Akte 12

₁In tee tsayt hot te kheenich Herootes aankefang phaar layt fon te khërich se yachte. ₂Eyer hot kexikt Tiaako umpringe mit te xwaart. Tiaako waar Yohan sayne pruuter. ₃Wii eyer kesiin hot tas tas ti yute kefal hot, hot eyer Pheeter aach inxpëre kexikt. Tas is paseyert iwer tas Fest fom Proot oone Heep. ₄Wii Pheeter xon kefang kep waar, hot Herootes iim in ti katee ketuun un hot fier krupe soltaate, mit fier in yeete krupe hiin ketuun fer iim uf pase. Wayl Herootes wolt iim fer tas folek presenteere noo te Oostre. ₅Un soo waar Pheeter in te katee un ti soltaate hon em uf kepast, awer ti khërich hot wayter mit kraft kepeet fer iim.

₆An te nacht foer tëm taach woo Herootes iim presenteere wolt fer tas folek, waar Pheeter am xloofe, aan kepun mit tswaay khete, tswixe tswaay soltaate, un waare soltaate am wache am toer fon te katee. ₇Uf mool, is em Hër sayne ëngel tsum foerxayn khom, un en licht hot keklënst in te sel. Te ëngel hot aan Pheeter sayne xuler kethuipt, hot em wach kemach un saat:

— Xtay xnel uf!

Tan sin ti khete fon sayn hënt ap kefal.

₈Te ëngel saat:

— Tuu te këtel aan xnale un pin tayn santaale!

Un Pheeter hot kemach was te ëngel kexikt hat.

Te ëngel hot keortnet:

— Hënk tayne mantel um un khom mit mich!

₉Pheeter is aus te katee kang un is te ëngel noo kang. Awer wust net op te ëngel iim wërklich am pefraye waar. Eyer hot ketënkt tas weyer en wisioon. ₁₀Tii sin langst te eyerxte un langst te tswete soltaate xtel un sin ans ayse toer khom woo an ti xtroos kefiert hot. Tas toer hot sich aleen uf kemach, un tii sin raus kang. Sin torich en xtroos kang un, uf mool, is te ëngel ferxwun. ₁₁Tan hot Pheeter ferxtan was am paseere waar un saat:

— Yets wees ich tas te Hër wërklich sayne ëngel kexikt hot un mich pefrayt hot fon Herootes sayn macht un fon ales was ti yute im sin hate fer keeche mich se mache.

₁₂Wii Pheeter ferxtan hot was paseyert waar is eyer pis Maria sayn haus kang. Maria waar Yohan Markus sayn mama. ₁₃Eyer hot fone an ti teyer keklopt, un ti maat, Rote kenënt, is kuke kang weyer aan khome teet. ₁₄Wii se Pheeter sayn xtim erkhënt hot, is se soo froo kep tas, anxtat ti teyer uf mache, is se tsurik kelaaf fer se saan tas Pheeter foer traan weyer. ₁₅Tan hon se kesaat:

— Tuu pist farikt!

Awer, sii hot fersichert tas tas woer weyer. Too hon se kesaat:

— Is tëm sayne ëngel!

₁₆In tee tsayt, waar Pheeter wayter am klope. Ëntlichmool hon tii ti teyer uf kemach un, wii se kesiin hon tas es wërklich Pheeter waar, hon se sich fiil ferxrok. ₁₇Eyer hot en sinaal kemach mit te hant tas se ruich playwe solte un hot fertseelt wii te Hër kim pefrayt hot fon te katee.

Eyer saat:

— Fertseelt tas fer Tiaako un fer ti anere priiter.

Klaych tëm noo is eyer fon too fort kang uf en aner plats.

₁₈Wii es taach kep is, is en kroos konfusioon paseyert unich te soltaate, wayl ti wuste net was paseyert waar mit Pheeter. ₁₉Herootes hot kexikt ti solte Pheeter suuche, hon em awer net kefun. Too, wii eyer ti soltaate xon aus kefroot hat, hot eyer kexikt tii solte toot kemach kewe.

Tëm noo, is Herootes aus tee rechioon fon Yutëya kang un is en tsayt in te xtat Sesarëa keplip.

₂₀Te kheenich Herootes waar aarich wuutich iwer ti pewooner fon Tiro un Sitoom. Tan hon se en krupoe formeyert un sin mit Herootes xpreche kang. Te eyerxt hon se ti unerxtitsung kriit fon Blasto, woo en hooche aankextelte fom palas waar. Too hon se fer te kheenich Herootes ferlangt tas eyer friite pextime teet mit iine, wayl ti naarungs mitle fon tëne sayn rechioon fom kheenich sayn natsioon am khome waar. ₂₁Herootes hot en taach pextimt mit tëne un an tëm taach hot eyer sayn kheenich tsaych aan ketsoo, hot sich uf te troon kesetst un hot aankefang en preeticht se mache. ₂₂Un tas folek hot kexraayt:

— Is en kot un net en man woo am xpreche is!

₂₃Im selwiche momënt hot em Hër sayne ëngel Herootes wee kemach, wayl te hot ti eere aan kenom woo ploos tsu Hërkot keheyert. Un eyer is kextorep, kefres kep fon te wërem.

₂₄Awer, Hërkot sayn wort waar iweraal aan kesaat kep, sich imer mee am ferprayte.

₂₅Barnabë un Saulo sin fërtich kep mit sayn aarwat un sin tsurik kang noo Yeruusalëm, un hon Yohan Markus mit keprung.