Pheeter un Yohan foer em Heechste Konseel
1Pheeter un Yohan waare noch am xpreche fer tas folek wii phaar priister, te xëf fon te soltaate fom Thëmpel un phaar satuseyer aan khom sin. 2Tii sin aarich ayerlich kep wayl tswaay fon te aphostle waare tas folek am unterichte tas Yeesus witer peleept un tas tas pewayse tuut tas ti toote peleepe tuun. 3Tan hon se ti tswaay kefang un in ti katee ketuun pis te anere taach, wayl es waar xon xpeet. 4Awer fiil layt woo ti mensaaj keheyert hon, hon traan keklaapt, un te numer fon tëne woo keklaapt hon is kextii pis unkefeyer finef tausent.
5Am neekste taach hon ti autoriteete fon te yute, ti fiirer fom folek un ti Kesets Mayster sich fersamelt in Yeruusalëm. 6In tee fersamlung waar aach Anaas, woo te Hooche Priister waar, Kaifaas, Yohan, Aleksanter un ti anere woo fom Hooche Priister sayn familye waare. 7Ti autoriteete hon ti aphostle foer iine kextelt un hon kefroot:
— Mit was fer macht ore in wëm sayne naame het teyer tas kemach?
8Tan hot Pheeter, fol fom Hayliche Kayst, keantwort:
— Autoriteete un fiirer fom folek! 9Teyer sayt uns hayt am frooe iwer tas kuutes woo kemach kep waar fer tee laame man un wii te keheelt kep waar. 10Yets, solt teyer un tas kanse folek fon Israël se wise kriin tas tee man hier foer aych xteet komplet kuriert torich ti macht fon Yeesus Kristus fon Nasarëë — tee woo teyer pekraytst hot un woo Hërkot peleept hot. 11Yeesus is tee fon weem ti Hayliche Xrifte saan:
“Te xteen woo teyer, paurer, wech keworef het,
is als ek xteen penutst kep, te importanteste fon tëne al.”
12Ti retung khan mer ploos kriin torich Yeesus Kristus. Uf te kans welt hat Kot khee anere naame pekhant kemach, torich wëm meyer keret kewe khëne.
13Ti mitkliiter fom Hooche Konseel hon sich ferwunert mit Pheeter un Yohan sayn koraaj, wayl sii wuste tas se keweenliche mëner waare un oone xtuutium. Un hon erkhënt tas se Yeesus sayn khameraate kewees waare. 14Awer, khonte niks keeche ti tswaay saan, wayl te man woo keheelt kep waar hot too foer tëne kextan. 15Klaych tëm noo hon se kexikt tas Pheeter un Yohan aus te xtup fom Konseel raus këngte un hon aankefang unich sich se tiskutiire. 16Sii saate:
— Was mache meyer mit tëne mëner? Wayl ti kanse pewooner fon Yeruusalëm wise tas ti en kroose wuner kemach hon, un meyer khëne tas net ap saan. 17Awer, fer ti naychkheet net sich noch mee ferxtraue lose unich em folek, tuun meyer se foer hale, tas se nii mee mit nimant xpreche iwich Yeesus.
18Tan hon se se keruuf un hart keortnet tas se net xpreche un net unterichte tërefte iwer Yeesus. 19Awer, Pheeter un Yohan hon keantwort:
— Teyer selepst khënt julkeere was foer Hërkot richtich is: sole meyer aych aan heere ore Hërkot? 20Wayl meyer khëne net ufheere se xpreche iwer tas was meyer kesiin un keheyert hon.
21Tan hot te Hooche Konseel se kans xtram kexteyert un hot se fort kexikt. Te Konseel khont se net xtroofe wayl tas kanse folek hot Hërkot keloopt weche was paseyert waar. 22Te man woo keheelt kep waar mit tëm wuner waar mee wii fërtsich yoer alt.
Tas kepeet fon Yeesus sayn aanhënger
23Wii Pheeter un Yohan pefrayt kep waare, sin se tsurik noo sayne krupe un hon fertseelt ales was ti xëfe fon te priister un ti yute fiirer kesaat hate. 24Soo wii se tas keheyert hon, hon se al mitsamer Hërkot atoreyert, am saan:
— Hër, tuu hast te himel, ti eyert, te meer ketsoo, un ales was in tëne leept! 25Tuu host torich te Hayliche Kayst kexproch un torich unser foerkhomer Dawii, tayne tiiner, wii eyer saat:
“Warom sin ti pakaane natsioone pees kep?
Warom hon ti foleke soo tume pleen kemach?
26Tëne sayn kheeniche hon sich prepareyert,
un sayn kowerneyer hon sich kesamelt keeche te Hër Kot un sayn Kristus.”
27— In te woerheet, Herootes un Ponsio Pilatus hon sich kesamelt in tee xtat, mit tee woo khee yute sin un mit em folek fon Israël, keeche Yeesus, tayne leaale Tiiner woos tuu aus kesuucht host fer te Kristus sin. 28Tii hon sich ketrof fer ales se mache was tuu, torich tayn macht un tayne wile, xon pextimt hast tas paseere teet. 29Yets, Hër, kuk mool tëne sayn forterung. Kep fer tayn tiiner ti sicherheet fer tayn wort mit koraaj aan saan. 30Xtrek ti hant fer se heele, torich ti macht fom naame fon tayne Tiiner Yeesus, tas wunere un kroos aartich tings kemach kept.
31Wii se tas kepeet fërtich kemach hate, hot tas plats woo se waare kexutert. Tan sin se al fol fom Hayliche Kayst kep un hon aankefang mit koraaj em Hërkot sayn wort aan saan.
Ti kemaynte hot ales keteelt
32Al tii woo keklaapt hate hon ekaal ketënkt un kexpiert. Nimant saat tas es tings ploos sayn weyer, awer al hon ferteelt ëne mit em anere ales was se hate. 33Mit kroos macht hon ti aphostle tsayer kep fom Hër Yeesus sayn peleepung, un Hërkot hot sayn seechne iwer se al aus kexut. 34Waar khee ëne woo neetichkheete mit kemnach hot unich tëne, wayl al tii woo lant hate ore hayser hon tas ferkhaaf, un tas kelt keprung 35un ap kep fer ti aphostle. Un yeete persoon hot en teel kriit, tëm noo sayn neetichkheet.
36-37Soo waar es tas Yoosef en xtik lant ferkhaaf hot woo tëm waar un hot tas kelt ap kep fer ti aphostle. Yoosef waar en lewite un waar kepor in te insle fon Xipre. Ti aphostle hon en Barnabë kenënt, was petayt “Tee woo uf muute tuut”.
