Pheeter tuut ausleye was paseyert waar
1Ti aphostle un ti anere aanhënger fon Yeesus in te kans rechioon Yutëya hon se wise kriit tas tii woo khee yute sin aach em Hërkot sayn wort aan kenom hate. 2Wii Pheeter tsurik noo Yeruusalëm khom waar, hon tii woo wolte tas ti woo khee yute sin aach pexnit kewe solte em kritiseyert, 3am saan:
— Tuu waarst in te khost pay layt woo net pexnit sin un host sokaar mit tëne kes!
4Too hot Pheeter aankefang se fertseele fon ales was paseyert waar, tsayt am aanfang. Eyer saat:
5— Ich waar in te xtat Jope un tort, soo lang wii ich am peete waar, hat ich en erxaynung. Ich hon etwas kesiin eenlich mit en kroos layntuch, woo fom himel runer khom is, an te fier xpitse aan kepun, un hot ticht an mich xtil kehal. 6Ich hon tort rin kekukt mit acht un hon hauslich un wilt fii kesiin, tiire woo sich uf em potem rom xlepe un feel. 7Tan hon ich en xtim keheyert, woo mich saat: “Pheeter, xtay uf! Xlacht un es!” 8Ich hon keantwort: “Uf khee fal, Hër! Ich hon noch nii in mayn leewe etwas kes woo ti kesets unrayn ore ferpot rechent!” 9Tan hot ti xtim noch mool fom himel kexproch: “Tuu net unrayn nëne was Hërkot raynich teklareyert hot.” 10Tas is tray mool paseyert, un tëm noo is tas ales tsurik noo em himel kenom kep. 11Kraat in tëm momënt sin tray mëner woo fon Sesarëya kexikt kep waare fer mich se hoole khome aan khom ans haus woo ich in te khost waar. 12Un em Hërkot sayne Kayst saat mich tas ich mit tëne keen solt, oone tswayfle. Tii seks priiter fon te xtat Jope sin aach mit mich kang, un meyer al sin in Kornëëlio sayn haus rin kang. 13Tan hot tee uns fertseelt wii eyer en ëngel kesiin hot xteen in sayn haus, woo iim saat: “Xik yemant noo Jope fer Simon, woo aach Pheeter kenënt is, hoole keen. 14Tee wil saan wii tuu un tayn kans familye keret kewe khan.”
15Un Pheeter saat wayter:
— Wii ich aankefang hon se xpreche, is te Hayliche Kayst iwich tii khom, soo wii iwer uns khom waar am aanfang. 16Too hon ich traan ketënkt tas te Hër fer uns kesaat hat: “Is woer tas Yohan mit waser ketaaft hot, awer teyer kept ketaaft mit em Hayliche Kayst.” 17Es is klaar tas tii woo khee yute sin aach fon Hërkot te selwiche kaape kriit hon woo meyer kriit hon wii meyer am Hër Yeesus Kristus keklaapt hon. Un weyer waar ich fer keeche Hërkot keen?
18Wii se tas keheyert hon, hon se uf keheyert se kritiseere un hon Hërkot keloopt, am saan:
— Tan hot Hërkot aach fer tii woo khee yute sin ti keleechenheet kep fer sich se roye un tas eewiche leewe kriin!
Ti Khërich in Antiokia
19Yeesus sayn aanhënger sin ferxtraut kep torich ti yacht woo aankefang hat mit Stefan sayne toot. Phaar sin pis an ti rechioon fon Fenisia kang, ti Xipre insel un pis an ti xtat Antiokia un hon Hërkot sayn wort aan kesaat ploos fer ti yute. 20Awer ti anere, woo fon Xipre waare un fon te xtat Sirene, sin pis Antiokia kang un hon kexproch aach fer tii woo khee yute waare, ti kuute naychkheete am aan saan iwich te Hër Yeesus. 21Ti macht fom Hër waar pay tëne, un fiil layt hon keklaapt un te Hër aan kenom.
22Ti khërich fon Yeruusalëm hot tas se wise kriit, un tan hon tii Barnabë pis Antiokia hiin kexikt. 23Wii eyer tort hiin khom is un kesiin hot wii Hërkot ti layt keseechent hat, is eyer kans froo kep. Un hot se al uf kemuut fer troy playwe am Hër, mit sayn kans hërts. 24Barnabë waar en kuute man, fol fom Hayliche Kayst un klaawe. Un fiil mënxe hon te Hër aan kenom.
25Tan is Barnabë pis an ti xtat Tarso kang fer Saulo uf suuche. 26Wii eyer en ketrof hot, hot eyer em mit kenom pis Antiokia. Tii hon sich iwer en kans yoer fersamelt mit layt fon tee khërich un hon fer fiil layt keuntericht. Waar in Antiokia woo, tsum eyerxte mool, Yeesus sayn aanhënger kriste kenënt kep sin.
27In tëne tsayte sin phaar profëte fon Yeruusalën pis Antiokia kang. 28Ëne fon tëne, Akapus kenënt, is uf kextii un, torich em Hayliche Kayst sayn macht, hot eyer aan kesaat:
— Uf te kans welt khomt tas naarungs mitel ans feele.
Tas is paseyert wii Cláudio te reemixe Kayser waar.
29Tan hon ti kriste pextimt teere hilef xike fer ti priiter woo in te rechioon fon te Yutëya kewoont hon, un yeete ëne hot keopfert tëm noo was eyer hat. 30Un hon tas kelt torich Barnabë un Saulo kexikt, tas tii tas ap keepte fer ti fiirer fon te khërich.
