tarso. Tee is am peete ₁₂un hat en erxaynung kehat. In sayn sicht is en man woo Ananias heest tsum foerxayn khom, woo rin khom is un hot ti hënt iwer iim kehal tas eyer noch mool siin khënt.

₁₃Ananias hot keantwort:

— Hër, fiil layt hon mich fertseelt iwer te man un fon ale xlechtichkheete woo tee in Yeruusalëm kemach hot keeche ti layt woo an Aych klaawe. ₁₄Un yets is tee noo Damasco khom mit ortnung fon te xëfe fon te priister fer inxpërte al tii woo tich atoreere.

₁₅Awer te Hër saat fer Ananias:

— Kee, wayl ich hon tee man aus kesuucht fer se xafe fer mich, tas tee mayne naame aan saat fer tii woo khee yute sin, fer ti kheeniche un fer tas israelite folek. ₁₆Ich selepst tuun fer Saulo tsayche ales was eyer mit mache mus weche mich.

₁₇Tan is Ananias kang, is in Yuutas sayn haus rin kang, hot sayn hënt iwer Saulo kehal un saat:

— Saulo, mayne pruuter, te Hër woo mich heyer kexikt hot is tee selwiche Yeesus woos tuu uf em weech fon Damasco kesiin host. Tee hot mich kexikt tas tuu noch mool siin solst un fol fom Hayhliche Kayst kepst.

₁₈Im selwiche momënt sin soo tinger wii fix xupe fon tëm sayn aue ap kefal un eyer khont noch mool siin. Tee is uf kextii un is ketaaft kep. ₁₉Tëm noo hot eyer etwas kes un is xtarek kep wii tefoer.

Saulo is phaar taache in Damasco keplip mit Yeesus sayn aanhënger. ₂₀Un hot klaych aankefang Yeesus aan se saan in te sinakooke, am saan:

— Yeesus is em Hërkot sayne Soon.

₂₁Al tii woo Saulo am heere waare hon sich ferwunert un hon kefroot:

— Is tas net te man woo in Yeruusalëm Yeesus sayn aanhënger al am umpringe waar? Waar es net tee woo heyer khom waar fer ti layt se fange un hiin nëme fer ti xëfe fon te priister?

₂₂Awer Saulo sayn mensaaje sin imer krefticher kep. Un ti pewaysunge woo eyer am pringe waar tas Yeesus te Kristus weyer waare soo xtarek, tas ti yute woo in Damasco kewoont hon net wuste was se saan.

₂₃Fiile taache tëm noo, hon ti yute fon Damasco sich fersamelt un hon pextimt iim umpringe. ₂₄Awer Saulo hot tëne sayne plaan se wise kriit. Tii hon tas toer fon te xtat taache un nacht kewacht fer em toot se mache. ₂₅Awer, selich nacht, hon Saulo sayn aanhënger em in en khorep ketuun un hon em runer kelos torich en loch woo an te mauer fon te xtat waar.

₂₆Saulo is noo Yeruusalëm kang un hot fersuucht sich fersamle mit Yeesus sayn aanhënger. Awer al hate pang fon tëm wayl se net keklaapt hon tas eyer aach en aanhënger fon Yeesus weyer. ₂₇Tan hot Barnabë em kehoelf un hot en presenteyert fer ti aphostle. Un hot tëne fertseelt wii Saulo te Hër kesiin hot uf em weech un wii te Hër mit iim kexproch hat. Barnabë hot aach fertseelt wii, in Damasco, Saulo mit koraaj te ewankeelium aan kesaat hot torich te macht fon Yeesus sayne naame. ₂₈Tëm noo, is Saulo mit tëne keplip, in Yeruusalëm iweraal rom am keen; un, torich ti macht fom Hër sayne naame, hot eyer mit koraaj te ewankeelium aan kesaat. ₂₉Eyer hot aach kexproch un tiskuteyert mit te yute woo aus Israel kroos kewakst sin, awer tii hon fersuucht iim um se pringe. ₃₀Wii ti priiter tas se wise kriit hon, hon se Saulo pis an ti xtat Sesarëya kenom, un tëm noo pis an ti xtat Tarso.

₃₁In te kans rechioon fon Yutëya, Kalilëya un Samaria, waar ti Khërich in ruu. Tii waar yeetes mool xtërker, kewakst im numer mënxe mit em hilef fom Hayliche Kayst un en kroose rexpekt ketsaycht fer Yeesus Kristus.

₃₂Pheeter is iweraal hiin kereest. Eene taach is eyer em Hërkot sayn folek pesuuche kang woo in te xtat Lida kewoont hot. ₃₃Too hot eyer en man ketrof woo Enëyas keheest hot, woo laam waar un xon acht yoer net mee aus em pet khom waar. ₃₄Pheeter saat iim:

— Enëyas, Yeesus Kristus hot tich xon kuriert. Xtay uf un tuu tayn pet uf raume.

Im selwiche momënt is Enëyas uf kextii. ₃₅Tan hon ti kanse pewooner fon te xtat Lida un fon te rechioon fon Sarom tas kesiin un hon am Hër keklaapt.

₃₆In te xtat Yope waar en aanhëner fon Yeesus woo Tabita kenënt waar. (Tee naame in kriichich mënt Dorca). Sii hot sayn kans tsahyt penutst fer kuutes se tuun un ti aarme layt am helfe.

₃₇In tëne taache is Dorcas krank kep un is kextorep. Hon tëm sayne khërwer kewex un tan in en tsimer im tswete xtok ketuun. ₃₈Yope waar ticht fon Lida kewees. Wii Yeesus sayn aanhënger in Yope se wise kriit hon tas Pheeter in Lida waar, hon se tswaay mëner kexikt fer tii orte se xike:

— Pite, khom xnel noo Yope!

₃₉Tan hot Pheeter sich fërtich kemach un is mit tëne kang. Wii se tort hiin khom sin, hon se em ruf an tas tsimer hiin kefiert. Ti kanse witfraae sin um em rom khom, am prile un sayn klayter am tsayche un aner klaytung woo Dorcas tëne kemach hat wii se noch leewent waar. ₄₀Tan hot Pheeter kexikt solte al aus em tsimer keen un klaych hot eyer sich kekniit un kepeet. Tëm noo, hot eyer sich noo Dorcas sayne khërwer kewënt un saat:

— Tabita, xtay uf!

Tii hot ti aue uf kemach un, wii se Pheeter kesiin hot, hot se sich kesetst. ₄₁Pheeter hot se an te hant kehool un hot se keholef uf xtaye. Klaych tëm noo hot eyer tas kanse folek fon te khërich keruuf, sokaar ti witfraae, un hot se tëne ap kep, leewent.

₄₂Ti naychkheete iwich tas hon sich ferxtraut in te kans xtat Yope, un fiile hon am Hër keklaapt. ₄₃Un Pheeter is fiil taache tort keplip, im haus fon en leter kërwer Simon kenënt.