Akte 10

₁In te xtat Sesarëya waar en man Kornëëlio kenënt, woo te komantant waar fon en reemixe patalyon, woo “Italieenixe Patalyon” keheest hot. ₂Eyer waar en relichioosixe man; tee un al ti layt fon sayn haus hon Hërkot atoreyert. ₃Eene taach, unkefeyer um tray uer mitachs, hot Kornëëlio en visoon kehat. Eyer hot kans klaar kesiin em Hërkot sayne ëngel woo ticht khom is un saat:

— Kornëëlio!

₄Tee hot te ëngel aan kekukt un, mit fiil pang, hot eyer kefroot:

— Was is, Hër?

Te ëngel hot keantwort:

— Hërkot hot tayn kepeet aan kenom un aach te hilef woos tuu fer ti aarme kep host. ₅Yets xik phaar mëner pis an ti xtat Jope fer te man woo Simon Pheeter heest hoole keen. ₆Tee is in te khost pay en anere Simon, en leter kërwer woo am meer rant woont.

₇Wii te ëngel fort kang is, hot Kornëëlio klaych tswaay knechte keruuf un en soltaat woo poay em am xafe waar un en relichioose man waar. ₈Kornëëlio hot tëne ales was paseyert waar fertseelt un hot se noo Jope kexikt.

₉Am anere taach, iwer mitach, is Pheeter uf te teras kang fer se peete. In tee tsayt, waare ti mëner torich te weech am khome, xon ticht an Jope. ₁₀Pheeter hot hunger kriit un wolt etwas ese. Soo lang wii tas ese am khoche waar, hot tee en wisioon kriit. ₁₁Hot te himel uf kesiin un en kroos tings eenlich mit en kroos layn tuuch aan kepun an te fier xpitse, woo pis uf te potem am khome waar. ₁₂In tëm tings waare ale sorte fii mit fier phoote, fii woo sich uf em potem rom xlept un feel. ₁₃Tan hot Pheeter en xtim keheyert, woo saat:

— Pheeter, xtay uf! Xlacht un es!

₁₄Pheeter hot keantwort:

— Uf khee aart, Hër! Ich hon noch nii etwas kes woo ti Kesets trekich rechent ore unrayn!

₁₅Ti xtim hot noch mool mit iim kexproch:

— Tuu net unrayn nëne was Hërkot keraynicht hot.

₁₆Tas is tray mool paseyert. Klaych tëm noo is tas tings woo wii en layn tuuch waar tsurik noo em himel kenom kep.

₁₇Pheeter hot aankefang sich selwer se frooe was tii wisioon petayte solt. Un in tëm momënt hate ti mëner woo Kornëëlio kexikt hat sich xon informeyert woo Simon sayn haus playwe teet un waare an te tier. ₁₈Ti hon yemant fom haus keruuf un hon kefroot:

— Is filaych en man Simon Pheeter kenënt hier pay aych in te khost?

₁₉Pheeter waar noch an ti wisioon am tënke, wii te Hayliche Kayst tëm saat:

— Heyer! Sin tray mëner too, tich am suuche! ₂₀Yets mach tich fërtich un kee mit tëne. Kee in ruu, wayl tas waar ich woo tii heyer kexikt hon.

₂₁Tan is Pheeter runer kang un saat fer ti mëner:

— Ich sin weyer teyer am suuche sayt. Warom sayt teyer heyer khom?

₂₂Tii hon keantwort:

— Meyer sin kexikt kep fom komantant Kornëëlio. Tee is en kuute man, klaapt an Hërkot un is aarich rexpekteyert unich ale yute. En ëngel fon Hërkot hot kexikt tas eyer tich ferlange solt tas tuu pis an tëm sayn haus khome solst tas tee heere sol was tuu se saan host.

₂₃Tan hot Pheeter ti mëner in kelaat fer rin khome, un hot se iwernacht too in lojii pehal.

Am neekste taach hot Pheeter sich fërtich kemach un is mit tëne kang, un phaar priiter woo too kewoont hon sin aach kang. ₂₄Am anere taach sin se aankhom in te xtat Sesarëya. Kornëëlio un ti tichste ferwante un froynte woo eyer in kelaat hat waare Pheeter xon am waarte. ₂₅Wii Pheeter rin am khome waar, is Kornëëlio tëm inkeeche khom, hot sich kekniit un hot te khop niter kehal foer em. ₂₆Awer, Pheeter hot em uf xtaye kexikt un saat:

— Playt uf xteen, wayl ich sin ploos en man wiis tuu.

₂₇Soo lang eyer mit Kornëëlio fertseelt hot, is Pheeter ins haus kang un hot fiil layt too fersamelt aan ketrof. ₂₈Tan saat eyer fer se al:

— Teyer wist kans kuut tas te yute sayn relichioon khee erlaupnis kept tas se froyntxaft mache mit weem khee yut is ore in tëne sayn haus rin keen khan. Awer Hërkot hot mich ketsaycht tas ich nimant unrayn ore trekich nëne tëref. ₂₉Tesweche, wan teyer mich keruuf hot, sin ich kuutwilich khom. Yets wil ich wise warom teyer mich ruufe kexikt het.

₃₀Kornëëlio hot keantwort:

— Tray taache tsurik, um tray uer mitachs, waar ich am peete hier tehëm. Uf mool, is en man mit ways tsaych foer mich tsum foerxayn khom ₃₁un saat: “Kornëëlio, Hërkot hot tayn kepeet aan keheyert un traan ketënkt an ales was tuu machst fer ti aarmne layt se helfe. ₃₂Xik yemant pis Jope fer Simon hoole keen, woo aach Pheeter kenënt is. Tee is in Simon, te kërwer, sayn haus in te khost, woo am rant fom meer woont.” ₃₃Too hon ich tich klaych ruufe kexikt, un tuu host es kuut kemach in khome. Yets sin meyer hier al fersamelt in Hërkot sayn presëns, fërtich fer se heere was te Hër tich kexikt hot saan.

₃₄Tan hot Pheeter aankefang se xpreche. Eyer saat:

— Yets wees ich tas, wërklich, Hërkot al ekaal pehantelt, ₃₅wayl eyer tuut se al aan nëme tii woo an em klaawe un mache was richtich is, ekaal was fer sayn rase is. ₃₆Teyer khënt ti mensaaj woo Hërkot kexikt hot fer tas folek fon Israël, ti kuut naychkheet fon friite am aan saan torich Yeesus Kristus, woo te Hër fon al is. ₃₇Teyer wist was paseyert is im kanse lant fon Israël, am aanfange in Kalilëya, tëm noo wii Yohan sayn mensaaj kepreeticht hot iwich tas taafe. ₃₈Wist aach wii Hërkot te Hayliche Kayst ferxut hot iwich Yeesus fon Nasarëë un hot tëm macht kep. Yeesus is iweral torich kang tas kuutes am mache un am heele al tii woo tomineyert waare fom Taywel, wayl Hërkot mit iim waar. ₃₉Meyer sin tsayer fon ales was eyer kemach hot im lant fon Israël, sokaar in Yeruusalëm. Un tëm noo hon se em toot kemach, an en krayts am naachle.

₄₀Pheeter saat wayter:

— Awer, Hërkot hot Yeesus peleept am trite taach un hot aach kemach tas eyer fer uns tsum foerxayn khom is. ₄₁Eyer is net fom kanse folek kesiin kep, awer ploos fon uns, woo ti tsayer sin woo Hërkot raus kesuucht hat. ₄₂Yeesus hot uns kexikt te ewankeelium aan saan fer tas folek un tsayer xpiile tas Hërkot iim hiin ketuun hot als Richter fon te leewente un fon te toote. ₄₃Ti kanse profëte hon iwer Yeesus kexproch, am saan tas tii woo an tëm klaawe kriin, torich tëm, ti fertsayung fon te sinte.

₄₄Wii Pheeter noch am xpreche waar, is te Hayliche Kayst runer khom iwer al tii woo ti mensaaj am aan heere waare. ₄₅Ti yute woo Yeesus sayn aanhënger waare, woo mit khom waare fon Jope, hon sich ferwunert tas Hërkot te kaape fom Hayliche Kayst ferxut hot iwer tii woo khee yute sin. ₄₆Wayl tii hon keheyert ti woo khee yute sin xpreche in frëmte xprooche un ti kroosheet fon Hërkot loope. Tan saat Pheeter:

₄₇— Tii layt hon te Hayliche Kayst kriit soo wii meyer en aach kriit hon. Meecht yemant ferpiite tas se ketaaft kewe mit waser?

₄₈Tan hot eyer kexikt tas tii layt ketaaft keepte in Yeesus Kristus sayne naame. Un tii hon ferlangt fer Pheeter solt phaar taache too playwe.