Akte 26

₁Akripa saat fer Phaulus:

— Tuu khanst xpreche fer tich se tefenteere.

Tan hot Phaulus sayn hant peweecht un hot sich tefenteyert, soo am saan:

₂— Kheenich Akripa, ich fraye mich tas ich hayt foer aych mich tefenteere khan fon ales was ti yute mich aan kewe. ₃Un ich sin ekstra froo wayl teyer khënt kans kuut ale kewoonheete un sache fon te yute. Pite, heyer mich ketultich aan.

₄Ale yute wise wii ich keleept hon unich mayn folek un aach in Yeruusalëm, tsayt mayn yuuchent pis hayt. ₅Ti hon imer kewust — un khëne tas fersichere wën se wole — tas tsayt am aanfang waar ich mitkliiter fon te fariseyer sayne partay, te xtrëngste fon unser relichioon. ₆Un yets sin ich too julkeyert am kewe wayl ich hofnung hon an ti ferxprechung woo Hërkot kemach hot fer unser foerkhomer. ₇Ale xtame fon unser folek, woo Hërkot taache un nacht atoreere, waarte aach uf tii ferxprechung. Oh kheenich, is weche tee hofnung woo ich aan keklaacht kewe fon te yute. ₈Warom mënt teyer, oh yute, tas es unmeechlich is se klaawe tas Hërkot ti toote peleepe tuut?

₉Un Phaulus saat noch:

— Ich selepst tacht ich mist ales mache was ich khënt keeche Yeesus fon Nasarëë sayn naame. ₁₀Un waar aach was ich kemach hon in Yeruusalëm. Hon erlaupnis kriit fon te xëfe fon te priister un hon fiil aanhënger kefang. Wën se tsum toot konteneyert kep waare, hon ich aach keeche se keweelt. ₁₁Iwer fiil tsayt hon ich se kextrooft in ale sinakooke un hon se ketswung sayne klaawe ap saan. Ich hon se soo fiil kehast, tas ich sokaar noo anere xtet kang sin fer tëne se noo keen un fange.

₁₂Un Phaulus saat wayter:

— Waar tesweche woo ich noo te xtat Damasco kereest sin, mit erlaupnis un ortnunge fon te xëfe fon te priiister. ₁₃Awer is paseyert, oh kheenich, tas uf em weech, uf mitach, is en licht fom himel khom kreler wii ti sun, woo um ti mëner woo mit mich am reese waare rom kexaynt hot. ₁₄Meyer al sin uf te potem kefal, un ich hon en xtim keheyert woo mich in hepreyix kesaat hot:

— Saulo, Saulo, warom tuust tuu mich yachte? Hot khee weyert tas tuu tich keeche mich rewolteere tuust.

₁₅— Tan hon ich kefroot: “Weyer sayt teyer?”

— Un te Hër hot keantwort: “Ich sin Yeesus, tee woos tuu yachte tuust. ₁₆Awer, xtay uf un playp xteen. Ich sin fer tich tsum foerxayn khom fer tich aus se suuche fer mayne tiiner sin, tas tuu fer ti anere fertseele khanst was tuu hayt kesiin host un aan saan tuust was ich tich tëm noo tsayche tuun. ₁₇Ich pefraye tich fon te yute un aach fon tëne woo khee yute sin, fer weem ich tich hiin xike tuun. ₁₈Tuu tuust tëne ti aue uf mache tas tii aus te tunkelheet khome fer es licht, un tii fon Satanas sayn macht fer Hërkot pringe. Tan, torich em klaawe an mich, kewe tii fertsayert fon sayn sinte un fange aan teel se sin fom Hërkot sayn aus kesuuchte folek.”

₁₉Un Phaulus macht xlus, am saan:

— Also, oh kheenich Akripa, ich hon kemach was ti wisioon woo fom himel khom waar mich kexikt hat. ₂₀Hon ti mensaaj aan kesaat eyerxt in Damasco un tëm noo in Yeruusalëm, in te kans rechioon fon Yutëya un unich tëne woo khee yute sin. Ich saat fer tii al tas sii miste sayn sinte hinerlose, tsurik an Kot keen un tings mache fer se tsayche tas se wërklich sich keroyert hate. ₂₁Waar tesweche woo phaar yute mich kefang hon wan ich uf em hoof fom thëmpel waar un wolte mich umpringe. ₂₂Awer pis hayt hot Hërkot mich keholef, un tesweche sin ich hier mayn mensaaj fer al am pringe, soo fer ti keweenliche layt wii fer ti importante. Wayl ich saan tas selwiche woo ti profëte un Mooses kesaat hon tas paseere teet. ₂₃Tii hon fersichert tas te Kristus eyerxt layte mit mache mist un te eyerxte sin woo peleepe teet, fer tas licht fon te retung aan saan soo fer ti yute soo wii fer tii woo khee yute sin.

₂₄Wan Phaulus sich soo am tefenteere waar, hot Festo kexraayt:

— Phaulus, tuu pist ferikt! Host soo fiil xtuteyert, tas tuu te ferxtant ferloer host!

₂₅Phaulus hot keantwort:

— Ich sin net ferikt, Ekselënz; ich sin in mayne perfekte ferxtant un saan ti woerheet. ₂₆Ich khan xpreche foer em kheenich Akripa fol koraaj wayl ich sicher sin tas tee tas tings ales kans kuut khënt, wayl ti sin net uf en ferxtekelt plats paseyert.

₂₇Tan saat Phaulus fer te kheenich:

— Kheenich Akripa, klaapt teyer an ti profëte? Ich wees tas teyer klaapt!

₂₈Akripa hot keantwort:

— Tënkst tuu tas in soo en khorts tsayt teest tuu mich in en krist transformeere?

₂₉Phaulus saat:

— Also, ich teet fer Hërkot ferlange tas, in khorts ore lang tsayt, net ploos teyer, awer al tii woo mich hayt am heere sin hiin khome solte fer sin wii ich, awer oone tii khete an mayn hënt.

₃₀Tan sin te kheenich Akripa, Berenice un al tii woo pay tëne waare uf kextii ₃₁un sin raus kang, am komenteere:

— Tee man hot niks ketuun fer te toot se fertiine, net mool fer inkexpërt sin.

₃₂Tan saat Akripa fer Festo:

— Tee khënt xon loos kelos kewe wën eyer net ferlangt het fer julkeyert se kewe fom Kayser.