Phaulus apeleyert an te Kayser in Room
1Noo tray taache woo eyer in tee prowins waar, is Festus aus te xtat Sesarëya kang pis Yeruusalëm. 2Ti xëfe fon te priister un ti yute fiirer hon tort sayn aanklaache keeche Phaulus presenteyert un hon fer Festus ferlangt 3te kefale fer Phaulus tsurik noo Yeruusalëm xike. Tii hon ap kemach Phaulus iwer weech umpringe. 4Awer, Festus hot keantwort:
— Phaulus is im kefëngnis in Sesarëya, un ich wil klaych tort hiin tsurik keen. 5Tas ayre fiirer mit mich keen pis tort hiin fer sayn aanklaache tort presenteere, wën tee etwas xlechtes ketuun hot.
6Festus is acht ore tseen taache mit tëne keplip un tëm noo is eyer tsurik noo Sesarëya kang. Am neekste taach, hot eyer sich uf te kericht xtuul kesetst un hot kexikt solte Phaulus pringe. 7Wii Phaulus aan khom is, hon ti yute woo fon Yeruusalëm khom waare aankefang fiil xweere aanklaache se mache, awer khonte niks pewayse. 8Tan hot Phaulus sich tefenteyert, am saan:
— Ich hon niks keeche te yute sayn kesets kemach, net mool keeche te Thëmpel, net mool keeche te Kayser.
9Festus, woo ti yute kefale wolt, hot fer Phaulus kefroot:
— Wilst tuu net noo Yeruusalëm keen fer tort fon mich julkeyert se kewe iwer tas tings?
10Phaulus hot keantwort:
— Ich sin foer em kericht fom reemixe Kayser, un is too hier woo ich julkeyert kewe mus. Ich hon niks xlechtes keeche ti yute ketuun, wii teyer es kans kuut wist. 11Wën ich ti kesets net rexpekteyert hon ore etwas ketuun hon woo te toote xtroof fertiint, sin ich fërtich fer se xtërwe. Awer, wën net woer is was se keeche mich saan, khan nimant mich tëne ap kewe. Soo, ferlange ich tas mayn fal foer te Kayser khomt.
12Tan, noo en kexpreech mit sayn konselier, hot Festus kesaat:
— Wayl tuu an te Kayser apeleyert host, tan keest tuu tsum Kayser.
Phaulus foer Akripa un Berenise
13Phaar taache truf is te kheenich Akripa un sayn xwester Berenice in Sesarëya aankhom fer Festus se pesuuche. 14Tas waare xon phaar taache woo se too waare, tan hot Festus em kheenich ti kexicht fon Phaulus fertseelt. Eyer saat:
— Too is en man woo Fëliks als kefangne hier kelos hot. 15Wii ich noo Yeruusalëm kang waar, hon ti xëfe fon te priister un ti yute fiirer aanklaache keeche tee kemach un hon mich ferlangt tas ich en konteneere solt. 16Awer ich saat tëne tas ti reemixe net ti kewoonheet hon yemant konteneere oone eyerxt ti aanklaacher foer te aankeklaachte tuun, en oportuniteet am kewe tas tee sich tefenteere khan. 17Tesweche, wii tii pis too heyer khom sin, hon ich khee tsayt ferloer un, klaych am neekste taach, hon ich mich uf te kericht xtuul kesetst, un hon te man pringe kexikt. 18Sayn faynte sin khom, hon em awer fon niks xlimes aan kep wii ich tacht teere mache. 19Ti eensichst aanklaachung woo se keeche em hate waar iwer tëne iire aychne relichioon un aach iwer en man woo xon kextorep is, Yeesus kenënt. Phaulus fersichert tas te man leewent is. 20Ich wust net wii mee informatsioone iwer tee phunkt se wise krin. Tesweche hon ich fer Phaulus kefroof op eyer wolt noo Yeruusalëm keen fer tort julkeyert kewe iwer tii aanklaachunge. 21Awer, Phaulus hot fer te Kayser apeleyert un hot ferlangt fer im kefëngnis playwe pis te Kayser sayn fal resolweere teet. Tan, hon ich ti wachter kexikt iim uf pase pis ich en khënt fer te Kayser xike.
22Tan saat Akripa fer Festus:
— Ich teet te man kërn aan heere.
Festus antwort:
— Moye tuut teyer iim aan heere!
23Am anere taach, sin Akripa un Berenice mit kroos seremonii un pomp aan khom. Sin in te autiëns saal rin kang mit te militeyer xëfe un ti importanteste mëner fon te xtat. Festus hot kexikt tas se Phaulus pringe solte 24un saat:
— Kheenich Akripa un al woo too sin, kukt tee man! Is keeche tee woo ale yute, fon too wii fon Yeruusalëm, ti anklaache am mache sin foer mich. Tii fersichere tas tee man xtërwe mus, 25awer ich tënke tas tee niks kemach hot fer tsum toot konteneyert kewe. Wii eyer selepst ferlangt hot fer julkeyert se kewe fom Kayser, hon ich resolweyert iim noo Room xike. 26Awer, pis yets wees ich net richtich was xraywe fon tëm fer te Kayser. Tan hon ich en too heyer keprung, foer aych — un ekstra foer aych, kheenich Akripa — fer em aus frooe. Soo wërt ich etwas hon fer se xraywe. 27Wayl ich fine en oone sin en prisioneyer xike oone kans klaar ausleye ti aanklaache keeche iim.
