Akte 7

₁Te Hooche Prister hot fer Stefan kefroot:

— Xtimt tas was tii mëner keeche tich foer pringe?

₂Stefan hot keantwort:

— Priiter un feter, heyert mich mool! Te kloorixe Hërkot is tsum foerxayn khom fer unser foerkhomer Aapraham wii tee in te rechioon fon Mesopotamia kewoont hot, eep eyer in te xtat Haran woone kang is. ₃Un Hërkot saat tëm: “Kee aus tayn lant un wech fon tayn ferwante un kee noo en lant woo ich tich tsayche.” ₄Tan is eyer aus Kaltëya kang un is in Haran woone kang. Tëm noo, wii sayne fater kextorep is, hot Hërkot Aapraham keprung noo tëm lant woo teyer hayt am woone sayt. ₅Hërkot hot net mool eene phalme fon tëm lant iim kep, awer hot ferxproch teet iim tas kanse lant kewe, un tëm noo weyer tas tëm sayn nookhomer. Wii Hërkot tas ferxproch hat, hat Aapraham noch khee khiner. ₆Eyer saat fer Aapraham: “Tayn nookhomer wëre als frëmte leewe in en aner lant. Too wëre tii sklaawe un kewe xlecht pehantelt iwich fier hunert yoore.”

₇— Un Hërkot saat noch: “Ich xtroofe ti natsioon woo tii als sklaawe machet. Tëm noo khome tii tsurik fon tëm lant un tuun mich atoreere hier uf tas plats.” ₈Hërkot hot fer Aapraham kep ti serimonii fon te pexnaytung als tsayer fon te alians woo eyer mit iim kemach hot. Tesweche hot Aapraham sayne soon Iisak pexnit en woch noo sayn kepoer. Iisak hot sayne soon Yaakop pexnit, un Yaakop hot tas selwiche kemach mit sayn tswelef khiner, ti patriarke.

₉Stefan saat wayter:

— Yoosef sayn priiter hate nayt iwer iim un hon em ferkhaaf fer en sklaawe sin im Ejipt. Awer, Hërkot waar mit iim ₁₀un hot em pefrayt fon al sayn petrikunge. Wii Yoosef foer em faraoo, kheenich fom Ejipt, aan khom is, hot Hërkot tëm wisheet un kefeliche kexik kep. Un te faraoo hot em kowerneyer fom Ejipt un fom palas kenënt. ₁₁Tëm noo is es ese ans feele khom un fiil layte im Ejipt un in Kanaan, un unsere foerkhomer hate niks mee fer se ese. ₁₂Xpeeter hiin, hot Yaakop keheyert saan tas im Ejipt weetse khërner weere un hot es eyrxte mool unsere foerkhomer pis tort hiin kexikt. ₁₃Am tswete mool hot Yoosef tëne fertseelt weyer eyer waar, un te faraoo hot se wise kriit fon Yoosef sayn familye. ₁₄Tan hot Yoosef sayne fater hoole kexik un sayn kanse ferwante, fer in Ejipt khome; tas waare finef un siptsich persoone im kansem. ₁₅Tan is Yaakop noo em Ejipt kang, un too sin tee un unsere foerkhomer am woone keplip pis sayne toot. ₁₆Tëm noo sin tëne sayn khërwer keprung kep noo Sikëm un sin in tas kraap ketuun kep woo Aapraham khaft hat fon te noookhomer fon Hamor fer en teel kelt.

₁₇— Wii ti tsayt am khome waar woo Hërkot sayn xwoorung in hale teet woo eyer fer Aapraham kemach hat, hat unser folek sich fiil fermeyert kehat im Ejipt. ₁₈Tan is en kheenich ans rechiire khom woo niks wust iwer Yoosef. ₁₉Tee kheenich hot unser foerkhomer hinerkang un xlech pehantelt, soo fiil tas eyer se ketswung hot sayn kleene khiner ferlose tas se xtërwe solte. ₂₀In tee tsahyt is Mooses uf ti welt khom, woo aarich xeen khint waar, un iwer tray moonat hon sayn eltre iim tehëm uf kepast. ₂₁Awer, wii se em ferlose muste, hot em kheenich sayn tochter iim aan kenom un hot em kroos ketsoo als sayn aychne khint. ₂₂Un soo is eyer kepilt kep in te kans wisheet fon te ejipte un is en man kep woo kexproch hot un pehantelt mit autoriteet.

₂₃Stefan saat noch:

— Wii Mooses xon fërtsich yoer alt waar, hot eyer resolweyert sayn layt pesuuche keen, ti israelite. ₂₄Too hot eyer en ejipte man kesiin en man fon sayn folek xlecht am pehantle. Tan hot eyer te israelite keholef un hot te ejipte man toot kemach. ₂₅Mooses hot ketënkt tas ti israelite ferxteen teete tas Hërkot tii pefraye teet torich iim, awer tii hon tas net ferxtan. ₂₆Am neekste taach, hot Mooses tswaay israelite kesiin unich sich am xtrayte. Un, am fersuuche ti ausnaner mache, saat eyer: “Mëner, heyert! Teyer sayt priiter: warom sayt teyer am xtrayte?”

₂₇— Awer, tee woo te anere xlecht am pehantle waar hot Mooses uf sayht kexupt un hot kefroot: “Weyer hot tich als unsre xëf ore richter aan kextelt? ₂₈Wilst tuu mich aach umpringe wiis tuu kester kemach host mit tëm ejipt?” ₂₉Wii Mooses tas keheyert hot, is eyer auskeris fom Ejipt un is im lant Mitian woone kang, un too sin tëm sayn tswaay khiner uf ti welt khom.

₃₀— Fërtsich yoer xpeeter, wii Mooses im tesërt waar, ticht am Sinay Përich, is en ëngel tëm tsum foerxayn khom, im mite fayer fon en tëner phutx woo am ferprëne waar. ₃₁Mooses hot sich ferwunert mit was eyer am siin waar un is tichter khom fer peser se siin. Tan hot eyer em Hër sayn xtim keheyert, woo saat: ₃₂“Ich sin te Hërkot fon tayn foerkhomer, te Hërkot fon Aapraham, fon Iisak un fon Yaakop.” Mooses hot ketsitert fon pang un hot khee koraaj fer se kuke. ₃₃Tan saat te Hër: “Tuu tayn santaale aus, wayl tas plats woos tuu pist is en haylich plats. ₃₄Ich hon kesiin wii mayn folek xlecht pehantelt am kewe is im Ejipt. Ich hon tëne sayn yoomreray aankeheyert un sin runer khom fer tëne se pefraye. Yets xike ich tich noo em Ejipt.”

₃₅Un Stefan saat wayter:

— Tee selwiche Mooses waar ap kextoost kep fom israelite folek. Tii hon tëm kefroot: “Weyer hot tich aan kextelt als xëf ore unsre richter?” Hërkot hot tee Mooses kexikt als fiirer un pefrayer, mit em hilef fom ëngel woo im tëner phutx tsum foerxayn khom waar. ₃₆Es waar tee woo ti israeleite aus em Ejipt kehool hot, wunere am mache un kroos aartiches tings in tëm lant, un aach am Roote Meer, un im tesërt, iwer fërtsich yoer. ₃₇Es waar tee selwiche Mooses woo fer ti israelite kesaat hot: “Unich aych tuut Hërkot en profët aus suuche, soo wii eyer mich kexikt hot.” ₃₈Es waar Mooses woo mit te israelite fersamelt waar im tesërt; eyer waar tort mit unsre foerkhomer un mit em ëngel woo mit iim kexproch hot am Sinay Përich. Un es waar Mooses weyer ti leewente mensaajes fon Hërkot ap kehool hot un fer uns ap kep hot.

₃₉— Unsere foerkhomer wolte Mooses net aan heere, awer hon em ap kesaat un wolte tsurik keen noo em Ejipt. ₄₀Tii hon fer Aaron kesaat: “Mach fer uns kote woo foer uns keen. Meyer wise net was paseyert is mit Mooses, tee woo uns fom Ejipt raus kehool hot.” ₄₁Tan hon se en imaaje fon en hëmes kemach un hon fii kexlacht fer se opfere fer ti imaaje. Tëm noo hon se en fest aan kericht in eere fer ti imaaj woo sii selepst kemach hate. ₄₂Awer, Hërkot is fon tëne wech keplip un hot kelos tas se ti xtërne fom himel atoreyert hete, wii es kexrip is im Puch fon te Profëte:

₄₄Im tesërt, hate unsere foerkhomer pay sich ti Hit fom Hërkot sayn Paysin. Tii Hit waar kemach kep wii Hërkot Mooses kexikt hat mache, tëm noo en motel woo Hërkot tëm ketsaych hat. ₄₅Tii hon ti Hit kriit kehat fon sayn foerkhomer un hon se mit kenom wan se mit Yoshua kang sin un hon ti lëner konkisteyert fon te natsioone woo Hërkot aus kextoost hat foer tëne. Ti Hit is tort keplip pis an ti tsayt fon Dawii. ₄₆Dawii hot ti tsuuxtimung fon Hërkot kriit un hot erlaupnis ferlangt fer en haus paue fer te Hërkot fon Yaakop. ₄₇Awer, es waar Salomoon weyer em Hërkot sayn haus kepaut hot.

₄₈— Awer Hërkot, te Heechste, woont net in hayser fon mënxe kepaut. Wii te profët saat:

₅₁Un Stefan macht xlus, am saan:

— Teyer sayt mool tik khopich! Teyer het mool en hart hërts un sayt taup fer Hërkot sayn mensaaj aan heere. Teyer sayt imer te Hayliche Kayst am ap xtoose, wii ayre foerkhomer em ap kextoost hon. ₅₂Was fer profët hon ayre foerkhomer net keyacht? Tii hon em Hërkot sayn mensajeere umkeprung woo in te ferkangne tsayht te aankhom fom Kuute Tiiner aan kesaat hon. Un yets het teyer em hinerkang un het em umkeprung. ₅₃Teyer het ti kesets torich ti ëngle kriit un tuut tii kesets net in hale.

₅₄Wii ti mitkliiter fom Hooche Konseel keheyert hate was Stefan kesaat hat, sin se wuutich kep un hon ti tseen kekwiitxt keeche iim. ₅₅Awer Stefan, fol fom Hayliche Kayst, hot xtram noo em himel kekukt un hot Hërkot sayn kloor kesiin. Un hot aach Yeesus kesiin am xteen, uf te rechts sayt fon Hërkot. ₅₆Tan saat eyer:

— Kukt! Ich siin te himel uf un te Soon fom Man xteet, uf te rechts sayt fon Hërkot.

₅₇Awer tii hon ti oore tsuu ketekt un, kans hat am xraaye, sin se sich al mitsamer keeche Stefan kexmis. ₅₈Tëm noo hon se em aus te xtat kexmis un hon em mit xteen ferxmis. Un ti tsayer hon en puup too kelos, tëne sayn mantle am uf pase. Te puup hot Saulus keheest. ₅₉Soo lang wii se ti xteen am wërfe waare, waar Stefan Yeesus am ruufe, am saan:

— Hër Yeesus, nëm mayne kayst aan!

₆₀Tëm noo, hot eyer sich kekniit un hot kexraayt mit kans hat xtim:

— Hër, xtroof net ti layt weche tëm sinte!

Un, noo tëne wërter, is eyer kextorep.