Ananias un Safira
1Awer en man Ananias kenënt, ferhayrat mit en fraa woo Safira keheest hot, hot en xtik lant ferkhaaf 2un hot ploos en teel fom kelt ap kep fer ti aphostle, te rest fer sich am pehale. Un Safira wust tas. 3Tan saat Pheeter fer Ananias:
— Warom host tuu kelos Satanaas tayn hërts tomineere? Warom host tuu keloo fer te Hayliche Kayst? Warom host tuu en teel fom kelt pehal woos tuu kriit host fer tas xtik lant ferkhaafe? 4Eep tuu tas ferkhaaf host, waar tas tayn; un, noo em ferkhaafe, waar tas kelt aach tayn. Tan, warom host tuu tas kemach? Tuu host net fer ti mënxe keloo — tuu host fer Hërkot keloo!
5Soo wii eyer tas keheyert hot, is Ananias toot kefal; un al tii woo se wise kriit hon was paseyert waar, hon fiil pang kriit. 6Tan sin phaar puuwe khom, hon Ananias sayne khërwer tsuu ketekt, hon en raus ketraa un hon em peërticht.
7Ananias sayn fraa is soo tray xtun tëm noo aan khom, oone se wise was paseyert waar mit sayne man. 8Tan hot Pheeter tëm kefroot:
— Saa mich mool! Waar tas te prays woo teyer tas xtik lant ferkhaaf hot?
Un ti fraa saat:
— Yoo!
9Tan saat Pheeter:
— Warom host tuu un tayne man te Hayliche Kayst in proop kextelt? Ti yunge woo kraat tayne man pekraapt hon sin tort an te teyer un yets tuun se tich aach mit nëme.
10Im selwiche momënt is se toot kefal foer Pheeter sayn fiis. Ti yunge sin rin khom, hon kesiin tas se toot waar, hon te khërwer kehool un em peërticht neewiche sayne man. 11Un ti kans khërich un al tii woo tas se wise kriit hon, hon fiil pang kriit.
Wunere
12Ti aphostle waare kroose wunere am mache unich em folek, un Yeesus sayn aanhënger waare sich am fersamle uf em Foerpau fon Salomoon. 13Nimant fon traus hat koraaj fer sich samle mit tëne sayne krupe, awer tas folek hot kuut fon tëne kexproch. 14En kroos folek fon mëner un fraae hot aach am Hër keklaapt un is te krupe noch mee ferkreesere khom. 15Weche te wunere woo ti aphostle am mache waare, hon ti layt ti kranke uf ti xtroos keprung in peter un tepiche. Hon tas kemach tas, wën Pheeter torich këngt, weenichstens tëm sayne xate phaar fon tëne teke teet. 16Kroose foleke waare am khome fon te nachpar xtet fon Yeruusalëm sayn kranke am pringe un tii woo pesetst waare fon te xlechte kayste, un al waare kuriert kep.
Ti aphostle kewe keyacht
17Tan sin te Hooche Prister un al sayn khameraate, woo fom partay fon te satuseus waare, ayfersichtich kep iwer ti aphostle un hon pextimt etwas mache. 18Hon ti apohostle kefang un in ti katee ketuun. 19Awer, in tee nacht hot em Hër sayne ëngel ti toore fon te katee uf kemach, hot ti aphostle raus kenom un saat:
20— Keet pis an te Thëmpel un saat aan fer tas folek ales iwer tas noye leewe.
21Ti aphostle hon aan keheyert un am neekste taach, kans frii, sin se rin kang am hoof fom Thëmpel un hon aankefang se unterichte. Tan hon te Hooche Priister un sayn khameraate ti fiirer fom folek keruuf fer en fersamlung fom Hooche Konseel. Tëm noo hon se kexikt tas phaar soltaate fom Thëmpel ti aphostle hoole këngte in te katee.
22Awer, wii ti soltaate tort hiin khom sin, hon se ti aphostle net kefun. Tan sin se tsurik kang pis uf tas plats woo te Konseel fersamelt waar 23un saate:
— Meyer sin pis tort hiin kang un hon ti katee kuut tsuu kemach kefun, un ti wacher ti toore am uf pase; awer, wii meyer se uf kemach hon, hon meyer nimant tort trin kefun.
24Wii ti xëfe fon te priister un te xëf fon te soltaate fom Thëmpel tas keheyert hon, wuste se net was tënke iwer tas woo paseyert waar mit te aphostle. 25In tëm momënt is yemant khom, am saan:
— Heyert! Ti mëner woo teyer in kexpërft het sin tort uf em hoof fom Thëmpel tas folek am unterichte!
26Tan sin te xëf fon te soltaate fom Thëmpel un sayn mëner raus kang un hon ti aphostle keprung. Hon se awer net xlecht pehantelt wayl se pang hate teere mit xteen ferxmis kewe fom folek. 27Tëm noo hon se ti aphostle foer te Konseel kextelt. Un te Hooche Priister saat:
28— Meyer hon ti ortnung kep kehat tas teyer niks unterichte solt iwer Yeesus. Un was het teyer kemach? Hon ti untericht ferxtraut in te kans xtat Yeruusalëm un wolt uns noch pexultixe weche tëm sayne toot.
29Tan hon Pheeter un ti anere aphostle keantwort:
— Meyer mise Hërkot aan heere un net ti layt. 30Teyer het Yeesus pekraytst, awer te Hërkot fon unser foerfaarer hot em peleept. 31Un Hërkot hot em uf sayn rechts sayte ketuun als Fiirer un Reter, fer en oportuniteet se kewe fer tas israelite folek fer sich se roye un ti ferkepung fer sayn sinte kriin. 32Meyer sin tsayer fon tas ales — meyer un te Hayliche Kayst, woo Hërkot kept fer tii woo iim aan heere.
33Wii ti mitkliiter fom Konseel tas keheyert hon, hon se soo en wuut kriit, tas se pextimt hon ti aphostle umpringe. 34Awer eene fon te mitkliiter hot sich uf kextelt, en fariseyer Kamaliël kenënt, en Kesets mayster woo rexpekteyert waar fon tëne al. Tee hot kexikt tas se ti aphostle raus nëme solte un too en tsayt lose. 35Tan saat eyer fer te Konseel:
— Mëner fon Israël, past uf mit tëne mëner. 36Khorts tsayt tsurik is en man tsum foerxayn khom, Teudas kenënt, woo sich selepst aarich important kenënt hot un soo hot eyer 400 aanhënger kesamelt. Awer te is toot kemach kep, al sayn aanhënger sin ferxtraut kep, un ti rewolte is fernicht kang. 37Tëm noo is Yuutas, te Kalileyer, tsum foerxayn khom, in te tsayt fon te tsaalung fom folek. Tee aach hot fiil layt kesamelt kriit, awer is toot kemach kep, al sayn aanhënger sin ferxtraut kep. 38Also, in tëm fal, macht niks keeche ti mëner. Lost se fort keen wayl, wën tee plaan ore tii aarwat fon mënxe khomt, tuut tee ferxwine. 39Awer, wën tee fon Hërkot khomt, khënt teyer te net fernichte, wayl in tëm fal weyert teyer keeche Hërkot khëmfe.
Un te Konseel hot Kamaliël sayn meenung aan kenom. 40Tan hon se ti aphostle keruuf un hon se ferpaytxt; un too hon se kexikt solte nii mee niks xpreche iwer Yeesus. Tan hon se se fray kelos. 41Wii ti aphostle fort kang sin fom Konseel, waare se kans froo, wayl Hërkot iine te weyert kerechent hot fer layte mit mache wayl se Yeesus sayn aanhënger waare. 42Un, yeete taach, uf em hoof fom Thëmpel un in haus tsuu haus, hon se wayter keuntericht un ti kuute naychkheete am aan saan iwer Yeesus, te Kristus.
