1Un Saulo saat tsuu fer Stefan umpringe.
Saulo yacht ti khërich
An tëm selwiche taach hot ti khërich fon Yeruusalëm aankefang se lahyte mit en hart yacht. Un al ti kriste, ploos net ti aphostle, sin ferxtraut kep iwer ti rechioone fon Yutëya un Samaria. 2Phaar relichioosiche mëner hon Stefan peërticht un hon fiil keprilt weche tëm sayne toot.
3Awer, Saulo hot sich aankextrëngt fer ti khërich se fernichte. Eyer is haus tsu haus kang, hot fraae un mëner kexlept un hot se in ti katee kexmis.
Te ewankeelium in Samaria
4Tii woo ferxtraut kep waare hon te ewankeelium iweraal aan kesaat. 5Filip is pis an ti haupt xtat fon Samaria kang un hot Kristus aan kesaat fer ti layt fon too, 6un tas folek hot mit acht aan keheyert was eyer am saan waar. Al hon em aan keheyert un hon kesiin ti wunere woo tee am mache waar. 7Ti xlechte kayste, am xraaye, sin raus kang fon fiile layt, un fiile laame sin keheelt kep. 8Un soo is tas folek fon tee xtat kans froo kep.
9Too hot en man kewoont woo Simon kenënt waar, woo xon en tsayt hekseray am mache waar unich te samaritaaner un hot se fiil fewunert kelos kehat. Tee hat sich selepst important kemach 10un ti pewooner fon Samaria, fon te importanteste pis ti keringste, hon mit acht aan keheyert was eyer saat. Tii hon fersichert:
— Tee man is Hërkot sayn macht! Tee is “ti Kroos Macht”!
11Ti layt hon acht kep uf was Simon kemach hot wayl iwer lang tsayt hot tee se ferwunert kelos mit sayn hekseray. 12Awer ti hon keklaapt an Filip sayn mensaaj iwer ti kuut naychkheet fom Hërkots Raych un iwer Yeesus Kristus un sin ketaaft kep, soo ti mëner wii ti fraae. 13Te aychne Simon hot aach keklaapt. Un, tëm noo wii eyer ketaaft kep waar, is eyer Filip fon tichtem noo kang, kans ferwunert mit te kroose wunere un kroos aartich tings woo tee am mache waar.
14Ti aphostle, woo in Yeruusalëm waare, hon se wise kriit tas es folek fon Samaria aach em Hërkot sayn wort aan kenom hat un, tesweche, hon se Pheeter un Yohan riwer kexikt. 15Wii ti tswaay tort aan khom sin, hon se kepeet tas es folek fon Samaria te Hayliche Kayst kriin teet, 16wayl te Kayst waar noch net runer khom iwich khee ëne fon tëne. Tii waare ploos ketaaft kep im naame fom Hër Yeesus. 17Tan hon Pheeter un Yohan ti hënt tëne iwer kextrekt, un soo hon se te Hayliche Kayst kriit.
18Simon hot kesiin tas, wii ti aphostle sayn hënt iwer ti layt kehal hon, kept Hërkot tëne te Hayliche Kayst. Tesweche hot eyer kelt aan kepot fer Pheeter un fer Yohan, 19am saan:
— Ich wil tas teyer mich aach tii macht kewe tuut. Soo, wën ich ti hënt iwer yemant hale tuun, tuut tee persoon aach te Hayliche Kayst ktiin.
20Tan hot Pheeter keantwort:
— Tas Hërkot tich un tayn kelt in ti hel xike tuut! Tënkst tuu tas tuu mit kelt te kaape fon Hërkot kriist? 21Tuu bost net ti recht fer teel se hale in unser aarwat wayl tayn hërts net eerlich is foer Hërkot. 22Royer tich, los tayne xlechte plaan un ferlang tas te Hër tich fertsaye tuut weche tee xlecht intensioon. 23Ich siin tas tuu fol nayt pist, en nayt piter wii kal, un siin aach tas tuu in sinte xtechst.
24Tan saat Simon fer Pheeter un fer Yohan:
— Pite, ferlangt fer te Hër tas net mit mich paseere tuut was teyer kesaat hat.
25Wii se xon sayne tsayer kep hate un em Hër sayn wort keuntericht hate, sin Pheeter un Yohan tsurik noo Yeruusalëm kang. Iwer weech, hon se te ewankeelium aan kesaat in fiile wile fon Samaria.
Filip un te hooche aankextelte fon Etiopia
26En ëngel fom Hër saat fer Filip:
— Mach tich fërtich un kee noo Siit, iwer te weech woo fon Yeruusalëm pis ti xtat Gaasa keet.
(Weenich layt sin tee weech torich kang.)
27-28Filip hot sich fërtich kemach un is kang. Iwer weech hot eyer en eunuk fon Etiopia kesiin, woo tsurik am faare waar noo sayn lant. Tee man waar en hooche aankextelte, kaseerer un atministratoer fon te kheenichiin fon Etiopia. Tee waar noo Yeruusalëm fer Hërkot atoreere. Uf em tsurik weech, am setse in sayne waan, waar eyer tas puch fom profët Isaiias am leese. 29Tan saat de Hayliche Kayst fer Filip:
— Kee ticht an tee waan un kee tëm noo.
30Filip is ticht an te waan kelaaf un hot te hooche aankextelte keheyert tas puch fom profët Isaiias am leese. Tan hot eyer kefroot:
— Ferxteet teyer was teyer am lesse sayt?
31Te aankextelte hot keantwort:
— Wii khan ich tas ferxteen wën nimant mich tas aus leet?
Tan hot eyer Filip in kelaat fer inxtaye un sich mit iim setse uf em waan. 32Tas xtik fon te Hayliche Xrifte woo te aankextelte am leese waar waar tas:
“Eyer waar wii en xoof woo kenom kept fer toot kemach kewe;
waar wii en xoof woo xtum playpt wën se sayn wol ap xnayte.
Eyer hot niks kesaat.
33Is erniitrichtht kep un waare unkerecht mit tëm.
Nimant khan xpreche iwer sayn nookhomer, wayl tëm sayn leewe uf tee welt is ans ën khom.”
34Te etioper hot fer Filip kefroot:
— Pite, tuu mich etwas aus leye! Iwer wëm is te profët tas am saan? Iwer sich selepst ore iwer en anere?
35Tan, mit tee teel fon te Xrifte am aanfange, hot Filip ti kuut naychkheet iwich Yeesus aan kesaat fer te etioper.
36Iwer ti rees, sin se aan khom an en plats woo waser waar. Tan saat te etioper:
— Kuk! Hier is waser. Meecht ich net ketaaft kewe khëne?
37[Filip hot keantwort:
— Wën teyer klaapt mit tayn kans hërts, is sicher yoo.
Un te etioper saat:
— Yoo, ich klaawe Tas Yeesus Kristus em Hërkot sayne Soon is.]
38Eyer hot kexikt te waan xtil hale, ti tswaay sin ins waser kang, un Filip hot em too ketaaft.
39Wii se aus em waser am keen waare, hot em Hër sayne Kayst Filip wech kenom. Te etioper hot Filip net mee kesiin, awer hot sayn rees wayter kemach, fol mit frayt. 40Uf mool, waar Filip in te xtat Azoto un hot sayn rees wayter kemach, te ewankeelium aan am saan in ale xtet pis eyer in Sesarëya aan khom is.
